Misee 3
3
Ta gə́ wa dɔ njékɔrno̰ Israɛlje
1Ma m’pana: Ooje ta nee, seḭ mbai dɔ ŋgaka Jakobje lé
Seḭ njéko̰ɓeeje gə́ Israɛl!
See to ta lə sí-seḭ ya
Gə mba kar sí gərje né gə́ gə dɔ najee lé el wa.
2Seḭ ə̰jije néra gə́ maji lé bəḭ-bəḭ
Ndá né gə́ majel ɓa seḭ ndigije,
Seḭ tusuje ndar dəwje ləm,
Seḭ tɔrje dakasrɔ dee dɔ siŋga dee’g ləm tɔ.
3Deḛ d’usɔ dakasrɔ koso-dəwje ləm ləm,
Deḛ tusu ndar dee ləm,
Deḛ təd siŋga dee ləma,
Deḛ gaŋg dee dana ɗuguru-ɗuguru
To gə́ naḭ gə́ ndiri mee ŋgoro’g bèe ləm
To gə́ da gə́ d’ɔb gə əb bèe ləm tɔ.
4Yen ŋga d’a no̰ wəl gə́ rɔ Njesigənea̰’g,
Nɛ yeḛ a kila dee keneŋ el.
Mee ndəa’g neelé yeḛ a kiya rəa kəm dee’g
Mbata néraje lə dee gə́ to kḛji lé.
Kaiya ra njéteggintaje
5Ta gə́ Njesigənea̰ pa
Dɔ njéteggintaje gə́ d’ar koso-dəwje lə neḛ ndəm lé ɓa nee:
Loo gə́ nésɔ to ŋgaŋ dee’g mba kar deḛ to̰ ndá
D’ila mber meekulɔm
Nɛ loo gə́ nésɔ godo ta dee’g ndá
Mber rɔ ɓa d’ila tɔ.
6Gelee gə́ nee ɓa seḭ a síje ne dan loondul’g
Ɓó a kooje némḭdije el!
Seḭ a síje dan loondul gə́ ndul njudu-njudu’g
Ɓó a kooje ndərtaje gə́ wɔji dɔ Njesigənea̰ el!
Lookàr a tel to loondul dɔ njéteggintaje’g neelé
Asəna gə kàr gə́ ur naŋg bèe.
7Rɔkul a dəb dɔ njénékooje’g gə dɔ njésaŋ ndilje’g ləm,
Deḛ lai d’a si gogəro gə rɔkul ləm tɔ
Mbata Ala a gə kila dee ta’g el.
8Nɛ ma lé gə goo ndil Njesigənea̰ ndá
Siŋgam to kɔgərɔ-kɔgərɔ,
Néra gə́ gə dɔ najee gə siŋgamoŋ taa rɔm pəl-pəl
Gə mba karm m’riba ne dɔ néramajel lə Jakobje ləm,
Gə kaiya ra Israɛlje ləm tɔ.
Mise pata tuji gə́ a gə teḛ dɔ Jerusalem’g lé
9Ooje ta nee ɓa,
Seḭ mbai dɔ ŋgaka Jakobje ləm,
Seḭ njéko̰ɓeeje gə́ Israɛl ləm tɔ lé
Seḭ gə́ ə̰jije néra gə́ gə dɔ najee bəḭ-bəḭ ləm,
Gə arje né gə́ danasur tel to né gə́ ndɔji pɔdɔdɔ ləm tɔ.
10Seḭ gə́ tumje gin ɓee gə́ Sio̰ gə məs ləm,
Gə Jerusalem gə néra gə́ kori-kori ləm tɔ!
11Njégaŋ-rəwtaje lə dee gaŋg rəwta
Mbata lə néndogo-gel ləm,
Njékinjanéməsje lə dee ndoo dəwje né
Mbata ne k’uga dɔ ji dee ləma,
Njéteggintaje lə dee pata néje gə́ d’a gə ree
Taa ne lar ləm tɔ.
Deḛ nduna rɔ dee rɔ Njesigənea̰’g pa ne pana:
See Njesigənea̰ si mbuna neḛje’g el wa.
Némeeko̰ kára kara a tibi mbɔr neḛje el.
12Gelee gə́ nee ɓa gə mbata lə sí-seḭ lé ɓa
Sio̰ a tel to gə́ loo-ndɔ
Gə́ ndɔ bur-bur ləm,
Jerusalem a tel to kɔr mbalje
Gə́ tɔs dɔ na̰’d ləma,
Dɔ mbal gə́ wɔji dɔ kəi gə́ to gə kəmee lé
Semee a tel to ne mee kag-kɔr ləm tɔ .
Currently Selected:
Misee 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.