Matiyo 26
26
Deḛ d’o̰ juma̰ mba tɔl Jeju lé
Mar 14.1-2, Lug 22.1-2, Ja̰ 11.45-53
1Loo gə́ Jeju ndoo dee ta neelé aree as lée’g béréré mba̰ ndá yeḛ ula njékwakiláje pana: 2Seḭ gərje gao, nai ndɔ joo ba mba kar dee ra naḭ Pag, ndəa neelé d’a kula Ŋgon-dəw ji dee’g mba kar dee ɗaree kaar kag’d .
3Yen ŋga mbai dɔ njékinjanéməsje-je gə ŋgatɔgje lə dəwje mbo̰ dɔ na̰ dan mee ndògo’d lə ŋgɔ-njekinjanéməs gə́ ria lə Kayipə. 4Deḛ d’ula njuma̰ meḛ na̰’d saŋg goso kwa Jeju karee udu bo̰. 5Nɛ deḛ pana: Maji ra ndɔ naḭ’g el, nà njé gə́ na̰je gə́ mbuna koso-dəwje’g d’a kḭ kuru kó goo neḛje’g wəl-wəl.
Dené tər ubu dɔ Jeju’g
Mar 14.3-9, Ja̰ 12.1-8
6Loo gə́ Jeju nai Betani kəi lə Simo̰ gə́ njeba̰ji lé 7ndá dené kára bèe rəm pər gə́ rɔ Jeju’g gə ŋgoro-ubu gə́ ra gə jər gə́ ria lə albatrə lé jia’g, ubu neelé ə̰də sululu gadee al dɔ loo sula. Loo gə́ deḛ d’isi ta ka-nésɔ’g ndá yeḛ tər ubu lé dɔ Jeju’g . 8Loo gə́ njékwakiláje d’oo ndá meḛ dee ḭ sə dee pu ar dee pana: See ɗi ɓa ɔm ubu gə́ ə̰də sululu neelé kɔ gə mbəa bèe wa. 9Ubu gə́ ə̰də sululu neelé d’a kwɔji gadee yaa̰ gə mba ndogo kya̰ laree kar njéndooje ɓa maji.
10Jeju oo tapa dee lé ndá ila dee keneŋ pana: See ban ɓa seḭ aarje gə dené lé gad-gad bèe wa. Né gə́ yeḛ ra lé ma m’oo gə́ né gə́ maji kəm’g ya. 11Mbata njéndooje lé deḛ nai sə sí gə ndɔ dee ndɔ dee, nɛ ma lé m’a si sə sí gə ndɔm-ndɔm el . 12Ubu gə́ yeḛ tər dɔm’g lé tər dɔm’g mba kar dee dubum ne. 13Ma m’ula sí təsərə, loo gə́ rara gə́ dɔ naŋg nee gə́ d’a gə kila mber tagə́maji keneŋ lé ndá d’a kɔr sor né gə́ dené ra səm neelé mba kar meḛ dee olé ne dəa’g ya.
Judas ndigi kula Jeju ji mbai dɔ njékinjanéməsje-je’g
Mar 14.10-11, Lug 22.3-6
14Yen ŋga, Judas Iskariot gə́ njekɔm dee gə́ dɔg-gir-dee-joo lé aw rɔ mbai dɔ njékinjanéməsje-je’g 15dəji dee pana: See ɗi ɓa seḭ a kamje mba karm m’ula ne Jeju ji sí’g wa.
Ndá deḛ tura larnda as rɔ-munda d’ɔm jia’g . 16Yen ŋga, yeḛ un kudu saŋg loo mba kula ne Jeju ji dee’g.
Jeju sɔ né Pag gə njékwakiláje
Mar 14.12-21, Lug 22.7-14,21-23, Ja̰ 13.21-30
17Ndɔ gə́ doŋgɔr gə́ deḛ ra naḭ d’wɔji ne dɔ muru gə́ nétiee godo keneŋ ndá njékwakila Jejuje rəm wɔr gə́ rəa’g dəjee pana: See loo gə́ ra ɓa i ndigi kar sí n’gɔl néra Pag lé keneŋ wa.
18Yeḛ ila dee keneŋ pana: Ɔd awje mee ɓee-boo’g kəi lə dəw kára bèe, ulaje pajena: Mbai pana: ndɔ neḛ nai dəb ba ŋga, kəi ləi ɓa neḛ gə njékwakila neḛje n’a raje Pag keneŋ.
19Njékwakila Jejuje ra to gə́ yeḛ un ne ndia ar dee lé ya tɔ ndá deḛ gɔl dɔ néra Pag lé gɔl-gɔl.
20Loo gə́ kàr andə mba̰ ndá yeḛ gə njékwakiláje gə́ dɔg-gir-dee-joo lé d’wa dɔ na̰ ta ka-nésɔ’g. 21Loo gə́ d’isi ta nésɔ’g ndá yeḛ un tapa pana: Ma m’ula sí təsərə, dəw kára mbuna sí’g a gə kun dɔm.
22Meḛ dee aw biriri-biriri ar nana kara ḭ dəjee pana: Mbai, see’d ma ya wa.
23Jeju ila dee keneŋ pana: Yeḛ gə́ ula jia səm mee ka-nésɔ’g lé yeḛ neelé nja ɓa gə́ njekun dɔm ya . 24Ŋgon-dəw lé a kɔd kuru kaw to gə́ deḛ ndaŋg ne taree mee maktub’g d’wɔji ne dəa lé ya. Nɛ meeko̰ a nai dɔ dəw gə́ njekun dɔ Ŋgon-dəw’g lé. Dəw neelé d’ojee el kara maji ya.
25Judas gə́ njekun dəa lé pana: Mbai, see to gə́ ma əsé nawa.
Jeju tel ilá keneŋ pana: Yee nja pa tai gən ndá.
D’ɔm na̰’d sad dɔ muru’g lə Mbaidɔmbaije
Mar 14.22-26, Lug 22.15-20, 1Kɔr 11.23-25
26Loo gə́ d’isi d’aw d’o̰ muru bèe-bèe ndá Jeju un pil muru, yeḛ ra Ala lé oiyo ɓa wa gaji dana ar njékwakiláje pana: Taaje, sɔje mbata yee neelé to gə́ darɔm.
27Tɔɓəi yeḛ un ŋgo-kai-mán gə́ mán-nduú keneŋ, yeḛ ra Ala oiyo ɓa yeḛ ar dee pana: Taaje umje surum-surum, 28mbata yee neelé to məsm, yee to məs manrɔ gə́ ula dɔ naŋg nee mbata lə dəwje bula-bula gə nékoga kaiyaje tɔ . 29Ma m’ula sí njai, ma lé m’a kai mán-nduú neelé gogo el ŋga saar m’a kai nje gə́ sigi sə sí na̰’d mee ɓeeko̰’g lə Bɔm.
30Loo gə́ d’ɔs pa pidi ne Ala lé mba̰ ndá d’unda loo teḛ d’isi d’aw gə́ dɔ mbal gə́ ria lə Koiyoje.
Jeju pata maḭ gə́ Piɛrə a maḭta gər Jeju
Mar 14.27-31, Lug 22.31-34, Ja̰ 13.36-38
31Yen ŋga Jeju ula dee pana: Mee til’g neelé né gə́ a gə ram lé a kila sí kag lai, to gə́ maktub lé pana: M’a kunda njekulbadje ndá badə-kosoje lai d’a kaḭ sanéna̰ kad-kad . 32Nɛ loo gə́ gogo gə́ m’a kunda loo-yoo teḛ lé ndá m’a kiŋga sí Galile ya .
33Piɛrə un ta ulá pana: Lé né gə́ a gə rai lé a kila dəwje lai kag kara ma lé a kilam kag nda̰ el.
34Jeju tel ilá keneŋ pana: Ma m’ulai təsərə, mee til’g neelé ya, i a maḭ dɔ rɔi dɔm’g gɔl munda ɓa kona a no̰ ɓəi.
35Piɛrə ulá pana: Lé gə́ kwəi kara m’a kwəi səi na̰’d ya ɓó m’a maḭ dɔ rɔm dɔi’g el.
Njékwakiláje lai kara pa to gə́ yeḛ pa lé tɔ.
Jeju ra tamaji loo gə́ Gesemane
Mar 14.32-42, Lug 22.39-46
36Yen ŋga Jeju ɔr dee aw sə dee loo gə́ deḛ ɓaree Gesemane ndá yeḛ ula njékwakiláje lé pana: Loo gə́ m’a gə sa rɔm kaw ra tamaji ndá maji kar sí sije loo gə́ nee’g.
37Yeḛ ɔr Piɛrə gə ŋgalə Jebede gə́ joo lé njɔl ar dee d’aw səa. Meeko̰ un kudu kḭ səa jugugu ləm, mée tɔsee mbigi-mbigi ləm tɔ. 38Yeḛ ula dee pana: Meem ḭ səm jugugu al dɔm sula saar a kas yoom. Sije loo gə́ nee’g kəmba ŋginamje.
39Loo gə́ yee ɔd aw gə kuree rəgəsə ndá yeḛ oso naŋg bəbərə dəb kəmee naŋg ra ndòo ta Ala’g pana: Bɔm, ɓó lé to kəm ra ndá taa ŋgo-kai meeko̰ neelé jim’g rəw gə́ raŋg. Ɓó lé to gə́ ndigi el ndá kara ra né gə́ məəi-i nja wɔji ɓó to gə́ məəm-ma ɓa wɔji el.
40Tɔɓəi yeḛ tel ree rɔ njékwakiláje’g ndá iŋga dee nɛ d’unda naŋg gə ɓi ndələŋ, yeḛ dəji Piɛrə pana: See seḭ asjekəm sije kəmba ŋginamje waga ɓa el wa. 41Sije kəmba raje tamaji ta Ala’g lé gə mba kar sí osoje dan nékər’g el. Meḛ sí to kəmba nɛ darɔ sí wəi wɔ-wɔ.
42Yeḛ sa rəa aw ɔm gə́ gɔl joo ndá yeḛ ra ndòo ta Ala’g pana: Bɔm, ɓó lé to kəm kari taa ŋgo-kai meeko̰ nee jim’g lal kam m’ai lé el ndá m’a ra torndui karee ɔr rɔd ya.
43Yeḛ tel ree tɔɓəi ndá iŋga dee dɔ ɓi’g ya ɓəi mbata ɓi tɔ kəm dee jo̰dɔrɔ-jo̰dɔrɔ. 44Yeḛ ya̰ dee sa rəa aw ra ndòo ta Ala’g gə́ njekɔm’g gɔl munda lé kara yeḛ pa to gə́ yeḛ pa kédé lé ya ɓəi. 45Tɔɓəi yeḛ tel aw rɔ njékwakiláje’g ula dee gə no̰ pana: Tojeɓi, waje ne rɔ sí ɓasinè. Aa ooje kàr kula Ŋgon-dəw ji njékaiyaje’g lé nai dəb ba ŋga. 46Ḭje tar, ar sí j’awje. Aa ooje, yeḛ gə́ a gə kulam ji dee’g lé si aw gə́ nee dəb ba ŋga.
Deḛ d’wa Jeju lé
Mar 14.43-50, Lug 22.47-53, Ja̰ 18.3-12
47Loo gə́ yeḛ si pa təa’g bèe-bèe ndá Judas gə́ njekɔm dee’g dɔg-gir-dee-joo lé teḛ wai gə boo-dəwje budu-budu gə kiambas gə ɗuguru-kagje ji dee’g kel-kel. Mbai dɔ njékinjanéməsje gə ŋgatɔgje lə dəwje ɓa gə́ njékula deeje lé. 48Dəw gə́ njekun dɔ Jeju lé ɔr dee gée’g mbuu ndá wɔji dee gosee pana: Dəw gə́ m’a gə kil ɓɔlee yɔnd-yɔnd ndá to yeḛ nja kən-ə ubáje, waje né lə sí ŋga. 49Léegəneeya, yeḛ ree rɔ Jeju’g jəgm mba̰, yeḛ pana: Lapia boo, mbai!
50Tɔɓəi yeḛ ɔd il ɓɔlee. Jeju dəjee pana: Kuramarm, see né gə́ a gə ra lé ya ɓa ra nen wa.
51Yen ŋga deḛ ɓugu na̰ dɔ Jeju’g d’wá. Aa ooje, yeḛ gə́ kára mbuna deḛ gə́ d’aar gə Jeju lé ɔr kiambas ləa piao tuga ne mbi kura lə ŋgɔ-njekinjanéməs lɔd ɔr. 52Yen ŋga Jeju ulá pana: Tel gə kiambas ləi ula sɔlee gogo mbata dəwje lai gə́ d’aw gə kiambas lé d’a kwəi yoo-kiambas ya tɔ. 53See i ə̰ji məəi’g pana: Lé m’a ɓar Bɔm mba karee am kuraje gə́ dara kudu dɔg-giree-joo ŋga see a lal kam dee wa. 54See nérea gə́ togə́bè ɓa a kar ta gə́ to mee maktub gə́ to gə kəmee lé aw ne lée’g béréré to gə́ banwa.
55Yen ŋga Jeju ula boo-dəwje neelé pana: See teḛje gə kiambasje gə ɗuguru-kagje ji sí’g kel-kel mba kwamje ne asəna gə gayim-ɓogo bèe wa. Gə ndɔm-ndɔm m’isi mbuna sí’g m’ndoo sí né mee kəi-Ala’g lə sí, nɛ seḭ wamje keneŋ peb el . 56Nɛ né neelé teḛ togə́bè mba tɔl ne ta gə́ njéteggintaje ndaŋg mee maktub’g lé bém.
Yen ŋga njékwakiláje lai d’ubá d’yá̰ buŋga na̰ d’aḭ d’aw.
Jeju aar no̰ Kayipə’d gə́ to ŋgɔ-njekinjanéməs lé
Mar 14.53-65, Lug 22.54-55,63-71, Ja̰ 18.13-14,19-24
57Deḛ gə́ d’wa Jeju lé deḛ ndɔree d’aw səa mee kəi’g lə Kayipə ŋgɔ-njekinjanéməs loo gə́ njéndaji-maktubje gə ŋgatɔgje d’wa dɔ na̰ keneŋ ko̰-ko̰. 58Piɛrə dan gée jan-jan, kaw ɓa aw gə goo ŋgalee aw saar andə mee ndògo’g kəi lə ŋgɔ-njekinjanéməs. Yeḛ ur mbuna kuraje’g pén mba koo gin né gə́ d’a gə ra lé.
59Mbai dɔ njékinjanéməsje-je lé gə njégaŋ-rəwtaje lə Jibje lai d’inja kwɔi Jeju mba kar rəwta gə́ gaŋg lé wa dəa ɓó gə́ mba karee udu ne. 60Njégaŋgtaje ree bula nɛ deḛ d’iŋga ta kára dəa’g el. Gée gə́ gogo dəwje joo ɓa ree pana: 61Dəw neelé ula dee pana: N’a tuji kəi-Ala pugudu ndá as ndɔ munda ba ya n’a tel karee to lée’g gogo .
62Yen ŋga ŋgɔ-njekinjanéməs lé ḭta rad dəjee pana: Ta gə́ dəwje d’ɔm dɔi’g neelé see i a kila ta ləi keneŋ el nja saar wa.
63Jeju ila təa maree’g ndag ya si. Ŋgɔ-njekinjanéməs lé un ta ulá pana: Ma mani gə ri Ala gə́ njesikəmba, ɓó lé i to Kristi, Ŋgon-Ala lé nja ndá ula sí woḭ.
64Jeju tel ilá keneŋ pana: Yeḛ nja i pa kən mba̰. Ma m’ula sí təsərə ya, ndɔ gə́ raŋg seḭ a kooje Ŋgon-dəw gə́ si dɔ jikɔl siŋgamoŋ’g lə Ala lé ləm, gə loo kḭ gə́ a kḭ dara ree dan mum’g lé ləm tɔ .
65Yen ŋga ŋgɔ-njekinjanéməs lé wa kubu ləa har-har til ula dee pana: Aa ooje, yeḛ ila ndɔl dɔ Ala’g mba̰. See j’a dəji njékɔrgootaje gə́ raŋg gə mba ɗi tɔɓəi wa . 66Seḭ ooje ta ndɔl gə́ yeḛ ila dɔ Ala’g lé gə mbi sí ya. See gə́ meḛ sí-seḭ’g lé to gə́ ban ɓəi wa.
Deḛ tel d’ilá keneŋ pana: Yeḛ ra né askəm karee wəi ne ya.
67Yee gə́ bèe ɓa deḛ tibi yiro kəmee’g ləm, deḛ tɔs kwɔjee ləma, deḛ kunda mbɔree ləm tɔ . 68Deḛ pana: I Kristi, gər nje kundai lé ar sí j’oo səi.
Piɛrə maḭ dɔ Jeju gɔl munda
Mar 14.66-72, Lug 22.56-62, Ja̰ 18.15-18,25-27
69Piɛrə lé sí dan loo gə́ raga. Ŋgonjelookisi gə́ dené rəm wɔr gə́ rəa’g pa səa pana: I kara to njeboalookaw lə Jeju gə́ Galile lé tɔ.
70Yeḛ maḭtaree kəm dee’g lai ulá pana: Ta gə́ i pa lé ma m’gər kilá el.
71Yeḛ ḭ ŋgəs par gə́ tarəwkəi’g. Ŋgonjelookisi gə́ dené gə́ raŋg aa loo ée ndá ula deḛ gə́ d’aar keneŋ lé pana: Dəw neelé aw gə Jeju gə́ Najaret lé na̰’d ya.
72Piɛrə tel maḭ gə rɔkubu pana: Dəw neelé kəm nja kara oso dəa’g bèe el nja ɓəi.
73Waga ndá deḛ gə́ d’aar mbɔree’g dəb lé pana: Tɔgərɔ ya, i lé to ka̰ dee-deḛ nja mbata tapai ɓa ɔr gini ar sí n’gəri ne təsərə ya.
74Yen ŋga Piɛrə ndo̰ naji ubu ne rəa pana: Dəw neelé kəm nja kara m’ila dəa’g bèe el ɓəi.
75Léegəneeya kona no̰ wəl ndá mee Piɛrə aḭ har teḛ dɔ ta gə́ Jeju ulá kédé pana: Kona a no̰ el nja ɓəi ndá i a maḭ dɔm’g gɔl munda ya. Yen ŋga, yeḛ unda loo teḛ raga no̰ ɓugudu-ɓugudu.
Currently Selected:
Matiyo 26: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.