Pakɔsje 50
50
Ala gaŋgta dɔ Israɛlje’g
1Pakɔs lə Asap
Ala, Njesigənea̰ Ala lé
Pata ɓar ne dəwje gə́ dɔ naŋg nee lai
Un kudee dɔ deḛ gə́ d’isi loo-kuba’g lə kàr
Saar teḛ ne dɔ deḛ gə́ d’isi loo-kuru-naŋg’g ləa jigi tɔ.
2Mee ɓee gə́ Sio̰ gə́ ndoolé keḭ-keḭ lé
Rɔnduba lə Ala ndogó jol-jol keneŋ.
3Ala lə sí lé si ree
Ɓó yeḛ si dɔ mundu el,
Loo gə́ nea̰’g lé pər o̰ kənənə-kənənə ləm,
Loo gə́ gugu dəa sub lé kara lel-boo ula mbḭ-mbḭ ləm tɔ.
4Yeḛ ila boo-ndia naŋg par gə́ mee dara gə́ tar ləm,
Gə par gə́ naŋg nee ləm tɔ,
Mba gaŋg ne rəwta dɔ koso-dəwje’g ləa pana:
5Maji kar sí mbo̰je majikojije ləm dɔ na̰’d amje,
To deḛ gə́ manrɔ dee d’am gə nékinjaməs lé!
6Dara a kila mber meekarabasur ləa,
Mbata Ala to njegaŋ-rəwta.
7Seḭ dəwje ləm lé urje mbi sí, m’a gə pata,
Seḭ Israɛlje kara m’a gə ndəji sí kɔr tɔ.
Ma lé m’to Ala gə́ to Ala lə sí ya.
8Nékinjaməsje gə́ seḭ injaje amje lé
Ma m’ndaŋg sí gə mbəa el,
Nékinjaməsje gə́ seḭ rooje lé
Ɔs goo na̰ goo na̰ nɔm’g ya.
9Ma lé m’a kwa bɔ maŋg kára kara
Mee kəi’g lə sí el ləm,
Esé bàl bya̰je kara
Mee kəi nékulje’g lə sí el ləm tɔ.
10Daje lai gə́ mee kag-kɔr’g ləm,
Gə daje gə́ dɔ mbalje gə́ bula digi-digi
D’as tɔl-dɔg-dɔg (10.000) ləm tɔ lé to kamaje ya.
11Ma m’gər yelje lai gə́ dɔ mbalje’g ləm,
Daje gə́ rara kara mee wala’g lé to kama ləm tɔ.
12Ɓó lé ɓó tɔlm ndá m’a kulai taree el
Mbata dɔ naŋg to kama gə néje lai gə́ to keneŋ.
13See ma lé m’usɔ dakasrɔ bɔ maŋgje wa.
See m’ai məs bàl bya̰je lé to wa.
14Maji kar néra oiyo ɓa to gə́ nékinjaməs gə́ seḭ injaje arje Ala
Gə mba tɔl ne ta ndukunje lə sí bém kar Njekurdɔloo’g.
15Maji kar sí ɓarje rim ndɔ néurti’g
Ndá m’a kɔr sí keneŋ kar sí ulaje ne rɔnduba dɔm’g ya.
16Ala pata ar njemeeyèr pana:
See gə mba ɗi ɓa i tura tornduje lə neḛ ləm,
I ar ta manrɔ lə neḛ to tai’g ya bèe ləm tɔ wa.
17Ta gə́ d’wɔjii lé i ə̰ji bəḭ-bəḭ ləm,
Taje lə neḛ kara i mbad ya ləm tɔ.
18Ɓó lé i oo njeɓogo ndá i al rɔi səa na̰’d ya ləm,
Njémɔdkaiyaje ɓa i ɔm məəi sə dee na̰’d sad ya ləm tɔ.
19I ya̰ tai pa ne ta gə́ majel ləm,
Ndoḭ kara to nésukəmloo ləm tɔ.
20I lé si naŋg ndá
I ila ta dɔ ŋgokɔḭ’g ləm,
Ŋgolə kɔinje kara
I unda nani dəa’g ya ləm tɔ.
21Aa oo, né gə́ i ra ɓa nee ndá
Neḛ m’pata dɔ’g el,
I ə̰ji məəi’g pana:
Neḛ n’to tana səi bèe ya,
Nɛ n’a gə ndaŋgi dɔ’g kunda néje neelé kəmi’g ya kari oo tɔ.
22Seḭ gə́ meḛ sí wəi dɔ Ala’g lé
Maji kar sí undaje kəmkàr dɔ rɔ sí’g
Nà n’a kḭ ti sí ne mbidi-mbidi
Lal kar dəw kára kara ɔr sí ila sí tar.
23Yeḛ gə́ inja nékinjaməs gə́ ka̰ kɔm na̰’d sad lé
Yeḛ nja ɓa ula rɔnduba dɔ neḛ’g,
Yeḛ gə́ tɔs kəmee bao-bao dɔ rəw-kabee’g lé
N’a kar kəmee inja dɔ kaji’g lə Ala ya.
Currently Selected:
Pakɔsje 50: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
