Pakɔsje 34
34
Njesigənea̰ ɔrm dan néɓəlje’g lai ya
1Pa lə Dabid loo gə́ yeḛ ra ne rəa gə́ m#1Sam 21.14-16 bə no̰ Abimelek’g aree tubá ne lé.
2M’a kunda no̰ dɔkaisəgərə lə Njesigənea̰ ta-ta ləm,
Ta pidee a koji na̰ tam’g dḛ̀gè-dḛ̀gè ləm tɔ.
3Maji kar Njesigənea̰ ɓa m’nduba ne rɔm ká ləm,
Maji kar njénékəmndooje d’oo ndá ra ne rɔlel ləm tɔ!
4Maji kar sí ɔsje səm gaji Njesigənea̰!
Maji kar síjeḛ lai j’ilaje riɓar dɔ ria’g to!
5Ma m’ndolè goo Njesigənea̰ ndá
Yeḛ tel ilam keneŋ,
Yeḛ ɔrm dan boo-néɓelje’g ləm lai ya.
6Loo gə́ dəw tel kəmee par gə́ rəa’g ndá
Kəmee ndɔḭ wər-wər gə rɔlel
Ɓó rɔkul wa kəmee el.
7Loo gə́ njenékəmndoo no̰ wəl ndá
Njesigənea̰ oo ndia ya
Tɔɓəi yeḛ ɔree ne dan néurtije’g ləa lai.
8Kura lə Njesigənea̰ gə́ dara ula ŋgalaŋ gugu ne dɔ deḛ gə́ ɓəlee,
Yeḛ ɔr dee ne dan tuji’g.
9Naaje ooje to gə́ meemaji lə Njesigənea̰ lé al dɔ loo!
Dəw gə́ saŋg loo kula dəa rəa’g ndá
Rɔlel nai səa ya#1Pi 2.3!
10Tədje kag Njesigənea̰,
Seḭ gə́ yeḛ ɔr sí unda sí gə kəmee lé!
Mbata né kára kara a lal deḛ gə́ ɓəlee lé el.
11Ŋgan toboḭje lé
Ɓó ra dee ləm, lab ɔr dee ləm tɔ,
Nɛ deḛ gə́ ndolè goo Njesigənea̰ lé
Némaji kára kara lal dee nda̰ el.
12Ŋganəmje, maji kar sí reeje ooje ta ləm,
Ma lé m’a ndoo sí loo ɓəl Njesigənea̰.
13See dəw gə́ ra ɓa ndigi si gə kəmə lé ləm,
Ndigi kiŋga ndɔje gə́ raŋg kɔm dɔ maree’g gə mba karee al ne rəa ləm tɔ wa#1Pi 3.10-12.
14Maji kari ɔg ndɔḭ dɔ ta gə́ majel’g ləm.
Maji kari ɔg tai dɔ taje gə́ ka̰ su kəm loo’g lé ləm tɔ.
15Maji kari unda rɔi ɓad dɔ néra gə́ majel’g ndá
Ra né gə́ maji ləm,
Maji kari saŋg meelɔm ai ne məəi sam-sam keneŋ ləm tɔ.
16Kəm Njesigənea̰ lé to dɔ njémeekarabasurje’g ya,
Mbia kara to tag gə mba koo ne ndu no̰ lə dee tɔ.
17Njesigənea̰ lé kəmee tel wagəsa dɔ njémeeyèrje’g
Gə mba kar ri dee udu bo̰ dɔ naŋg nee.
18Loo gə́ njémeekarabasurje no̰ wəl ndá
Njesigənea̰ oo ndu dee ya,
Yeḛ ɔr dee ne dan néurtije’g lə deḛ lai.
19Njesigənea̰ aar mbɔr deḛ gə́ ɓəŋgərə dee ti dus’g lé
Yeḛ aji deḛ gə́ ndil dee unda bala tigi-tigi lé tɔ.
20Némeeko̰je bula teḛ dɔ njemeekarabasur’g ya,
Nɛ Njesigənea̰ ɔree keneŋ ta-ta tɔ.
21Yeḛ tɔs kəmee dɔ sḭgareaje’g lai ndá
Siŋgarea kára kara a təd el#Ja̰ 19.36.
22Némeeko̰ tɔl njemeeyèr ləm,
Njéba̰je lə njemeekarabasur lé
Bo̰ néra dee ɔs ta dee’g bɔsɔrɔ ya ləm tɔ.
23Njesigənea̰ aji kuraje ləa,
Deḛ lai gə́ d’ula dɔ dee rəa’g ndá
Ta kára kara wa dɔ dee el.
Currently Selected:
Pakɔsje 34: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
