Gosota-Kəmkàrje 11
11
1Nékwɔji-né gə́ ŋgɔm to né gə́ mina̰ kəm Njesigənea̰’g,
Nɛ kwɔi lə né gə́ gə goo rəbee taa kəmee rəgm.
2Loo gə́ beelé ree ndá boo-rɔkul ree tɔ,
Nɛ kəmkàr nai gə njékula dɔ deeje.
3Néra gə́ gə goo rəbee lé
Ɔr no̰ njéranédanasurje,
Nɛ néra kori-kori lə majikojije eljeje lé
Tel to tuji lə dee.
4Ndɔ meekḭ jugugu lé
Nébao a tel to né gə́ kari ba,
Nɛ néra gə́ gə dɔ najee ɓa
Ɔr dəw ta yoo’g.
5Néra gə́ gə dɔ najee lə dəw
Gə́ ra né gə goo rəbee lé
Gɔl rəw-kabee aree asəna rai-rai,
Nɛ njemeeyèr lé meeyèr ləa ɓa aree tuji ne.
6Néra gə́ gə dɔ najee lə njera nédanasur lé
Ɔr ta dəa’g,
Nɛ deḛ gə́ to majikojije el lé
Mal néje gə́ ra dee lé tel to gum wa dee.
7Loo gə́ njemeeyèr wəi ndá
Né meekundayel ləa tuji pugudu,
Tɔɓəi né ŋgina lə njéra nékori-korije lé
Unda naŋg ndəs tɔ.
8Njemeekarabasur lé teḛ ta nékəmndoo’g
Ndá njemeeyèr ɓa taa toree oso keneŋ.
9Dəw gə́ mée joo lé təa tuji njeboatakəi ləa,
Nɛ njémeekarabasurje lé gər gin né lə dee ɓa ɔr ta dɔ dee’g.
10Loo gə́ njémeekarabasurje d’isi dan rɔlel’g ndá
Ɓee-boo al ne rəa,
Nɛ loo gə́ njémeeyèrje tuji ndá
Dəwje d’ɔr ndu dee gə́ tar wəl gə rɔlel,
11Ndutɔr lə dəwje gə́ danasur lé
Un ɓee-boo lé undá tar,
Nɛ ta njémeeyèrje lé aree oso gə́ koso.
12Yeḛ gə́ ə̰ji njeboatakəi ləa bəḭ-bəḭ lé
Kəmkàr na mée tas,
Nɛ dəw gə́ to njegosonégər lé
Si gə təa gə́ mundu.
13Yeḛ gə́ təd ta unda ta maree’g lé
Riba ne dɔ taje gə́ to loo-kiya’g,
Nɛ yeḛ gə́ to baokura gə́ gəd lé
Ŋgəm taje nee mée’g.
14Loo gə́ njekɔrno̰ dəwje gə goo rəbee godo ndá
Koso-dəwje d’oso,
Tɔɓəi mbɔl dɔ bula lə njékwɔji ta kəmkàrje ɓa
Meelɔm to ne.
15Yeḛ gə́ ɔs né naŋg taa ne mba lé
Iŋga némeeko̰,
Nɛ yeḛ gə́ ɓəl kɔs né naŋg bèe lé
A si ne lɔm.
16Dené gə́ njemeemaji lé
Iŋga rɔnduba ləm,
Deḛ gə́ siŋga dee to lé
D’iŋga nébao ləm tɔ.
17Dəw gə́ njemeemaji lé
Ra gə rəa-yeḛ ya meemaji,
Nɛ dəw gə́ njera né gə́ bɔsɔsɔ lé
Ula kəm rəa-yeḛ ya ndòo.
18Njemeeyèr lé iŋga nédɔjia gə́ ŋgɔm,
Nɛ yeḛ gə́ dubu néra gə́ gə dɔ najee ndá
Yeḛ iŋga nékoga dɔ jia gə́ gəd.
19Togə́bè ɓa néra gə́ gə dɔ najee
Teḛ səi dɔ kəmə’g,
Nɛ yeḛ gə́ ndolè goo majel ndá
A teḛ ne dɔ yoo’g.
20Deḛ gə́ meḛ dee to kori-kori lé
To kḛji kəm Njesigənea̰’g,
Nɛ deḛ gə́ rəw-kaw dee to gə goo rəbee lé
Taa kəmee rəgm.
21Tɔgərɔ ya, njemeeyèr lé
Si lal kar bo̰ nérea ɔs təa’g el,
Nɛ ŋgaka njémeekarabasurje lé
D’a kɔr ta dɔ dee’g.
22Dené gə́ ma̰də yaa̰ gə́ kəmkàr na mée tas lé
To asəna gə ŋgama larlɔr gə́ to əm bər’g bèe.
23Né gə́ njémeekarabasurje ndiŋga lé
To némaji ya kára ba,
Nḛ́gina lə njémeeyèrje lé
To gə́ meekḭ jugugu ɓa.
24Dəw gə́ naa gə́ un né ar pə-pə
To gə́ mée ndigi lé
Tel to bao unda nje gə́ kédé.
Dəw gə́ naa gə́ jia tɔ gaa-gaa lé
Ndoo ya ɓa gə́ né kea̰ tɔ.
25Dəw gə́ njera meemaji gə́ kédé-kédé lé
Né a kasee nag-nag,
Tɔɓəi yeḛ gə́ tɔl kṵdaman gə́ ra maree lé
D’a tɔl kṵdaman ləa-yeḛ tɔ.
26Yeḛ gə́ ɔg kó lé
Koso-dəwje d’ila ndɔl dəa’g,
Nɛ ndutɔr nai gə yeḛ gə́ ar dee ndogo səa.
27Yeḛ gə́ saŋg loo ra né gə́ maji lé
Maji ɓa tel iŋga ya,
Nɛ yeḛ gə́ ndolè goo majel ndá
Majel ɓa teḛ dəa’g tɔ.
28Yeḛ gə́ ɔm mée dɔ nébaoje’g ləa ndá
A koso,
Nɛ njémeekarabasurje lé
D’a kidi to gə́ kam gə́ idi bèe.
29Dəw gə́ ula njémeekəije ləa ndubu ndá
Lel ɓa to nénduba ləa,
Tɔɓəi mbə-dəw tel to ɓər lə njekəmkàr tɔ.
30Kandə njemeekarabasur lé
To kag-kəmə ləm,
Njekəmkàr lé
Taa dɔ dəwje gə́ taa ləm tɔ.
31Aa oo, njemeekarabasur lé
Iŋga nékoga-dɔ-jia dɔ naŋg nee ya,
Njemeeyèr gə njekaiya lé kara
D’a kiŋga ka̰ dee-deḛ gə́ wɔji dɔ dee ya tɔ#1Pi 4.18.
Ngambai Bible © Alliance Biblique du Tchad 1989, 2015.