Pakɔsje 36
36
Meeyèr lə dəw lé
1Pa lə Dabid gə́ to kura lə Njesigənea̰ gə́ ar bao-pa mba karee ɔs sə dee lé.
2Ta gə́ ərm lə njeramajel lé
To dɔɓəŋgəree’g kəi kɔrɔg,
Ɓəl Ala yeḛ oo gə́ né kəmee’g el#Rɔm 3.18.
3Mbata yeḛ nja ɔs gaji rəa
Gə mba kar dɔ néra kori-kori ləa ɔr ne njal ləm,
Mba riba ne dɔ kḛji loo bəḭ-bəḭ ləa gə́ raga ləm tɔ.
4Taje gə́ teḛ təa’g to taŋgɔm ləm, gə ta sukəmloo ləm tɔ,
Yeḛ mbad ra né gə kəmkàr ləm, gə néra gə́ maji lé ləm tɔ.
5Né gə́ to gə dɔ najee el lé
Yeḛ la̰ji toree mée’g loo tée’g ləm,
Rəw néra gə́ majel ɓa yeḛ aar keneŋ njaŋg ləma,
Néra gə́ majel lé kara yeḛ ɔs rəw el ləm tɔ.
6Njesigənea̰, meemaji ləi lé taa mee dara pəl-pəl ləm,
Meenda londoŋ ləi to yaa̰ aw njal teḛ loo-kil’g lə ndi ləm tɔ.
7Meekarabasur ləi to asəna gə mbalje lə Ala ləm,
Rəwta-gaŋgje ləi to asəna gə ɓul manje ləm tɔ.
Njesigənea̰, i nja gəd dəwje ləm, gə daje ləm tɔ.
8Ǝi Ala, meemaji ləi gə́ al dɔ loo sula lé
M’oo gə́ né gə́ to ŋgonkəm bèe ya!
Ndil bagee ɓa dəwje saŋg njo̰loo-kula-dɔ dee keneŋ.
9Némajije gə́ to mee kəi’g ləi rib-rib lé
Meḛ dee ndan ne,
Kəm-rəw-mán gə́ àr yal-yal lé ɓa
I tɔl ne kunda lə dee tɔ.
10Mbata kisi kəmba lé ginee ḭ rɔi’g,
Mbɔl dɔ lookàr ləi lé ɓa jeḛ j’oo ne lookàr ya tɔ.
11Deḛ gə́ gəri lé
Maji kari ar meemaji ləi taa rɔ dee pəl-pəl ləm,
Deḛ gə́ meḛ dee to danasur lé
Maji kari ar meekarabasur ləi taa meḛ dee pəl-pəl ləm tɔ.
12Maji kar njebeelé tugam gə gɔlee el ləm,
Maji kar ji njémeeyèrje kara ram d’am m’aḭ no̰ dee’g el ləm tɔ.
13Deḛ gə́ to njéra néje gə́ kori-kori lé d’oso mba̰,
Deḛ ɓugu naŋg wɔlɔg ɓó d’askəm tel kuba naŋg kḭ tar gogo el ŋga.
Currently Selected:
Pakɔsje 36: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
