Matiyo 25
25
Gosɔta gə́ wɔji dɔ ŋgama̰dje gə́ dɔg
1Ɓeeko̰ gə́ dara lé to asəna kára ba gə ŋgama̰dje gə́ dɔg gə́ d’odo néndogóje lə dee teḛ d’aw gə mba tila kəm njedené-sigi . 2Njé gə́ mi gə́ dan dee’g to gə́ mbəje, njé gə́ mi gə́ dan dee’g to gə́ njékəmkàrje tɔ. 3Deḛ gə́ mán mbə nai kəm dee’g lé d’odo néndogóje lə dee lal kodo ubeeje ji dee’g. 4Deḛ gə́ njékəmkàrje neelé d’odo néndogóje lə dee ji dee’g gə ku-ubee na̰’d kérég. 5Loo gə́ njedené-sigi lé ree dəb el ɓəi ndá deḛ ləŋg ɓi jogè-jogè saar tel toɓi pərəg.
6Dan loo bab ndá ndu dəw ɓar wəl pana: Aa ooje, njedené-sigi lé si aw gə́ nee ŋga, ḭ tilaje kəmee. 7Yen ŋga deḛ ŋgama̰dje neelé d’ḭta gɔl néndogóje lə dee. 8Deḛ mbəje lé kwɔi deḛ gə́ njékəmkàrje lé pana: Ar síjeḛ ubu lə sí lé bəl sə sí mbata néndogóje lə sí d’a gə kwəi. 9Deḛ gə́ njékəmkàrje neelé d’ila dee keneŋ pana: Wah! Ubu lə síjeḛ askəm kar sí jeḛ sə síje n’kaije na̰ el. Bèe ndá ɔdje awje ɓee lə njérabeeje gə mba kiŋgaje ka̰ sí-seḭ ya. 10Loo gə́ deḛ d’ɔd d’aw nai ɓee ndogee’g ɓəi ndá njedené-sigi lé teḛ wai. Deḛ gə́ d’wa dɔ gɔl rɔ dee jəb d’aar pèrèrè lé d’uru səa na̰’d loo-naḭ’g ndá d’wa rəw yir d’udu dɔ dee’g. 11Waga ndá deḛ ŋgama̰dje gə́ mi neelé ree ɓaree pana: Mbai, mbai, ɔr rəw ar sí . 12Yeḛ tel ila dee keneŋ pana: Ma m’ula sí təsərə, ma m’gər sí el.
13Maji kar sí síje kəmba mbata seḭ gərje ndəa əsé kàree el.
Gosɔta gə́ wɔji dɔ kuraje gə́ munda
Lug 19.11-27
14Asəna kára ba gə diŋgam gə́ aw gə́ mbá’g, yeḛ ɓar kuraje ləa ɔm néje ləa ji dee’g . 15Kura ləa gə́ kára lé yeḛ aree ŋgan larlɔr mi, njekɔm’g joo lé yeḛ aree ŋgan larlɔr joo, njekɔm’g munda lé yeḛ aree ŋgon larlɔr kára tɔ, ar dee wɔji ne dɔ rɔ dee rɔ dee ɓa ɔd aw ɓəi. 16Léegəneeya kura ləa gə́ taa ŋgan larlɔr mi lé ɔd aw tel kəmee iŋga ne ŋgan larlɔr gə́ raŋg mi dɔ’g tɔ. 17Yeḛ gə́ njetaa ŋgan larlɔr joo lé kara ɔd aw tel kəmee iŋga ne ŋgan larlɔr gə́ raŋg joo dɔ’g tɔ. 18Yeḛ gə́ njetaa ŋgon larlɔr gə́ kára lé ɔd aw uru bwa dubu ne lar lə ɓéeje keneŋ jigi.
19Kuree əw yaa̰ mba̰ ndá mbai lé tel ree un kudu tura sə dee goo lar ləa lé ŋga. 20Yeḛ gə́ taa ŋgan larlɔr mi lé ula mbai ləa pana: Mbai, i am ŋgan larlɔr mi. Aa oo, m’iŋga manee dɔ’g mi tɔ. 21Mbai ləa tel ulá pana: Maji ya, i to kura gə́ gəd gə́ majikoji ya. Né gə́ lam ba ya gə́ to jii’g nɛ i ila ne koji dɔm’g ndá ɓasinè m’a kɔm né yaa̰ jii’g ŋga. Ɔd ree uru dan rɔlel’g lə ɓéije ya. 22Yeḛ gə́ taa ŋgan larlɔr joo lé ree ula mbai ləa pana: Mbai, i am sag larlɔr joo, ma m’iŋga manee dɔ’g joo tɔ. 23Mbai ləa tel ulá pana, Maji ya, i to kura gə́ gəd gə́ to majikoji ya. Né gə́ lam ba ya gə́ to jii’g nɛ i ila ne koji dɔm’g ndá ɓasinè m’a kɔm né yaa̰ jii’g ŋga. Ɔd ree uru dan rɔlel’g lə ɓéije ya. 24Yeḛ gə́ njetaa ŋgon larlɔr gə́ kára lé ree rɔ mbai’g ləa ulá pana: Mbai, ma m’gəri gao gə́ dəw gə́ kədərə ya mbata i dubu kó ɓa ra el ləm, i unda kó ɓa mbo̰ el ləm tɔ. 25Ma m’ɓəli yaa̰ ndá m’ɔd m’aw m’uru bwa m’dubu ne lar ləi naŋg. Aa oo loo né ləi ya kən, maji kari taa. 26Ɓéeje lé tel ilá keneŋ pana: I to kura gə́ yèr ləm, gə njerɔkas gə́ majel ləm tɔ. Ɓó lé i gərm gə́ dəw gə́ m’dubu kó ɓa m’inja el ləm, gə m’unda kó ɓa mbo̰ el ləm tɔ 27ndá see ban ɓa i un lar ləm ar njételkəmeeje gə mba kar loo gə́ m’ḭ loo-mbá’g m’tel m’ree lé m’iŋga manee dɔ’g el wa. 28Waje ŋgon larlɔr gə́ to jia’g lé taaje arje njḛgan larlɔr gə́ dɔg lé dɔ maree’g ləa, 29Mbata dəw gə́ né to jia’g ɓa d’a karee maree dɔ’g mba karee sí danee’g ɓəi, nɛ dəw gə́ né godo jia’g lé d’a taa né ləa ya . 30Kura gə́ njekɔg loo né teḛkɔr lé wáje iláje raga dan loo gə́ ndul njudu-njudu’g, lé neelé d’a no̰ gə mán-no̰ kəm dee’g ləm, d’a sɔ ŋgaŋ dee keneŋ pəgərə-pəgərə ləm tɔ .
Sariya gə́ rudu lé
31Loo gə́ Ŋgon-dəw a gə ree dan rɔnduba’g ləa gə kuraje gə́ dara lé ndá yeḛ a kuba dɔ kalimbai rɔnduba’g ləa lé ndoi si keneŋ . 32Ginkoji dəwje gə raŋg d’a mbo̰ na̰ nea̰’g ɓa yeḛ nja a kɔr kəm dee to gə́ njekulbadje ɔr ne kəm badje ləa gə bya̰je ləa lé bèe ɓəi tɔ. 33Yeḛ a kunda badje yəg kɔm dee dɔ jikɔlee’g ndá yeḛ a kɔm bya̰je dɔ jigelee’g tɔ. 34Yen ŋga, mbai a ree kula deḛ gə́ d’isi dɔ jikɔlee’g lé pana: Seḭ gə́ Bɔm tɔr ndia dɔ sí’g lé ree taaje ɓee o̰je, to ɓeeko̰ gə́ d’wa dɔ gɔlee d’wɔji ne dɔ sí ndɔ gə́ d’un kudu tum ne gin naŋg neelé ya. 35Mbata loo gə́ ɓó tɔlm ndá seḭ amje nékusɔ m’usɔ, kṵdaman tɔlm ndá seḭ amje mán m’ai, ma m’to gə́ mbá ndá seḭ wamje gə́ rɔ sí’g, 36m’aw kudum dum ndá seḭ amje kubu m’ula rɔm’g, m’oso gə rɔko̰ ndá seḭ reeje sije dɔm’g, ma m’isi daŋgai’g ndá seḭ reeje ilaje kəm sí dɔm’g tɔ. 37Njémeekarabasurje neelé d’a kilá keneŋ pana: Mbai, see jeḛ j’ooi loo-ɓoo’g gə loo-kṵdaman’g loo gə́ ra’g ɓa j’ari né usɔ gə né ai keneŋ wa. 38Esé loo gə́ ra ɓa jeḛ j’ooi keneŋ gə́ mbá əsé aw gə kudi dum ɓa j’wai gə́ rɔ sí’g əsé j’ila kəm sí dɔi’g keneŋ wa. 39See loo gə́ ra ɓa jeḛ j’ooi loo koso gə rɔko̰ əsé loo-si daŋgai’g ləi ɓa j’ila kəm sí dɔi’g keneŋ wa. 40Mbai lé a tel kila dee keneŋ pana: Ma m’ula sí təsərə, loo gə́ rara gə́ seḭ raje néje gə́ togə́bè keneŋ gə dəw kára gə́ nai gɔ mbuna ŋgakɔmje’g neelé ndá ma nja raje səm kən tɔ.
41Gée gə́ gogo yeḛ a kula deḛ gə́ d’isi dɔ jigelee’g pana: Ɔdje tam’g gə́ gogo, seḭ gə́ ndɔl wa dɔ sí lé, ɔdje gə́ dan pər gə́ si o̰ bilim-bilim’g gə no̰ gə́ d’wa dɔ gɔlee d’wɔji ne dɔ njekurai gə kuraje ləa lé. 42Mbata ɓó tɔlm né seḭ amje nékusɔ m’usɔ el, kunda tɔlm kara seḭ amje mán m’ai el, 43m’to gə́ mbá nɛ seḭ wamje gə́ rɔ sí’g el, m’aw kudum dum ndá seḭ amje kubu m’ula rɔm’g el, m’oso gə rɔko̰ əsé m’isi kəi daŋgai’g kara seḭ reeje gə mba koomje el tɔ. 44Yen ŋga d’a tel kila mbai’g lé pana: Mbai, see loo gə́ ra ɓa jeḛ j’ooi loo-ɓoo gə́ tɔli’g əsé loo-kṵdaman gə́ tɔli’g, əsé loo ree gə mbá’g ləi, əsé loo kaw gə kudu dum’g ləi, əsé loo-rɔko̰ gə́ rɔi’g, əsé loo-si kəi-daŋgai’g ləi ɓa jeḛ n’lal ra né j’ari wa. 45Yeḛ a tel kila dee keneŋ pana: Ma m’ula sí təsərə, loo gə́ seḭ lal raje néje neelé gə yeḛ gə́ kára gə́ nai gɔ mbuna ŋgakɔmje’g neelé ndá to ma nja seḭ lalje raje səm kən tɔ. 46Deḛje neelé d’a kɔd kaw loo gə́ bo̰ néra dee a kɔs ta dee’g keneŋ gə no̰ nɛ njémeekarabasurje lé d’a kɔd kaw si loo-sikəmba’g lə dee gə no̰ tɔ .
Currently Selected:
Matiyo 25: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.