Pakɔsje 51
51
Tamaji kwɔi ne meekoso lemsé lé
1Pa lə Dabid gə́ ar bao-pa mba karee ɔs sə dee lé. 2Loo gə́ Natan njetegginta #2Sam 12.1-15 lé ree rəa’g gə goo kaw gə́ Dabid aw ne rɔ Bat-Seba’g lé.
3Ǝi Ala, i gə́ to njemeemaji,
Maji kari oo kəm lootondoo’g
Ndá tuji kaltaje ləm gə goo boo-meekɔrjol ləi.
4Néra kori-korije ləm lé
Maji kari togo ɔr ndɔs-ndɔs ləm,
Maji kari ɔr kaiya ram ndɔs-ndɔs ləm tɔ.
5Mbata kəm inja dɔ kaltaje’g ləm ləm,
Kaiya ləm kara taree to nɔm’g ta-ta ləm tɔ.
6M’ra kaiya m’ɔs ne ta ləi-i nja rəw ləm,
M’ra ne né gə́ to kḛji kəmi’g,
Bèe ɓa ta gə́ i a gaŋg lé
A to gə dɔ najee ləm,
Rəwta-gaŋg ləi kara
Dəw a kimi dɔ’g el ləm tɔ#Rɔm 3.4.
7Aa oo, d’ojim dan néra gə́ kori-kori’g ləm,
Kɔm kara taa kèm ləm dan kaiya’g ləm tɔ.
8Nɛ i lé ndigi kar kankəmta ur kəi mee dəw’g njɔd,
Bèe ndá maji kari ar kəmkàr to məəm’g!
9Maji kari ɔr wonm gə barkəm gərgənd ndá m’a kàr ne ŋgad-ŋgad,
Togəm ndá m’a tel ndá dum kwɔji.
10Maji kari ulam ta kalrɔ gə ta rɔlel
Ndá siŋgarɔmje gə́ i guru lé d’a kɔs na̰’d.
11Maji kari un kəmi dɔ kaiya ramje’g rəw ləm,
Tuji néra kori-korije ləm lai ləm tɔ.
12Ǝi Ala, maji kari tel məəm aree ndá londoŋ
Ɓó gə ar ndil gə́ ka̰ kisi lɔm to məəm’g.
13Maji kari ɔsm piriŋ ilam əw el ləm,
Ɔr ndili gə́ meenda lé məəm’g el ləm tɔ.
14Maji kari am m’tel m’ra rɔlel dɔ kaji’g ləi gogo ləm,
Ar ndili am m’ndiŋga rɔm gə mba ra né gə́ maji ləm tɔ.
15Njékalta tai’gje lé m’a ndoo dee rəw-kabije
Ndá njékaiyaje d’a kɔs badm tel ree rɔi’g tɔ.
16Ǝi Ala gə́ to Ala gə́ njekajim lé
Maji kari ɔr ta kila məs dəw lé dɔm’g
Ndá tam a teḛ kila mber ta meekɔrjol ləi.
17Mbaidɔmbaije, maji kari wa tam teḛ
Ndá tam a kila mber ta pidiije.
18Ɓó lé i ndigi kam m’inja nékinjanéməsje m’ari ndá
M’a kinja kari ya,
Nɛ nékinjanéməsje gə́ roo lé taa kəmi el.
19Nékinjaməs gə́ taa kəm Ala rəgm lé
Yee ɓa to ndil dəw gə́ oso kul,
Ǝi Ala, ɓəŋgərə dəw gə́ ti dus mba kwa ndòo rɔ ləa lé i ə̰ji bəḭ-bəḭ el.
20Maji kari ar meemaji ləi taa mee ɓee gə́ Sio̰ pəl-pəl gə goo meenoji ləi ləm,
Tel ila ndògo gə́ Jerusalem lée’g gogo ləm tɔ.
21Yen ɓa nékinjanéməsje gə́ ka̰ meekarabasur lé i a taa ləm,
Nékinjaməsje gə́ d’a roo gə kuburee lé kara i a taa ləm tɔ,
Togə́bè ɓa d’a kinja ne bɔ maŋgje dɔ loo-nékinjaməs’g ləi.
Currently Selected:
Pakɔsje 51: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
