Pakɔsje 9
9
Ala aji njékula dɔ deeje
1Pa lə Dabid gə́ ar bao-pa mba karee ɔs sə dee lé. Taree wɔji dɔ Kwəi mbata lə ŋgon gə́ diŋgam.
2M’a pidi Njesigənea̰ gə ŋgaw məəm bura ləm,
M’a kɔr sor boo-néraije lai gə́ maji dum ləm tɔ.
3M’a kari-i nja to gin rɔlel gə gin kalrɔ ləm ləm,
M’a kɔs pa kar rii-i Ala gə́ Njekurdɔloo ɓar ne ləm tɔ.
4Njéba̰je ləm lé rəm gə goo dee goo dee,
Deḛ ləŋg ta sə-sə, d’udu ne nɔḭ’g bo̰ ya.
5Mbata i gədm dɔ néram gə́ danasur’g ləm,
Gə dɔ ta’g ləm ləm tɔ,
I si dɔ kalimbai’g ləi gaŋg ne rəwta gə́ gə dɔ najee.
6I ar bo̰ néra ginkoji dəwje gə raŋg ɔs ta dee’g ləm,
I tuji njémeeyèrje pugudu ləma,
I tuji ri dee pugudu-pugudu saar gə no̰ ləm tɔ.
7Njéba̰je godo! Deḛ tuji gə no̰!
Ɓee-booje lé i nja tɔ dee pɔs-pɔs!
Mee dəw a kolé dɔ dee’g el ŋga.
8Njesigənea̰ o̰ ɓee saar gə no̰,
Yeḛ unda kalimbai ləa mba gaŋg rəwta.
9Yeḛ gaŋg rəwta dɔ dəwje gə́ dɔ naŋg neelé gə goo rəbee,
Rəwta-gaŋg ləa gə́ dɔ koso-dəwje’g lé
Yeḛ gaŋg gə goo rəbee sur ya.
10Njesigənea̰ lé to njo̰loo lə dee gə́ d’orè dɔ dee naŋg ləm,
Yeḛ to njo̰loo lə deḛ gə́ néurti teḛ dɔ dee’g ləm tɔ.
11Deḛ gə́ gər rii lé d’ɔm meḛ dee dɔi’g jəb-jəb
Mbata i Njesigənea̰ lé deḛ gə́ sa̰gi lé
I uba dee ya̰ dee el.
12Maji kar sí ɔsje pa arje Njesigənea̰ gə́ si Sio̰ lé,
Néreaje gə́ dum dɔ loo lé
Maji kar sí ilaje mberee mbuna koso-dəwje’g,
13Mbata yeḛ dal ba̰ məs ləm,
Yeḛ ar mée olé dɔ njénékəmndooje’g ləm tɔ,
14Njesigənea̰, maji kari oo kəm lootondoo’g ya kari,
Oo némeeko̰ gə́ njéba̰je ləm d’am m’isi danee’g,
Maji kari ɔrm tarəwkɔg’d lə yoo,
15Gə mba karm m’ila mber rɔnduba ləi
Tarəwkɔg’d lə koso-dəwje gə́ Jerusalem lé ləm,
Gə m’al ne rɔm mbata gə kaji ləi ləm tɔ.
16Ginkoji dəwje gə raŋg d’oso mee bwa
Gə́ deḛ nja d’uru’g lé ləm,
Gɔl dee kara réḛ gum gə́ deḛ nja d’iya pḛ́ lé ləm tɔ.
17Njesigənea̰ riba dɔ rəa gaŋg ne rəwta gə́ gə dɔ najee,
Yeḛ ar gum néra majel lə njémeeyèrje tel wa dee.
18Njémeeyèrje tel kəm dee par gə́ ɓee lə njé gə́ d’wəi,
Deḛ ɓa to ginkoji dəwje gə raŋg lai
Gə́ meḛ dee unda pudum dɔ Ala’g lé.
19Mbata mee Ala wəi dɔ njénékəmndooje’g nda̰ el,
Né gə́ njéndooje d’unda meḛ dee yel dɔ’g lé a kudu nda̰ el tɔ.
20Ǝi Njesigənea̰, maji kari ḭta!
Maji kar dəw kára kara dum dɔi el!
Maji kar ginkoji dəwje gə raŋg ree nɔḭ’g
Gə mba kari gaŋg rəwta dɔ dee’g!
21Ǝi Njesigənea̰, ar siŋgasa unda dee.
Maji kar koso-dəwje gər to gə́ deḛ to gə́ dəwje ba.
Currently Selected:
Pakɔsje 9: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
