Ap.Lh 4
4
Pedro lhäy'e Juan ihi tä Judío lhayis laka Concilio tä Lhamya tatache
1Tä Pedro lhäy'e Juan kamaj tahuyej wichi, nämhen sacerdotes, lhäy'e hin'o tä niyatej sip'äl tä t'uye Dios Lew'et, lhäy'e Saduceo lhayis. 2Lhamel tawäkwäyhen tä Pedro lhäy'e Juan ichufwenhen wichi wet yen lhämeta tä Jesús inuphä tä tälho n'op'itseyhay, wet tä inuphä, n'äl tä matche tä n'op'itseyhay inukwephä. 3Häp tä tamenej tä lhamel itsoklhi Pedro lhäy'e Juan wet hip'ohiche pajtha fwala elh, tsi honaj t'at. 4Mat wujpe wichi tä pajche iläte m'ak tä yen lhämeta, ichaye. Wet tälhe fwala tä Pentecostés, lhamel tä lhayen Dios lelesa, tajlhama hin'ol tä kalelhäj tä ihi cinco mil.
5Tä fwala elh Judío lhayis kaniyatey lhaihuthiwek Jerusalén, lhäy'e hin'ol tä thänhäy, lhäy'e lhamel tä lhayen lewosayej Ley p'ante tälhe Moisés. 6Häte iche häp Sacerdote tä Lhamya tä lhey Anás, lhäy'e Caifás, lhäy'e iyhäj tä lheyes Juan lhäy'e Alejandro, lhäy'e nilhokej Sacerdote tä Lhamya lew'et lheley iyhäj. 7Wet lhamel yok:
–Hänay alhoho hin'oltso.
Wet sip'äl yike wet itihi niyatey lechowej, wet lhamelna tay'ätshane tä yok:
–¿Atsi lhey tä lakhajyhayaj ihi tä han'ohyaj tälhe tä lewoye n'aji m'ak tä lewoye?
8Wet Espíritu tä Dios T'amajchet lhayäm tapoyejej Pedro, wet lham nichulho lhamel wet yok:
–Amel tä wichi alaka niyatey lhäy'e iyhäj tä häpehen hin'ol tä thänhäy: 9Che letay'ätshanej n'oyehen ifwalana häp m'ak tä hin'o tä tsufwlajtso isej tä olhamel owoyeje naji, wet let'uhläk lehanej m'ak tä häpe tä ichesat, 10ofwel amhohen, lhäy'e nilhokej Israel lhayis iyhäj, oyok, Häp hin'ona tä ihi tä amel letatache iches tsi isej häp Jesucristo tä Nazaret lhele lhey tä lakhajyhayaj ihi. Häp lham tä amel lene'tenaj che õhp'ajtej cruz, mat Dios inuhatphä tä tälho n'op'itseyhay. 11Dios lhämet lhip yop'antekwe:
“Häp tunte tä amel
tä lhenaylhi hup letiyayej kanhi,
nech'e häpe t'at tunte tä lhamya.”#Sal 118.22
Tuntena häpe t'at Jesús, 12wet häp tä n'aisej, tsi ihichet'a elh at che häpe tä Dios ichen honhatena yämthilek n'aifwayhthen.#Juan 14.6
13Tä niyatey hiw'en tä newache lenowayhyaj Pedro tä yämlhi, lhäy'e Juan, wet wuj tä iseltejen, tsi nitäfwelej tä häpehen hin'ol tä nhanache m'akej, w'et m'ayhayhas t'at. Wet ihanej tä häpehen Jesús let'unfwas. 14Häte hin'o tä iches iwhäye lhamel, tä mälhyejtso, niyatey ihanhiyejt'a iwoyneje lhämet che nichulhejlä, 15mat tajlhama tä ne'tek yik'ajch'oye lhamel. Wet nech'e yämwethä lhamhomche 16wet yok:
–¿Chi y'awoyneje hin'oltso? Tsi nilhokej Jerusalén lheley ihanej tä lhamel yenlhi letetnektso wet iseltejen, wet y'ahanhiyejt'a y'awoyneje che y'akachu. 17Mat tä y'at'uhläk nem wichi yen lhämtesa täjtso, is che y'at'untejche lhalhämet hin'oltso tä y'ane'tek ileyej tä iwo lheya Jesús tä yämhoplhi wichi.
18Tä mälhyejtso, lhamel yachajo tä t'äne Pedro lhäy'e Juan wet yok:
–Lhek tetshanay m'ak tä olhamel ofwel amhohen, oyok, ¡Leyayej tä lewo lheya Jesús tä lhämhoplhi wichi lhäy'e tä lewo achufwenyaja!
19Matkat tä Pedro lhäy'e Juan iläte, wet nichulho tä yok:
–Häte amel tetshanay che häpe m'ak tä is alhoho tä ihi tä Dios tatache, chik olhamel n'am woye m'ak tä Dios lenech'ethayaj mat otch'ahuye m'ak tä amel lene'tek owoye. 20Oyok, kha. Olhamel ohanhiyejt'a owoyneje che oleyej tä oyen lhämeta häp m'ak tä ow'en naji lhäy'e tä oläte.
21-22Tä niyatey iläte täja, wet yok:
–¡Yej tujlhache m'ak tä on'äyej amhohen, häpkhilek awit'äy newa amejen!
Wet ilanhi lhamel, nilhokhiyet'a letes che häpe yämthilek itasnhen, tsi nilhokej wichi iwunit Dios tä ichesat hin'o tä tsufwlaj tä laka nekchämes inu'pe cuarenta.
Dios leles t'alheje lakhajyhayaj
23Tä õ'lanhi Pedro lhäy'e Juan, lhamel yikhen tä ihoye let'unfwas wet ifwenho m'ak tä sacerdotes tä len'ohyajay ihiche lhäy'e hin'ol tä thänhäy lhämet tä ifwenho lhamel. 24Tä iyhäj iläte, nilhokej lhaip'ajtejwek let'alhyaj tä t'alhe Dios wet yok:
–Iwuk, häp am tä enek pule lhäy'e honhat lhäy'e lewomekitaj, lhäy'e nilhokej m'ayhay tä ihiche. 25Wet Espíritu tä Amajchet yämyenlhi p'ante akawo David tä häpe olhamel ochäti, wet yok:
“¿Chipte tä lewäk ihi wichi tä i'pe honhat?
¿Chipte tä fwetaj iwoye m'ayhay tä najit lahaya?
26Niyatey lhäy'e n'owustas tä i'pe honhat
lhaihutchewek tä lhaiwaklhatejen laka'tshayaj,
yämthilek tatayhlä Lhawuk
lhäy'e Lechenek tä N'ofwayhthi.”#Sal 2.1-2
27“Wet matche, tsi Herodes lhäy'e Poncio Pilato#Luc 23.1-12 lhamel lhaihutnajwek tä ihi hupuyna, lhäy'e Romano lhayis, lhäy'e wichi tä Israel lhayis, wet tatayhlä Jesús, häp akawo tä amajchet tä häpe t'at Achenek tä N'ofwayhthi. 28Wet mälhyej'attso tä lhamel iwoye nilhokej m'ak tä pajche lewaklhat tä häpe t'at am anech'ethayaj. 29Wet athana, Iwuk, lhek yahinya häp lhamel tä fwetaj n'äyej n'ohohen achumet tä olhamel owoye. Mat w'en n'ohomche tä akawos n'ohen yämthilek newache onowayhyaj tä oyen lhämeta ämtes. 30Wet n'älit akhajyhayaj tä lechesthen wichi tä t'inhayaj länhay, lhäy'e tä lhenlhi n'otetnhay lhäy'e m'ayhay tä wichi iseltejen, häp tä isej lhey Jesús tä akawo tä amajchet.”
31Tä lhamel ileyej tä iwo t'alhyaja, w'ahuye häp hup tä lhamel lhaihutchufwi, wet nilhokej lhamel Espíritu tä Dios T'amajchet lhayäm tapokwe, wet lenowayhyaj ihihit'a tä äp yen lhämeta Dios lhämtes.
Dios leles hiw'en lhamhomche m'ak tä hiw'en
32Wet nilhokej wichi tä hap'akej Jesucristo w'awulhchä lehusey lhäy'e letichunhayajay. Ihichet'a elh che häpe che yok, “M'ak tä in'oyej olham t'at tä olewuk”, mat nilhokej lhamel hiw'enpej lhamhomche m'ak tä hiw'en.#Ap.Lh 2.44-45 33Wet apóstoles wuj tä lakhajyhayaj iyeji tä yenpej silätyaja tä Lhawuk Jesús inuphä tä tälho n'op'itseyhay, wet matche tä Dios hiw'enho lakäpfwayaj tä is nilhokej lham leles. 34Wet ihichet'a elh che p'elitsajch'oye m'ayek, tsi lhamel tä hiw'en honhates wok lewukwey iwom 35wet yachaje laha häp apóstoles, wet lhamelna hiw'enho elhpej tä niw'ena m'ayek yämthilek isej. 36Mälhyej m'ak tä hin'o tä lhey José iwoye, häp elh tä apóstoles iwuntej Bernabé, wok oyok, Khajyentes. Lham häpe t'at Leví leles elh tä lepes lhele, wet honhat tä lew'etya häpe lhiletaj tä lhey Chipre. 37Häp hin'otso hiw'en honhat tä lewuk, wet iwom wet yachaje laha häp apóstoles yämthilek itetshan m'ak che iwoyeje.
Currently Selected:
Ap.Lh 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.