Gosota-Kəmkàrje 12
12
1Yeḛ gə́ ndigi kar dee d’wɔjee kəmkàr lé
Ndigi gər gin né ya,
Nɛ yeḛ gə́ ə̰ji ta gə́ pa səa bəḭ-bəḭ lé
Yeḛ gər né el.
2Dəw gə́ maji lé
Taa kəm Njesigənea̰ rəgm,
Nɛ dəw gə́ wɔji-kwɔji ra né gə́ majel mée’g lé
Njesigənea̰ ila ta dəa’g ya.
3Néra gə́ majel a kar dəw aar ne njaŋg el,
Nɛ ŋgira njémeekarabasurje a yə el.
4Dené gə́ njemeemaji lé
To dɔgugu lə ŋgabeeje,
Nɛ yeḛ gə́ ila rɔkul dɔ loo’g lé
To asəna gə kuru gə́ sɔ siŋga rɔ ŋgabeeje bèe.
5Takə̰ji lə njémeekarabasurje lé
To né gə́ to gə dɔ najee ya goo kára ba,
Né gə́ njémeeyèrje d’wɔji-kwɔji ra lé
To né gə́ su kəm loo ya goo kára ba tɔ.
6Tapa njémeeyèrje lé
To né kum loo mba kila məs naŋg,
Nɛ ta njéra nédanaje lé
Taa dee ta yoo’g ɔm dee tar.
7Tɔs njémeeyèrje tila dee ndá d’a godo,
Nɛ kəi lə njémeekarabasurje nai tar.
8Dəw lé iŋga pidi gə goo gosonégər ləa,
Nɛ dəw gə́ mée aw kori-kori lé tel to nékunda kḭdi.
9Kar dee d’ooi gə́ né el
Nɛ kura ləi si gən lé
Maji unda ti rɔi lal muru.
10Njemeekarabasur lé
Tɔs kəmee bao-bao dɔ nékulje’g ləa,
Nɛ njémeeyèrje lé
Ra né gə́ bɔsɔsɔ.
11Yeḛ gə́ ndɔ ndɔ ləa lé
Muru asee nag-nag,
Nɛ yeḛ gə́ ndolè goo néje gə́ gə mḭdé ba lé
Kəmkàr na mée tas.
12Njemeeyèr lé kəmee əḭ dɔ né mee gum’g lə njémeeyèrje,
Nɛ kaar njaŋg lə njémeekarabasurje lé
Ar dee d’andə gə kandə dee njim-njim.
13Njemeeyèr lé
Ta meeyèr gə́ teḛ təa’g ɓa wá gə gum,
Nɛ njemeekarabasur lé
A kaskəm kɔr rəa dan néurtije’g ya.
14Gə goo ta gə́ teḛ təa’g ɓa
Dəw iŋga ne némajije gə́ asee nag-nag,
Né kuga dɔ ji kara
Dəw iŋga gə goo kula gə́ jia ɓa ra tɔ.
15Rəw-kaw mbə-dəw lé
To danasur kəmee-yeḛ’g ya,
Nɛ yeḛ gə́ taa takwɔji-kəmkàr lé
To dəw gə́ kəmee àr.
16Mbə-dəw lé
Riba dɔ oŋg ləa gə́ léegəneeya,
Nɛ yeḛ gə́ ɔm kam dɔ boo-rɔkul’g lé
To dəw gə́ unda kəmkàr dɔ rəa’g.
17Yeḛ gə́ pa kankəmta lé
Riba ne dɔ néra gə́ gə dɔ najee,
Nɛ njegaŋgta lé
Riba ne dɔ ta sukəmloo.
18Dəw gə́ pata gə́ gə mḭdé ba lé
Ar dəw doo to gə́ kiambas bèe,
Nɛ ndo̰ njékəmkàrje lé
Ar doo lé ər kəmsə.
19Kankəmta gə́ pa njaŋg lé to gə no̰,
Nɛ taŋgɔm lé kuree əw waga ba.
20Su kəm loo to dɔɓəŋgərə dee-deḛ
Gə́ la̰ji tor néra gə́ majel meḛ dee’g,
Nɛ rɔlel nai gə dee
Gə́ gɔl mar deeje d’ɔm dee na̰’d.
21Némajel kára kara teḛ dɔ njemeekarabasur’g el,
Nɛ njémeeyèrje lé némajelje tur dɔ dee’g pubug.
22Taŋgɔmje gə́ teḛ ta dəw’g lé
To né gə́ mina̰ kəm Njesigənea̰’g,
Nɛ deḛ gə́ ra né gə goo kankəmta lé
Taa kəmee rəgm.
23Dəw gə́ unda kəmkàr dɔ rəa’g lé
Lɔm dɔ négər gə́ lɔm,
Nɛ meḛ mbəje lé
Riba dɔ némbə lə dee gə́ raga.
24Ji dəwje gə́ rɔ dee wɔilɔ pélé-pélé loo kula’g lé
Ar dee d’o̰ ne loo,
Nɛ ji dəw gə́ ra kula gə rɔkas lé
Aree si ne dan ɓər’g.
25Mee-to-kəgəgə lə dəw lé ɔr siŋgá ho̰d,
Nɛ ta gə́ maji ɓa ar rəa lelee.
26Njemeekarabasur lé
Tɔji kuramaree rəw gə́ maji,
Nɛ rəw-kaw njémeeyèrje lé
Ur dee walá.
27Njedab nuŋga da ndo̰ ləa el,
Nɛ né gə́ maji dum lə dəw lé
Ra kula ɓa gə́ nébao ya.
28Kəmə lé to kila-rəw’g lə néra gə́ gə dɔ najee,
Rəw neelé to rəw gə́ yoo godo keneŋ.
Ngambai Bible © Alliance Biblique du Tchad 1989, 2015.