Pakɔsje 35
35
Tamaji lə njera nédana
1Pa lə Dabid
Njesigənea̰, maji kari aḭ bada dɔm’g
Ɔs ne njéba̰je ləm rəw ya ləm,
Rɔ ne gə njékoma̰ səmje ləm tɔ.
2Maji kari un dər-rɔ gə́ lam gə yeḛ gə́ boi lé
Ḭ ne rad gə mba la ne səm ya.
3Maji kari wa niŋga-ndəi gə ko̰-niŋga-dubu tar
Rɔ ne gə njékula kəm ndooje!
Maji kari ulam to gə́ i nja to kaji ləm.
4Deḛ gə́ ndigi kam m’udu lé
Maji kar dee d’aw go̰gyo̰-go̰gyo̰ gə rɔkul dɔ dee’g ləm,
Deḛ gə́ d’ḛjim bəḭ-bəḭ mba karm m’tuji lé
Maji kar dee rəm gogo gə rɔkul dɔ dee’g ya ləm tɔ.
5Maji kar dee to d’asəna gə tisa gə́ lel sané kad bèe ləm,
Maji kar kura lə Njesigənea̰ gə́ dara tuba dee ləm tɔ.
6Maji kar rəw-kaw dee ndul njudu-njudu ləm, gə aḭ gəm ləm tɔ,
Maji kar kura lə Njesigənea̰ gə́ dara korə dee ɓiri-ɓiri tɔ.
7Mbata lal né gə́ bèe ya
D’ɔm ne kam ta bwa’d gə mbam ləm,
Lal né gə́ bèe ya
D’uru ne bwa mba tɔlm ne ləm tɔ.
8Maji kar tuji teḛ dɔ dee’g wai ləm,
Maji kar ba̰də gə́ d’ila mba kwam ne lé tel wa dee
Kar dee d’oso keneŋ tuji ne pugudu ləm tɔ.
9Nɛ ma lé m’a ndá məəm kaḭ dɔ Njesigənea̰’g ləm,
Kaji gə́ yeḛ ajim lé m’a kal ne rɔm ya ləm tɔ.
10Siŋgarɔmje lai d’a pana:
Njesigənea̰! See na̰ ɓa askəm kɔr njenékəmndoo ji dəw gə́ siŋgá ur dəa’g ləm,
Gə njenékəmndoo gə njendoo lé
Ji dəw gə́ si tɔr néje ləa rəa’g lé
To gə́ i bèe wa.
11Njékɔrgootaje gə́ ŋgɔm d’uba naŋg d’ḭ,
Deḛ dəjim ta dɔ né gə́ m’gər ginee’g el.
12Deḛ tel ra səm majel godə maji gə́ m’ra sə dee’g,
Deḛ d’ya̰m gə karm ba.
13Ma lé loo gə́ deḛ ɓa d’oso gə rɔko̰ ndá
M’ula kubu-kwa-ndòo rɔm’g ləm,
M’oso kul m’ɔg məəm ɓó ləma,
M’ula dɔm naŋg mbur-mbur m’ra ne tamaji ləm tɔ.
14M’aw yɔroŋ-yɔroŋ
To gə́ m’wa ndòo yoo baokura ləm əsé ŋgokɔm bèe ləm,
M’rugu koŋgoŋ gə kəmndoo
To gə́ m’wa ndòo yoo kɔm bèe ləm tɔ.
15Nɛ deḛ lé loo gə́ m’unda ndolé ndá
Deḛ d’wa dɔ na̰ d’al ne rɔ dee ləm,
Deḛ d’wa dɔ na̰ d’wɔji ne dɔm gə mba kula sul dɔm’g ləma,
Deḛ gaŋgm dana mbidi-mbidi kəm dee gə́ kédé-kédé ləm tɔ.
16Deḛ d’usɔ ŋgaŋ dee dɔm’g tar pəgərə-pəgərə
Gə njéhulaije gə́ to njékula sul dɔ loo’gje lé na̰’d.
17Mbaidɔmbaije, see saar ndɔ gə́ ra ŋga ɓa
I a si koo dee gə koo bèe ɓəi wa.
Maji kari aḭ bada dɔm’g
Ɔrm ne ji dee’g loo-kumum’g lə dee ləm,
Taam ne ta ŋgan toboḭje’g lé ləm tɔ.
18Ma lé m’a pidii mbuna koso-dəwje gə́ mbo̰ dɔ na̰ ləm,
M’a kɔs gajii mbuna koso-dəwje gə́ bula digi-digi ləm tɔ.
19Maji kar deḛ gə́ to njéba̰je ləm lal né gə́ bèe lé
D’al rɔ dee d’wɔji ne dɔm el ləm,
Maji kar deḛ gə́ d’ḛjim bəḭ-bəḭ lal né gə́ bèe lé
D’ula sul dɔm’g el ləm tɔ#Pak 69.5, Ja̰ 15.25.
20Mbata ta gə́ teḛ ta dee’g lé
To ka̰ meelɔm el,
Ta sukəmloo ɓa deḛ la̰ji toree meḛ dee’g
D’oma̰ ne gə dəwje gə́ d’isi lɔm mee ɓee’g lé.
21Deḛ teḛ ta dee d’oma̰ ne səm pana:
Kwa! Kwa! N’ooje ya ŋga!
22Njesigənea̰, i lé oo gao ya!
Maji kari si dɔ mundu el!
Mbaidɔmbaije, maji kari unda rɔi ɓad rɔm’g el!
23Maji kari teḛ kəmi,
Gə́ teḛ kəmi gə mba kɔr kəm ta ləm gə goo rəbee!
Ala ləm gə́ to Mbaidɔmbaije ləm,
Maji kari ra rəwta ləm ya!
24Njesigənea̰, Ala ləm,
Maji kari gaŋgta dɔm’g gə goo meekarabasur ləi
Ɓó ar dee d’al rɔ dee d’wɔji ne dɔm el!
25Maji kar dee pa gə meḛ dee pana:
Oiyo, né gə́ neḛ ndigije ɓa nee ya!
Ma lé neḛ n’urumje mee neḛje’g magə mba̰,
Maji kar dee pa bèe el tɔ.
26Maji kar deḛ lai gə́ d’al rɔ dee dɔ nékəmndoo’g ləm lé
Nai gə rɔkul ya!
Maji kar deḛ gə́ d’ḭ səm kara
Rɔkul-boo dəb dɔ dee’g bigim to!
27Deḛ lai gə́ d’al rɔ dee mbata ta wa dɔm el lé
Maji kar dee d’iŋga rɔlel gə boo-rɔkal ləm,
Maji kar dee pa lal kila ta dee naŋg pana:
Maji kula rɔnduba dɔ Njesigənea̰’d
Gə́ ndigi kar kura ləa si dan meelɔm’g lé.
28M’a kɔs gaji meekarabasur ləi ləm,
M’a pidii gə ndɔm-ndɔm ya ləm tɔ.
Currently Selected:
Pakɔsje 35: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
