Matiyo 27
27
Deḛ d’aw gə Jeju no̰ Pilatə’g
Mar 15.1, Lug 23.1-2, Ja̰ 18.28-32
1Teḛ gə ndɔ rad ndá mbai dɔ njékinjanéməsje-je gə ŋgatɔgje lə dəwje d’wa dɔ na̰ d’ula ta meḛ na̰’d mba kar Jeju udu ne. 2Deḛ d’wá teá ndər-ndər, ndɔree d’aw səa rɔ Pilatə gə́ to njeguburuɓee lé.
Kwəi lə Judas lé
NNk 1.18-19
3Yen ŋga Judas, yeḛ gə́ njekun dɔ Jeju lé yeḛ oo to gə́ gaŋgta dɔ Jeju’g mba̰ ndá lé dumee təs aree tel gə larnda gə́ rɔ-munda lé aw ne ar mbai dɔ njékinjanéməsje-je gə ŋgatɔgje lé 4ula dee pana: Ma lé m’ra kaiya, ma m’ila ne məs njemeekarabasur naŋg.
Deḛ tel d’ilá keneŋ pana: See ta ri lə síjeḛ ɓəi ɓa to keneŋ wa. To ta ləi i nja ŋga.
5Yen ŋga Judas ula lar lé yag ɔm naŋg mee kəi-Ala’g, unda loo paar-paar teḛ aw ila kúla wəi.
6Mbai dɔ njékinjanéməsje-je d’odo lar neelé rəw ji dee’g ndá deḛ pana: Lar neelé godndu lə sí wɔji mba karee oso mee sa̰duk lar gə́ to gə kəmee lé el mbata to lar məs.
7Loo gə́ deḛ d’ɔm ta lə dee na̰’d ndá deḛ dḭ lar neelé ndogo ne dɔ naŋg lə njekubajo mba karee to gə́ loo-dubu mbáje. 8Yee gə́ bèe ɓa saar teḛ ɓogənè kara deḛ ɓar dɔ naŋg neelé ndɔ-məs. 9Togə́bè ɓa ta gə́ Jeremi, njetegginta pa lé aw lée’g béréré mbata yeḛ pana: Deḛ taa larnda rɔ-munda neelé to lar gə́ deḛ ra ne gad dəw gə́ ŋgan Israɛlje ra gadee lé . 10D’odo lar ndogo ne dɔ naŋg lə njekubajo gə goo ndukun gə́ Mbaidɔmbaije nja un am.
Pilatə dəji Jeju ta
Mar 15.2-5, Lug 23.3-5, Ja̰ 18.33-38
11Jeju aar no̰ njeguburuɓee’g. Njeguburuɓee neelé dəji Jeju pana: See i nja to mbai lə Jibje lé wa.
Jeju ilá keneŋ pana: Yee nja pa tai gən mba̰.
12Nɛ loo gə́ mbai dɔ njékinjanéməsje-je gə ŋgatɔgje səgee lé yeḛ teḛ təa ja̰ ila dee’g el. 13Yen ŋga Pilatə dəjee pana: See boo-taje gə́ d’ɔm dɔi’g nee nja, see i oo el wa.
14Jeju teḛ təa ja̰ ilá keneŋ el tɔ ar mee njeguburuɓee lé aar kərm.
Deḛ gaŋgta yoo dɔ Jeju’g
Mar 15.6-15, Lug 23.13-25, Ja̰ 18.39–19.16
15Gə ndɔ ra naḭ Pag-Pag lé njeguburuɓee ɔr daŋgai kára ilá tar-tar gə́ néjiɓee ləa, yeḛ gə́ boo-dəwje ɓa d’wɔji-kwɔji kilá tar. 16Togə́bè daŋgai kára si keneŋ ria lə Barabas gə́ d’unda no̰ néra ləa gə́ majel lé gə loo-loo. 17Pilatə dəji dəwje gə́ d’aar lée’g neelé pana: See yeḛ gə́ rá ɓa seḭ ndigije kamje m’ilá tar m’ar sí lé wa. See Barabas əsé Jeju, yeḛ gə́ deḛ ɓaree Kristi lé wa.
18Mbata yeḛ gər gao, kəmkəḭ ɓa d’ila ne Jeju jia’g.
19Loo gə́ Pilatə si dɔ kalimbai gaŋg-rəwta’g ɓəi ndá dené ləa ula-kula ar dee d’ulá pana: Maji kari ar ta oso dɔ sí-seḭ gə njemeekarabasur’g neelé el, mbata ɓogənè lé ni gə́ kurai ya m’ni dəa’g.
20Mbai dɔ njékinjanéməsje gə ŋgatɔgje d’ula njuma̰ meḛ boo-dəwje’g neelé mba kar dee dəjee Barabas, nɛ Jeju ɓa ɓó gə d’aree udu. 21Njeguburuɓee lé un ta dəji dee pana: Deḛ gə́ joo neelé see yeḛ gə́ rá ɓa seḭ ndigije kamje m’ilá tar m’ar sí lé wa.
Deḛ d’ilá keneŋ pana: Barabas ɓa ilá tar ar sí.
22Pilatə dəji dee pana: Ŋga see Jeju gə́ deḛ ɓaree Kristi lé see ri ɓa m’a ra səa ɓəi wa.
Deḛ lai d’unda ndu dee na̰’d d’ilá keneŋ pana: Maji kar dee ɗaree kaar kag’d.
23Njeguburuɓee lé tel dəji dee tɔɓəi pana: See né majel gə́ yeḛ ra lé see to gə́ ɗi wa.
Deḛ lai ra né u-u-u pana: Maji ɗaree kaar kag’d ya.
24Loo gə́ Pilatə oo ndá lé dumee təs mbata dəwje d’unda bula yi-yi ndá yeḛ taa mán togo ne jia kəm boo-dəwje’g neelé tel ula dee pana: Məs njemeekarabasur neelé ma m’ɔr dɔm’g mbɔji mba̰. To ta gə́ dɔ sí-seḭ’g ya ŋga .
25Boo-dəwje lai lé d’ilá keneŋ pana: Maji kar məsee lé ɔm sí’g gə dɔ ŋgan meḛ síjeḛ’g lai ya tɔ.
26Yen ŋga Pilatə ɔr Barabas ar dee ndá yeḛ ar dee d’unda Jeju gə ndəi-kɔb sab-sab, wá ulá ji dee’g mba kar dee ɗaree kaar kag’d.
Njérɔje d’ula sul dɔ Jeju’g
Mar 15.16-20, Ja̰ 19.2-3
27Njérɔje lə njeguburuɓee lé ndɔr Jeju d’aw səa kəi-mbai lə njeguburuɓee ndá kudu-njérɔje lai kiri na̰ dəa’g yir. 28Deḛ tɔr kubu rəa’g d’ula kubu gə́ raŋg gə́ kas njir-njir rəa’g. 29Deḛ pḛdé kun gə́ dɔgugu d’ula dəa’g ləm, deḛ d’ula kag-kɔbə jikɔlee’g ɓa deḛ d’ɔs kəji dee naŋg nea̰’g d’ula sul dəa’g ləm tɔ pana: Lapia ɓòo, mbai lə Jibje.
30Deḛ tibi yiro kəmee’g tiba-tiba ləm, deḛ taa kag-kɔbə gə́ jia’g lé kunda ne dəa kəw-kəw ləm tɔ. 31Loo gə́ deḛ kogee mba̰ ndá deḛ d’ɔr kubu gə́ boi yul gə́ rəa’g lé d’ya̰ tel d’ula kubuje ləa rəa’g ɓa tel d’aw səa gə mba ɗaree kaar kag’d lé ɓəi.
Deḛ ɗar Jeju lé
Mar 15.21-32, Lug 22.26-43, Ja̰ 19.17-27
32Loo gə́ deḛ d’unda loo teḛ ndá deḛ dar Simo̰, dəw gə́ Sirèn bus d’ɔsee d’aree un kag-dəs lə Jeju. 33Tɔɓəi deḛ teḛ loo gə́ ɓaree Gɔlgota, tel ta koji sí pana: Loo ka dɔ dəw. 34D’aree mán-nduú gə kuma̰ gə́ adə gə́ pélé na̰’d lé mba karee ai, nɛ loo gə́ Jeju um rub naa oo ndá yeḛ tel mbad kɔḭ saar .
35Loo gə́ deḛ ɗaree kaar kag’d mba̰ ndá deḛ kai na̰ kubuje ləa lé rɔ ne mbarè mba kar ta gə́ njetegginta ɔr lé aw lée’g béréré pana: Deḛ kai na̰ kubuje ləm, d’ɔs ne mbarè dɔ’g . 36Yen ɓa d’isi naŋg ŋgəm təa. 37Deḛ ndaŋg ta loo gə́ dəa gə́ tar mba kɔr ne ta gə́ d’ila dəa’g tɔlee ne lé pana: Aa ooje, yeḛ gə́ neelé to Jeju, mbai lə Jibje ŋga. 38Mee kàree’g neelé deḛ ɗar gayim-ɓogoje joo səa na̰’d, yeḛ gə́ kára dɔ jikɔlee’g ləm, yeḛ gə́ kára dɔ jigelee’g ləm tɔ.
39Deḛ gə́ dəs lé deḛ tajee ləm, tuga dɔ dee jəgm-jəgm ləm tɔ , 40Deḛ pana: I gə́ pana: I a tuji kəi-Ala ndá ndɔ munda ba ya a tel ra karee to lée’g gogo lé ɓó lé i to gə́ Ŋgon-Ala tɔgərɔ ndá aji rɔi-i nja ɓó gə wa rɔi kaar kag-dəs’g ɔr ti uru naŋg ar sí j’oo səi .
41Mbai dɔ njékinjanéməsje-je gə njéndaji-maktubje gə ŋgatɔgje na̰’d lé deḛ kogee pana: 42Yeḛ aji njé gə́ raŋg nɛ yeḛ askəm kaji darəa-yeḛ el. Ɓó lé yeḛ to mbai lə Israɛlje ndá maji karee wa rəa kaar kag-dəs’g ti uru naŋg ar sí j’oo ɓa j’a kɔm meḛ sí dəa’g ɓəi. 43Yeḛ unda mée yel dɔ Ala’g lé, ɓó lé Ala ndigee ndá maji karee wá ɔree ɓasinè. Mbata yeḛ pana: Neḛ n’to Ŋgon-Ala ya .
44Gayim-ɓogoje gə́ ɗar dee səa lé deḛ kara tajee sə dee na̰’d més tɔ.
Kwəi lə Jeju lé
Mar 15.33-41, Lug 23.44-49, Ja̰ 19.28-30
45Kàr aar daŋdɔ ya ndá loondul bigim dɔ naŋg nee gə loo lai saar kàr tel rəa gə mbɔree. 46Loo gə́ kàr tel rəa gə mbɔree ndá Jeju pata gə ndia gə́ boi wəl pana: Eli, Eli, lama sabaktani, pa togə́bè pana: Ala ləm, Ala ləm, see ban ɓa i ubam ya̰’m wa .
47Njé gə́ na̰je gə́ d’aar mbuna boo-dəwje’g neelé loo gə́ d’oo ndia ndá deḛ pana: Aa ooje, yeḛ lé ɓar Eli.
48Léegəneeya dəw kára mbuna dee’g aḭ mbad aw taa ɓo̰gɓar en dan mán-nduú gə́ mas’g ula ta kag-kɔbə’g ree orè ta Jeju’g mba karee njibi . 49Nɛ njé gə́ raŋg pana: Ya̰ ɓoŋ ar sí j’oo, see Eli lé a ree təa kilá tar wa.
50Jeju ila boo-ndia naŋg no̰ wəl gɔl kára ɓəi ɓa ar ndilee teḛ aw.
51Yen ŋga kubu gə́ gaŋg ne mee kəi-Ala lé un tar til dana njal uru naŋg jig ləm, naŋg yə ləm, mbalje kara ta̰ ɓəgəgə-ɓəgəgə ləma , 52ta dɔɓarje tel to tag bəndəŋ-bəndəŋ ar njé gə́ na̰je gə́ to gə kəmee gə́ d’wəi ləw lé d’unda loo teḛ ləm tɔ. 53Deḛ d’unda loo teḛ dɔɓarje’g ndá loo gə́ Jeju teḛ dɔkumbwa’g lé deḛ d’aw mee ɓee-boo gə́ to gə kəmee teḛ ne təsərə-təsərə kəm dəwje’g bula-bula.
54Ɓé-njérɔje gə deḛ gə́ d’aar səa mba ŋgəm ta Jeju lé loo gə́ deḛ d’oo naŋg gə́ yə ləm, gə néje lai gə́ teḛ togə́bè ləm tɔ ndá ɓəl unda dee badə gaŋg dee ar dee d’ula na̰ pana: Tɔgərɔ, dəw neelé to Ŋgon-Ala lé ya. 55Denéje bula d’aar keneŋ tɔ, d’aar ŋgərəŋ d’aar d’aa loo sɔmɔmo̰, to deḛ gə́ d’ḭ Galile dan goo Jeju mba ra né karee lé . 56Njé gə́ na̰je mbuna dee’g ɓa ri dee to nee, Mari gə́ Magdala ləm, gə Mari, ko̰ Jak gə Jisəb ləma, gə ko̰ ŋgalə Jebede ləm tɔ.
Jisəb dubu Jeju lé
Mar 15.42-47, Lug 23.50-56, Ja̰ 19.38-42
57Loo gə́ kàr andə mba̰ ndá dəw kára gə́ to bao gə́ ḭ Arimate gə́ ria lə Jisəb lé ree, yeḛ lé to gə́ njekwakila Jeju ya tɔ. 58Dəw neelé aw rɔ Pilatə’g dəjee nin Jeju. Pilatə un ndia mba kar dee d’wa nin Jeju lé d’aree ya. 59Jisəb un nin Jeju lé kə́ gə kubu gə́ nda 60ndá yeḛ aw dubee mee bolè mbal gə́ to loo-dɔɓar gə́ deḛ sɔi sigi gə mbata darəa-yeḛ nja. Tɔɓəi yeḛ nduburu biri mbal gə́ boi udu ne ta bwa lé ɓa ɔd aw ɓəi. 61Mari gə́ Magdala gə Mari gə́ raŋg lé deḛ d’isi d’orè kəm dee ta dɔɓar’g lé sḭ.
Njéŋgəmlooje d’aar mbɔr dɔɓar’g dəb
62Bèlè lookàree gə́ njekorè goo ndɔ kwa dɔ gɔl néje, mbai dɔ njékinjanéməsje-je gə Parisiḛje d’aw na̰’d ɓee lə Pilatə. 63Deḛ d’ulá pana: Mbai, ta lə njesu kəm dəwje neelé to meḛ sí’g gu ɓəi mbata loo gə́ yeḛ si gə kəmee ɓəi lé yeḛ pana: ndɔ gə́ njekɔm’g munda lə neḛ ndá neḛ n’a kunda loo teḛ . 64Bèe ndá un ndui ar dee ŋgəm ta dɔɓar lé pèrèrè saar ndɔ munda lé ɓa nà njékwakiláje d’a ree gə goo ŋgəḭ kɔr ninee tel kɔd kula dəwje pana: Yeḛ nja unda loo teḛ dan njé gə́ d’wəi’g. Yen ɓa su kəm dəwje gə́ gogo neelé a to ɓəl kunda yeḛ gə́ kédé ŋga.
65Pilatə ila dee keneŋ pana: Njéŋgəmlooje lə sí d’isi gən ga̰, ɔd awje aw ŋgəmeeje to gə́ meḛ sí ndigi.
66Togə́bè deḛ d’ɔd d’aw rḛdə ta dɔɓar lé mbiao̰-mbiao̰ ndá d’unda njéŋgəmlooje ta’g tɔ.
Currently Selected:
Matiyo 27: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.