1 Samel 28

Pilistije d’ɔr rɔ d’aw rɔ gə Israɛlje

1Mee ndəa’g neelé Pilistije mbo̰ kudu-njérɔje lə dee dɔ na̰’d mba kar dee to njérɔje gə́ gel kára ɓa mba kaw rɔ ne gə Israɛlje. Yen ŋga Akis ula Dabid pana: Maji kari gər to gə́ i seḭ gə njérɔje ləi a gə kawje səm na̰’d loo-rɔ’g ya.

2Dabid tel ila Akis’g pana: I a koo né gə́ kura ləi a gə ra gao ya.

Ndá Akis tel ula Dabid pana: Bèe ya, m’a kari to njekaa dɔm ya saar gə no̰.

3Samel lé wəi mba̰. Israɛlje mbo̰ dɔ na̰ no̰ yée ləm, dubee dɔ naŋg’d ləa gə́ Rama ləm tɔ. Sawul lé tuba njéɓar ndil dəwje gə́ d’wəi ləm, gə njéndo̰-ərje ləm tɔ mee ɓeeko̰’g ləa lai#Ləb 20.27, TtG 18.10-11, 1Sam 25.1.

4Pilistije mbo̰ dɔ na̰ ree d’wa loo-si dee Sunem ləm, Sawul mbo̰ njérɔje gə́ Israɛl ar dee ree d’wa loo-si dee Gilboa ləm tɔ. 5Loo gə́ Sawul oo loo-si Pilistije ndá ɓəl undá badə gaŋgee ar ɓəŋgəree ɓar ɗigi-ɗigi tɔ. 6Sawul dəji Njesigənea̰ ta ndá Njesigənea̰ ilá ta’g gə ni el ləm, gə néje lə njekinjanéməs gə́ ɓaree urim el ləma, gə ndu njéteggintaje el ləm tɔ#BI 27.21. 7Bèe ɓa Sawul ula kuraje ləa pana: Saŋje dené gə́ njeɓar ndil dəwje gə́ d’wəi amje mba kam m’aw rəa’g m’dəjee ta. Ndá kuraje ləa d’ulá pana: Aa oo, mee ɓee gə́ En-Dɔr lé dené gə́ njeɓar ndil dəwje gə́ d’wəi si keneŋ.

8Yen ŋga Sawul tel rəa ɓəd ula kubuje gə́ raŋg rəa’g ndá aw gə dəwje joo. Deḛ ree loondul’g kəi lə dené lé. Sawul ulá pana: Maji kari ɓar ndil dəw gə́ wəi aree pata né gə́ a gə ree am ndá maji kari ɓar dəw gə́ m’a gə kulai ria nee.

9Dené lé tel ilá keneŋ pana: Aa oo, i gər né gə́ Sawul ra lé gao ya: yeḛ tuba njéɓar ndil dəwje gə́ d’wəi gə njénékooje gə njéndo̰-ərje mee ɓeeko̰’g ləa. Nɛ see ban ɓa i iya gum gə mba kwam ne kam m’wəi wa.

10Sawul man rəa gə ri Njesigənea̰ aree pana: Njesigənea̰ si kəmba ya! Némajel a rai gə mbəa el.

11Dené lé dəjee pana: See na̰ ɓa i ndigi kam m’ɓaree m’aree teḛ wa.

Ndá yeḛ ilá keneŋ pana: Ɓar Samel ɓa aree teḛ am.

12Loo gə́ dené lé oo Samel ndá yeḛ ur kii pénéné tɔɓəi tel dəji Sawul pana: See ban ɓa i su kəm wa. I to Sawul.

13Mbai lé ulá pana: Ɓəl el. See ɗi ɓa i oo wa.

Dené tel ila Sawul’g pana: Ma m’oo njabaw ɓa ḭ naŋg unda loo teḛ raga.

14Sawul dəjee pana: See kəmee to to gə́ ban wa.

Ndá yeḛ tel ilá keneŋ pana: To dəw gə́ ɓuga ɓa teḛ. Yeḛ ɓiri rəa gə kubu gə́ boi yul.

Bèe ɓa Sawul gər to gə́ to Samel ya ndá yeḛ ula dəa unda barmba dəb kəmee naŋg. 15Samel dəji Sawul pana: See gelee ban ɓa i jɔgm am m’unda loo m’teḛ wa.

Sawul ilá keneŋ pana: M’isi dan boo-néurti’g. Pilistije ree rɔ səm ndá Ala ɔr rəa rɔm’g. Yeḛ ilam ta gə́ gə ndu njéteggintaje el ləm, gə nije el ləm tɔ. Yee gə́ bèe ɓa m’ɓari ne mba kari am m’gər ne né gə́ kəm ra ya.

16Samel ulá pana: To gə́ Njesigənea̰ ɔr rəa rɔi’g ari to gə́ njeba̰ ləa mba̰ ŋga, see gelee ban ɓa i dəjim ma ta wa. 17Njesigənea̰ ra səi to gə́ yeḛ am m’ulai taree lé ya. Njesigənea̰ wa ɓeeko̰ ləi lé jii’g wɔgədɔ ɔr ar mari gə́ to Dabid#1Sam 15.28. 18Mbata i ila koji dɔ torndu Njesigənea̰’g el ləm, i ar Amalek oo boo-oŋg lə Njesigənea̰ gə́ nuŋga kəd-kəd el ləm tɔ. Gelee gə́ nee ɓa Njesigənea̰ ra ne səi né gə́ togə́bè ɓogənè gə mbəa#1Sam 15.3-9. 19Israɛlje ya kara Njesigənea̰ a kya̰ dee səi na̰’d meḛ jii Pilistije’g. Bèlè ndá i seḭ gə ŋganije a síje səm na̰’d ləm, Njesigənea̰ a kya̰ njérɔje gə́ Israɛl jii Pilistije’g ləm tɔ.

20Léegəneeya Sawul ɔr oso naŋg gə ŋgalee mərəŋ. Taje lə Samel ar ɓəl undá badə gaŋgee. Tɔɓəi siŋgá godo mbata dan kàrá gə loondul’g lé yeḛ sɔ né kára kara el. 21Dené lé ree rɔ Sawul’g, ée to gə́ yeḛ ɓəl yaa̰ ndá yeḛ ulá pana: Aa oo, ma kura ləi gə́ dené lé m’oo ndui. Kila gə́ m’ila ŋgonkoji dɔ taje gə́ i ulam’g lé yee ɓa m’ila ne rɔm jii’g gə mbəa. 22Ɓasinè m’ra ndòo rɔi’g, maji kari oo ndu kura ləi gə́ dené tɔ. Ya̰ loo am m’ari muru gə́ lam nee mba kari o̰ ar siŋgai to ɓa un ne rəw aw ɓəi.

23Nɛ yeḛ mbad kɔḭ pana: M’a ko̰ el. Nɛ kuraje ləa ləm gə dené lé ləm tɔ d’ɔsee ɓɔḭ-ɓɔḭ ndá yeḛ tel oo ta lə dee tɔɓəi yeḛ ḭ naŋg aw si dɔ tira’g tɔ. 24Dené lé aw gə ŋgon maŋg gə́ rəa to ndəb-ndəb kəi ləa ndá yeḛ ɔs rəa ɓad tɔlee tɔɓəi yeḛ dḭ nduji koro ne muru gə́ nétiee godo keneŋ. 25Yeḛ unda no̰ Sawul’g gə no̰ kuraje’g ləa ndá deḛ d’o̰. Loo gə́ d’uba naŋg d’ḭ ndá d’ɔd d’aw loondul’g nee ya.

Currently Selected:

1 Samel 28: SBA2015

Highlight

Copy

Compare