Pakɔsje 33
33
Pa pidi Ala gə́ Njekunda néje lai lé
1Seḭ njémeekarabasurje lé
Maji kar sí alje rɔ sí gin Njesigənea̰’g!
Pa pidi lé to wɔji dɔ njéra nédanaje ya.
2Maji kar sí pidije Njesigənea̰ gə kṵdu-kag ləm,
Pideeje gə kṵdu-ko̰dè gə́ kulá dɔg ləm tɔ.
3Maji kar sí ɔsje pa gə́ sigi areeje ya!
Imje nékimje lə sí ləm,
Ɔrje ndu sí gə́ tar ləm tɔ!
4Mbata ta lə Njesigənea̰ lé
To gə goo rəbee sur ləm,
Kula reaje lai aw lé béréré
Gə goo meenda ləa ləm tɔ.
5Meekarabasur gə néra gə́ danasur lé
Yeḛ unda dee dan kəmee’g,
Meemaji lə Njesigənea̰ lé
Taa dɔ naŋg nee yal-yal tɔ.
6Ta gə́ teḛ ta Njesigənea̰’g lé
Yeḛ unda ne dara ləm,
Kṵji təa gə́ tó ne loo pu lé
Yeḛ unda ne boo-néje gə́ mee dara’g ya ləm tɔ.
7Baa-boo-kad lé
Yeḛ daa manee dɔ na̰’d na̰’d ləm,
Ɓul manje lé
Yeḛ ŋgəm dee ɓuleeje’g ləm tɔ.
8Maji kar naŋg nee lai-lai ɓəl Njesigənea̰!
Dəwje lai gə́ d’isi keneŋ kara
Maji kar dee ndəb pəd-pəd nea̰’g tɔ.
9Mbata yeḛ pata ndá
Née teḛ gə torndia ya ləm,
Yeḛ un ndia ndá
Née to keneŋ bèe ya ləm tɔ.
10Néje gə́ ginkoji dəwje gə raŋg d’wɔji meḛ dee’g gə mba ra lé
Njesigənea̰ wá telee wagəsa ləm,
Néje gə́ koso-dəwje d’wɔji-kwɔji ra lé
Yeḛ aree udu bo̰ ləm tɔ.
11Néje gə́ Njesigənea̰ wɔji mée’g gə mba ra lé
To saar gə no̰ ləm,
Néje gə́ yeḛ wɔji-kwɔji ra lé
Yeḛ ra mbata lə njéboakojije lə na̰ gə goo na̰ goo na̰ ya ləm tɔ.
12Ginkoji dəwje gə́ Njesigənea̰ to Ala lə dee lé
D’isi dan rɔlel’g ya,
Koso-dəwje gə́ yeḛ ɔr dee unda dee gə kəmee gə́ nédɔji ləa lé
Rɔ dee lel dee tɔ.
13Njesigənea̰ lé si mee dara gə́ tar
Aa loo oo ne dəwje lai.
14Loo-siée gə́ tar nu lé
Yeḛ tən ne dəwje lai gə́ d’isi dɔ naŋg nee.
15Yeḛ nja to njekunda ɓəŋgərə deḛ lai,
Yeḛ si gèŋ oo ne kula ra deeje lai ya.
16Kudu boo-njérɔje ɓa d’askəm kaji mbai lé el ləm,
Boo-siŋgamoŋ lé kara as kɔr bao-rɔ kilá tar el ləm tɔ.
17Kunda lé siŋgá as mba kaji dəw el ləm,
Siŋgamoŋ ləa kara askəm təa el ləm tɔ.
18Aa ooje, kəm Njesigənea̰ lé
To dɔ deḛ gə́ ɓəlee’g
Gə́ d’unda meḛ dee yel dɔ meemaji’g ləa
19Gə mba kɔr dee ne ta yoo’g ləm,
Gə mba kar dee d’isi ne kəmba dan ɓoo-boo’g ləm tɔ.
20Jeḛ j’unda meḛ sí yel gə́ dɔ Njesigənea̰’g,
Yeḛ lé to njela sə sí ləm, gə dər gel sí ləm tɔ.
21Mbɔl dəa ɓa meḛ sí lel sí ne
Mbata j’ɔm meḛ sí dɔ ria gə́ to gə kəmee ɓəd’g.
22Njesigənea̰, maji kar noji ləi nai sə sí
Mbata jeḛ j’unda meḛ sí yel gə́ dɔi-i’g ya.
Currently Selected:
Pakɔsje 33: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
