Gosota-Kəmkàrje 13
13
1Ŋgon gə́ kəmee àr lé taa tandoo lə bɔbeeje,
Nɛ njebeelé lé taa ta gə́ pa ne səa nda̰ el.
2Gə goo ta gə́ teḛ təa’g lé
Dəw iŋga ne né gə́ maji,
Nɛ né gə́ majikojije el ndiŋga lé
To néra gə́ kərm-kərm.
3Yeḛ gə́ aa dɔ tapeaje ndá
Ŋgəm kankəmrea,
Yeḛ gə́ pata lal kḛji gelee lé
Aḭ gə́ loo tuji’g.
4Dəw gə́ njedab ndiŋga néje
Gə́ yeḛ askəm kiŋga el,
Nɛ dəwje gə́ rɔ dee wɔilɔ loo kula’g lé
D’a kiŋga né gə́ as dee nag-nag.
5Dəw gə́ njemeekarabasur lé
Ǝ̰ji taŋgɔm bəḭ-bəḭ,
Nɛ dəw gə́ njemeeyèr tel to to kḛji,
Ila ne rɔkul dɔ rəa’g.
6Néra gə́ gə dɔ najee
Ŋgəm yeḛ gə́ rəw-kabee to gə goo rəbee,
Nɛ néra majel lé
To gin tuji lə njekaiya.
7Ndai gə́ bèe ra rəa gə́ bao
Nɛ né kára ya kara godo jia’g,
Yeḛ gə́ raŋg ra rəa gə́ njéndoo
Nɛ néje ləa to yaa̰.
8Nébao lə dəw tel to nékoga dɔ rəa,
Nɛ njendoo lé
Oo né kára gə́ d’a kaw ne səa gə́ tar el.
9Néndogó lə njémeekarabasurje lé to rɔlel,
Nɛ pərndɔ lə njémeeyèrje wəi misi.
10Beelé ɓa ar dəw ɔs ne gel takɔl,
Nɛ kəmkàr nai gə deḛ
Gə́ d’oo takwɔji-kəmkàrje gə́ né ya.
11Nébao gə́ kiŋga kalaŋ gə goo rəbee el lé
Tel rəm gə́ rəm,
Nɛ né gə́ dəw iŋga lam-lam ba lé
Ḭ dɔ maree’d gə́ kédé-kédé.
12Nékunda-mee-yel gə́ tila gə́ tila lé
Mbiri wur dəw gə́ mbiri,
Nɛ néndiŋga gə́ dəw iŋga mba̰ lé
To asəna gə kag-kəmə.
13Yeḛ gə́ oo ta gə́ né el lé
Tuji rəa,
Nɛ yeḛ gə́ ɓəl godndu lé
A kiŋga nédɔjia.
14Néndoo lə njekəmkàr to ŋgira mán kəmə,
Mba karee ga̰ ne dɔ gumje lə yoo.
15Takə̰ji gə́ maji lé ree gə meenoji,
Nɛ rəw-kaw majikoji elje lé moŋg kaŋ.
16Njékəmkàr lé ə̰ji ta ɓa ra né ɓəi,
Nɛ mbə lé ar némbəje ləa ɔs dɔ na̰ dɔ na̰.
17Njekaḭkula gə́ to njemeeyèr lé
Oso dan némajel’g,
Nɛ njekaḭkula gə́ to majikoji lé
Ree gə ta gə́ ka̰ si gə́ majee.
18Ndoo gə rɔkul to né ka̰
Yeḛ gə́ mbad taa kəmkàr gə́ d’wɔjee,
Nɛ yeḛ gə́ oo ta gə́ pa səa gə́ né lé
Iŋga ne riɓar.
19Néndiŋga gə́ dəw iŋga mba̰ lé
Ar rəa kul ne lɔm,
Nɛ kunda rɔ ɓad dɔ majel’g lé
To né gə́ mina̰ kəm mbəje’g.
20Yeḛ gə́ ɔr kura gə njékəmkàrje lé
Tel to njekəmkàr tɔ,
Nɛ yeḛ gə́ to njeboalookaw lə mbəje lé
Iŋga némajel keneŋ.
21Némeeko̰ ndolè goo deḛ gə́ ra kaiya,
Nɛ némeemaji to nékoga-dɔ-ji njémeekarabasurje.
22Dəw gə́ njemeemaji lé
Nénduba ləa to mbata ŋgan meḛ ŋganeeje,
Nɛ nébaoje lə njekaiya lé
D’unda kul mbata lə njemeekarabasur.
23Loo ndɔ gə́ njendoo ɔs gə́ budu lé
Ar nésɔ to yaa̰,
Nɛ loo gə́ na̰je tuji
Mbata néra gə́ gə dɔ najee godo keneŋ.
24Yeḛ gə́ ndigi kunda ŋgonee el lé
Ǝ̰jee bəḭ-bəḭ,
Nɛ yeḛ gə́ undá dan kəmee’g lé
Saŋg loo mba kwɔjee kəmkàr.
25Njemeekarabasur sɔ né
Aree as loo-ɓoo ləa ta-ta,
Nɛ njemeeyèr lé
Nésɔ lal mée ta-ta ya.
Ngambai Bible © Alliance Biblique du Tchad 1989, 2015.