Ap.Lh 3
3
Lhawuk ichesat hin'o tä tsufwlaj
1Ifwala elh tä ifwala tatayhchä, Pedro lhäy'e Juan ihoye Dios Lew'et, tsi häpe t'at lewhäy tä wichi iwopej let'alhyaja. 2Wet iche hin'o tä tsufwlaj tälhe tä nech'e iche. Ifwalapej õ'häne Dios Lew'et wet õ'tiwhäye lepe tä õ'wo lheya Isilataj, yämthilek t'alheje m'ak tä isej häp wichi tä ihoye Dios Lew'et. 3Tä hiw'en Pedro lhäy'e Juan, wet yok:
–W'en n'oho m'akfwaj.
4Lhamel iyahin, wet Pedro tahuyej wet yok:
–Lhek yahin n'ohen.
5Tä hin'o iläte, iyahin t'at, tsi yenek õhw'enho t'awayhathaj. 6Mat Pedro ifwenho tä yok:
–Ow'enhit'a chinaj t'äj, mat m'ak tä ow'en, häp tä ow'en amho. Häp tä isej lakhajyhayaj Jesucristo tä Nazaret lhele lhey, oyok, ¡W'eleklhi!
7Tä Pedro iwoyetso, tachuma takwey tä lefwomkat wet ineyhatphä, wet yofwajkwet t'unhiche takäläw'ol lhäy'e lepach'ol. 8Wet tiyäjphä tä takasit wet nech'e w'eleklhi, wet yikche lhamel tä tiyäjo Dios Lew'et, mat nech'e lham takäläy t'at tä isej, wet tiyäjlhaphä tä iwunit Dios. 9Wet nilhokej wichi hiw'en tä lhaiwoynejetso, 10wuj leselthayaj wet inuhat lhamhohen, tsi nitäfwelej tä hin'otso häpe t'at elh tä tatayhiphäpej Lepe tä Isilataj tä t'alhejepej wichi m'ak chik isej.
Pedro iwo lhämeta tä ihi Dios Lew'et
11Tä Pedro lhäy'e Juan ihoye Dios Lew'et lhip tä lhey Pórtico de Salomón, hin'otso ilehiyejt'a tä itsok. Wet wuj tä leselthayaj ihi nilhokej wichi, wet inukwe alhoho tä tiyäje lhamel. 12Tä Pedro hiw'en wichi, wet tahuyej wet yok:
–Israel lhayis, ¿chipte tä leseltayej? ¿Wet chipte tä leyahinay n'ohen? ¿Hä lefwetajay olhamel tä ochesat hin'ona? ¿Hä lefwetajay olhamel okhajyhayaj wok häp tä on'okwiyejpej Dios tä tamenej tä iches wet w'eleklhi? 13Lhek tetshanay, Dios tä lhatetsel Abraham, Isaac lhäy'e Jacob n'okwiyej p'ante, lham iwujyen lakawo Jesús,#Isa 52.13—53.12; Fil 2.7-9 wet häp tä ichesat hin'otso. Lham Jesús tä amel lhachajaye naji niyatey, wet tej tä gobernador Pilato t'uhläk ilanhi, mat amel lewohiyet'a. 14Matche, alefwonayhlä häp Elh tä Dios T'amajchet lhäy'e tä Is Alhoho, wet let'alheje Pilato chik ilanhi elh tä n'olhikoy. 15Wet mälhyejtso tä lene'tayek õ'län häp Elh tä n'ow'atshancheyaj tälhe.#Mat 27.15-23 Mat Dios inuhatphä tä tälho n'op'itseyhay, wet olhamel tä ow'en naji tä matche t'at täjtso. 16Wet m'ak tä nech'e ikhajyen häp hin'ona tä amel lew'enay wet äp letäfwelayej, häpe t'at n'ot'ekhahyaj tä õ'tiyej Jesús lhey tä lakhajyhayaj ihi. Wet n'ot'ekhahyajtso, häp tä imälhewek tä ichesat hin'ona, mälhyej tä nilhokej amel lew'enay.
17“Yaiyhäj, ohanej t'at tä amel lhäy'e aka niyatey, lehanhiyejt'a m'ak tä lewoye tä lene'tayek õ'län Jesús. 18Mat mälhyejtso Dios lhämet p'ante laka profetas yen lhämeta tä yok, Nämla N'ofwayhthi tä Dios Chenek, mat leteläythayaj ihiyeja yäk y'il.
19“Tä mälhyejtso, woyay ahusey iyhäja wet atilhkataye Dios, häpkhilek itäyhthen hach'isukyajay, wet ichätyen amehen n'otamsek tä tälhe, 20wet ichenla amehen Afwayhthiyay tä pajche itshupyenej amehen tä häpe Jesús. 21Athana t'uhawetej t'at chik pule tachumlä wet ihi, pajla'tha nichäte lewhäy chik Dios inech'aynhi nilhokej m'ayhay wet yäm matche lhämtes tä laka profetas p'ante t'amajchetes ifwenhomche wichi. 22Moisés ifwenho p'ante lhachätilis tä yok, Häp Lhawuk Dios itälhthihola amel häp profeta mälhyej iwoye olham. Woyayela nilhokej m'ak chik ifwel amhohen, 23tsi elh at chik häpe chik nitch'ahuyaye profetatso, Dios isohiyeja tä iyej laka wichi.#Deut 18.15-19
24“Wet nilhokej profetas iyhäj, tälhe Samuel yäk nichäte iyhäj tä lepese, häte yen p'ante lhämeta ifwalas tä n'amel y'ehina. 25Wet m'ayhay tä Dios ifwel tä lhamel yen lhämeta, amel t'at tä aisej, wet äp aisej m'ak p'ante Dios yäm kalelhäj tä hit'unteji lhämet häp lhatetsel. Tsi ifwenho p'ante Abraham wet yok, Otkäpfwayhiyejela le'isyaj wichi tä w'enhache lhamej tä ihiche nilhokej honhates, häp tä isej ales tä lepes lheley.#Gén 12.3; 22.18
26“Wet häp tä Dios ichunkat amel tä itshupyeneje Lhäs tä lakawo tä ichen amehen, häpkhilek takäpfwayej amehen tä ilehat amchehen tä lewoye akeyes tä ni'isachehen.”
Currently Selected:
Ap.Lh 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.