1 Samel 29
29
Njérɔje lə Pilistije tɔb Dabid dan dee’g
1Pilistije mbo̰ kudu-njérɔje lə deḛ lai Apek ndá Israɛlje d’wa loo-si dee mbɔr kəm-rəw-mán gə́ Jisreel dəb tɔ. 2Mbaije lə Pilistije d’aw kédé gə njérɔje lə dee gə́ tɔl-tɔl (100) ləm, gə njé gə́ tɔl-dɔg-dɔg (1.000) ləm tɔ ndá Dabid gə njé’g ləa d’udu goo dee gə Akis na̰’d. 3Mbaije lə Pilistije dəjee pana: See ɗi ɓa Ǝbrəje gə́ nee ree ra loo gə́ nee’g wa.
Ndá Akis ila mbaije lə Pilistije lé keneŋ pana: See to Dabid, kura lə Sawul, mbai gə́ Israɛl lé el wa. Yeḛ si səm ləw ba ya nɛ ma m’oo né gə́ tḛ́ bèe kára kara mba kila ne ta dəa’g un kudee ndɔ ree’g ləa ya saar teḛ ɓogənè lé el.
4Nɛ meḛ mbaije lə Pilistije o̰ dee dɔ Akis’g ar dee d’ulá pana: Tɔb dəw neelé aree tel aw loo gə́ i aree si keneŋ ɓó aree aw sə sí loo-rɔ’g el nà yeḛ a tel to njeba̰ lə sí loo-rɔ’g. See ɗi ɓa dəw neelé a kaw ra mba taa ne kəm ɓéeje wa. See mbɔl dɔ tɔl gə́ yeḛ a gə tɔl njérɔje lə sí lé el wa. 5See to Dabid nee gə́ d’ɔsee pa ndam ne pana:
Sawul tɔl njéba̰je ləa tɔl-dɔg-dɔg (1.000)
Nɛ Dabid ndá tɔl kea̰je tɔl-dɔg-loo-dɔg-dɔg (10.000) lé el wa#1Sam 18.7, 21.12.
6Akis ɓar Dabid ulá pana: Njesigənea̰ si kəmba ya! I lé to dəw gə́ danasur gə́ ar rɔm lelm mba koo gə́ m’ooi loo kaw səm na̰’d loo rɔ’g ləm, gə loo tel gə́ tel səm na̰’d loo-si sí’g ləm tɔ, mbata m’oo né gə́ majel kára kara rɔi’g un kudee mee ndəa gə́ i ree ne rɔm’g saar teḛ ɓogənè lé el. Nɛ mbaije ɓa i taa kəm dee el. 7Bèe ndá maji kari tel aw gə meekulɔm ɓó gə mba ra né kára kara gə́ taa kəm mbaije lə Pilistije el lé bèe el.
8Dabid ula Akis pana: See ɗi ɓa m’ra wa. See ɗi ɓa oo rɔ kura’g ləi un kudee mee ndəa gə́ m’ree rɔi’g saar teḛ ɓogənè ɓa, askəm kam m’aw m’rɔ ne gə njéba̰je lə mbai ləm lé el wa.
9Akis ila Dabid keneŋ pana: M’gər ya, mbata i taa kəm rəgm asəna gə kura lə Ala gə́ dara bèe. Nɛ mbai dɔ Pilistije-je ɓa pana: Yeḛ neelé a kaw sə sí loo-rɔ’g el. 10Bèe ndá maji kari ḭ gə ndɔ rad gə kuraje lə ɓéije gə́ ree səi na̰’d lé. Gə́ teḛje gə ndɔ rad loo gə́ loo si inja gə́ kinja ɓəi ya awje.
11Togə́bè Dabid gə njérɔje ləa teḛ gə ndɔ rad gə mba kaw gə ndɔ ba ndá deḛ tel d’aw ɓee lə Pilistije. Tɔɓəi deḛ Pilistije kara d’ḭ d’aw Jisreel tɔ.
Currently Selected:
1 Samel 29: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
