Col 3
3
1Tä mälhyejtso, tä pajche lenukwephä tä lep'akayej Cristo tä tälho n'op'itseyhay, enaypej atichunhayaja m'ayhay tä isen tä ikaphä tä ihi tä Cristo tatayhiphä tä ihi tä Dios lefwomkat.#Sal 110.1; Heb 1.3 2Tihi t'at ahusey m'ayhay tä ipuleye, wet yej lhen atichunhayaja m'ayhay tä lew'et honhat. 3Tsi tä pajche lep'akayej Cristo tä let'inhen, haw'atshancheyaj tä matche kamaj n'änhit'a, tsi iyej t'at Cristo tä iyej Dios. 4Wet oyok, haw'atshancheyaj tä matche häpe t'at Cristo,#Gál 2.20; Fil 1.21 wet chik lham lhain'älthila, häpkhilek nech'e häte n'änhila amel tä lheyayej lham tä ihi lewujyaj.
5Tä mälhyejtso, länhen nilhokej akeyes tä ni'isachehen tä tälhe honhat. Isit'ak wo elh chik häpe iwoye lakain'oyaj wok m'ak tä kok'aye, wet yej alhachajaye amukwehyajay wok anech'ethayajay tä ni'isachehen. Wet yej alhen häpeya iyhäj tä alhaknhatses, tsi hätet iwoye chik lhen häpeya aka dios m'ak tä lelhak'alch'oye. 6Nilhokej m'ayhaytso, häp tä itone Dios lewäk wichi tä niwoyaye lhämtes,#Ef 2.3; 5.5-6 7wet häpe t'at m'ayhaytso tä amel lewoyaye p'ante. 8Mat athana leyayej awäk lhäy'e tä afwitses, lhäy'e han'äyihyaj, lhäy'e tä lesitäyen aelh, lhäy'e ämtes tä kok'achehen. 9Yej woyej amehen ämtes tä kamatachehen, tsi pajche lelanayhi achowej wumek lhäy'e akeyes tä pajche, 10wet nech'e lhen haw'uya achowej elh tä nech'ayek,#Ef 4.22-24 häp m'ak tä Dios inech'aynhipej, lhäy'epej lhip, lhäy'epej lhip, tsi t'uhläk aitech'ayen lhamej yämthilek lhäy'e lhip tä letäfwelayej. 11Tä mälhyejtso, nemhit is chik õ'tetshanej elh tä häpe Judío wok elh tä kahäpeya, wok elh tä n'otetnek tä n'olhijtsek iyej wok elh tä newayej, wok häp elh tä lhämet w'enha lhamej, wok elh tä tayhlhele, wok häp elh tä n'okwenek wok elh tä kahäpeya. Tsi Cristo iyej elh chik häpe tä ichaye, wet häpe Elh tä lhamya wet naya.
Okeyes tä nech'ayhis
12Dios aihumnhen wet tatshupi amehen yämlek ahäpehen t'amajchetes. Tä mälhyejtso, enpej haw'uya hap'altsenyaj tä tälho ahusey tä letiyej aiyhäj, wet ch'otyeneje m'ak che isej. Yej alechäjwethä, yej afwitses, yej lhak'alwethä, 13mat teläytej t'at aelh che häpe, wet che iche aelh letes, täyhat. Mälhyej tä Lhawuk itäyhat amejen ates, häte täyhthen aiyhäj letes.#Ef 4.32 14Wet häp m'ak tä inu'pe tähestso, en haw'uya ahumnhayaj, tsi häp tä lhamya m'ak tä yäyitwek nilhokej tähestso. 15Wet is che n'otamsek tä tälhe Cristo lhayen niyatayej ahusey, tsi häp täja tä Dios t'änej amehen yämlek aweihalhahchä, hätet iwoye t'isan weihalha. Wet wopej graciasa.
16Is che Cristo lhämtes iwo w'etahiche ahusey wet wuj tä takäpfway amehen. Chufwen amejen m'ak tä lehanej, wet päyne aiyhäj m'ak tä is alhoho. Tä lechoywethä, n'okwiyej Dios, wo akäjyaja tä tälho ahusey, ten salmos lhäy'e iyhäj n'otenkay tä isen. 17Wet m'ak at che häpe tä lewoye, wuntej Lhawuk Jesús, wet wo graciasayej Dios Lhajcha häp tä isej Lhawuk Jesús.#Ef 5.19-20
Häpet iyhäj tä lech'efwas ihi
18Atsinhay tä hach'efwas ihi, en awuhuya hach'efwas, tsi häp täja m'ak tä t'uhawet amejen che lewoye tä ahäpehen iyhäj tä ichaye Lhawuk. 19Wet amel tä hin'ol tä hach'efwas ihi, humin hach'efwas, wet yej afwitsaje.
Häpet nä'tshas lhäy'e lajchalis
20Nä'tshas, woyayepej m'ak tä ajchalis lhäy'e akolis ne'tepej che lewoyaye. Tsi häp tä Lhawuk ihuminche täjtso wet t'uhawetej che Dios laka wichi iwoye. 21Wet häp amel tä hin'ol tä ales ihi, isit'ak letamenej lhamel che lewäk ihi, tsi elat nilhak'alwethä p'iya.
Häpet n'okawos
22Häp amel tä ahäpehen n'okawos, woyayepej m'ak tä awuhuy tä ihonhatena ne'tepej che lewoyaye. Mat oyok, tajlhamhiyet'a tä aitetshan, wet häp tä tamenej tä letach'ahuye lhamel yämlek lekänitlhi. Mat is che ahusey ts'ilak wet letiyej anowayhyaj Lhawuk, häp tä tamenej tä letach'ahuye lhamel. 23M'ak at che häpe che lewoye, is che häpe t'at m'ak tä tälho ahusey, hätet iwoyek Lhawuk t'at tä letachumhoplhi, häpkhit'a hin'ol. 24Tsi lehanej tä Lhawuk iwohlat awayhata tä tisila amhihen lakäpfwayajay, wet letach'ote t'at Cristo tä häpe Awuk tä lhamya. 25Mat häp elh tä iwoye m'ak tä ni'isa, ikathiyeja laha tä ni'isa, tsi Dios tek itetshanej m'ak tä häpe elh che häpe.#Deut 10.17
Currently Selected:
Col 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.