1 Sôrta Gḭka-Israɛlje 6
6
Ŋgaka Ləbije gə́ raŋg
1Ŋgalə Ləbi ɓa ri dee to nee: Gersɔm, gə Keat gə Merari#Tr 6.16-19. 2Aa ooje, ri ŋgalə Gersɔm ɓa nee: Libni gə Simei. 3Ŋgalə Keat ɓa ri dee to nee: Amram, gə Jisəar, gə Ebro̰ gə Ujiel. 4Ŋgalə Merari ɓa ri dee to nee: Mali gə Musi. Deḛ nee ɓa to ŋgaka Ləbi goo bɔ deeje’g.
5Ŋgaka Gersɔm ɓa ri dee to nee: Gersɔm oji Libni, Libni oji Jahat, Jahat oji Jima, 6Jima oji Joa, Joa oji Ido, Ido oji Jera, Jera oji Jatrai.
7Ŋgaka Keat ɓa ri dee to nee: Keat oji Aminadab, Aminadab oji Koré, Koré oji Asir, 8Asir oji Elkana, Elkana oji Ebiasap, Ebiasap oji Asir, 9Asir oji Tahat, Tahat oji Uriel, Uriel oji Ojias,
10Ŋgalə Elkana ɓa ri dee to nee: Amasai gə Ahimot, 11Ahimot oji Elkana, Elkana oji Elkana-Sopai, Sopai oji Nahat, 12Nahat oji Eliab, Eliab oji Jeroham, Jeroham oji Elkana, 13ŋgalə Samel lé ŋgondər dee to Basni gə njekɔm’g joo ləa to Abija tɔ.
14Ŋgaka Merari ɓa ri dee to nee: Merari oji Mali, Mali oji Libni, Libni oji Simei, Simei oji Uja, 15Uja oji Simea, Simea oji Haggija, Haggija oji Asaja.
16Aa ooje, deḛ gə́ Dabid unda dee gə́ njékɔrno̰ njékɔs paje mee kəi’g lə Njesigənea̰, loo gə́ sa̰duk-manrɔ to ne loo kára ɓəi lé ɓa ri dee to nee: 17Deḛ ra kula gə́ wɔji dɔ kɔs paje no̰ kəi-kubu-si-Ala’g gə no̰ kəi-kubu-kiŋga-na̰’g ɓad ɓa kar Salomo̰ unda ne kəi lə Njesigənea̰ Jerusalem ɓəi lé deḛ ra kula lə dee gə goo rəbee gə́ d’wɔji d’ar dee lé ya.
18Aa ooje, deḛ gə́ ra kula na̰’d gə ŋgan deeje mbuna ŋgaka Keatje’g ɓa ri dee to nee:
Heman, njekɔspa lé to ŋgolə Joɛl gə́ to ŋgolə Samel, 19gə́ to ŋgolə Elkana gə́ to ŋgolə Jeroham gə́ to ŋgolə Eliel gə́ to ŋgolə Toa 20gə́ to ŋgolə Sup gə́ to ŋgolə Elkana gə́ to ŋgolə Mahat gə́ to ŋgolə Amasai, 21gə́ to ŋgolə Elkana gə́ to ŋgolə Joɛl gə́ to ŋgolə Ajaria gə́ to ŋgolə Soponi, 22gə́ to ŋgolə Tahat gə́ to ŋgolə Asir gə́ to ŋgolə Ebiasap gə́ to ŋgolə Koré, 23gə́ to ŋgolə Jisəar gə́ to ŋgolə Keat gə́ to ŋgolə Ləbi gə́ to ŋgolə Israɛl.
24Ŋgokea̰ Asap to njekaar dɔ jikɔlee’g. Asap lé to ŋgolə Berekia gə́ to ŋgolə Simea, 25gə́ to ŋgolə Mikaɛl gə́ to ŋgolə Baaseja gə́ to ŋgolə Malkija, 26gə́ to ŋgolə Etni gə́ to ŋgolə Jera gə́ to ŋgolə Adaja, 27gə́ to ŋgolə Etan gə́ to ŋgolə Jima gə́ to ŋgolə Simei 28gə́ to ŋgolə Jahat gə́ to ŋgolə Gersɔm gə́ to ŋgolə Ləbi.
29Ŋgako̰ deeje gə́ to ŋgalə Merari gə́ d’aar dɔ jigelee’g ɓa ri dee to nee: Etan gə́ to ŋgolə Kisi gə́ to ŋgolə Abdi gə́ to ŋgolə Maluk, 30gə́ to ŋgolə Hasabia gə́ to ŋgolə Amasia gə́ to ŋgolə Hilkija 31gə́ to ŋgolə Amsi gə́ to ŋgolə Bani gə́ to ŋgolə Semer 32gə́ to ŋgolə Mali gə́ to ŋgolə Musi gə́ to ŋgolə Merari gə́ to ŋgolə Ləbi.
33Ŋgako̰ deeje gə́ to Ləbije lé to njékulaje gə́ wɔji dɔ kəi-kubu-si-Ala gə́ mee kəi’g lə Ala.
34Aaro̰ gə ŋgakeaje lé deḛ d’inja nékinjanéməsje dɔ loo-nékinjaməs’d gə́ to ka̰ roo ləm, deḛ tuu né gə́ ə̰də sululu dɔ loo-nékinjaməs’g ləm tɔ, deḛ ra kulaje lai neelé mee loo gə́ to gə kəmee doi’g d’uga ne dɔ kaiyaje lə Israɛlje gə goo taje lai gə́ Moyis, kura lə Ala un ndia dɔ’g ar dee lé tɔ. 35Aa ooje, ŋgalə Aaro̰ ɓa ri dee to nee: Aaro̰ oji Eləajar, Eləajar oji Pines, Pines oji Abisua, 36Abisua oji Buki, Buki oji Uji, Uji oji Jeraja, 37Jeraja oji Merajot, Merajot oji Amaria, Amaria oji Ahitub, 38Ahitub oji Sadɔk, Sadɔk oji Ahimaas.
Ɓee-booje gə́ to ka̰ Ləbije
39Aa ooje, ɓee-booje lə dee gə́ d’wɔji ŋgaŋgee d’ar dee gə goo loo-si dee si dee ɓa nee: Ŋgaka Aaro̰ gə goo gel-bɔje lə Keat lé to gə́ doŋgɔr gə goo nékwɔji lée 40ndá deḛ d’ar dee Ebro̰ mee ɓee gə́ Juda gə ŋgaŋloo gə́ gugu dəa sub, 41nɛ dɔ naŋg gə́ gugu gir ɓee-boo gə ŋgan-ɓeeje gə́ wɔji dəa lé d’ar Kaleb, ŋgolə Jepune tɔ. 42Ŋgaka Aaro̰ lé d’ar dee Ebro̰, ɓee-boo gə́ to njo̰loo ləm, gə Libna gə looje gə́ gugu dəa ləm, gə Jatir ləm, gə Estemoa gə looje gə́ gugu dəa ləm, 43gə Hilḛ gə looje gə́ gugu dəa ləm, gə Dəbir gə looje gə́ gugu dəa ləm, 44gə Asan gə looje gə́ gugu dəa ləma, gə Bet-Semes gə looje gə́ gugu dəa ləm tɔ, 45mbuna ginkoji Bḛjamije’g lé d’ar dee Geba gə looje gə́ gugu dəa ləm, gə Alemet gə looje gə́ gugu dəa ləma, gə Anatot gə looje gə́ gugu dəa ləm tɔ. Bula lə ɓee-booje d’as dɔg-gir-dee-munda gə goo gel-bɔje lə dee ya.
46Ŋgaka Keat gə́ raŋg lé d’ar dee ɓee-booje dɔg gə goo nékwɔji lée gə goo gel-bɔje lə dee mbuna ginkoji Eprayimje’g, gə ginkoji Danje’g, gə ges ginkoji Manasəje’g tɔ. 47Ŋgaka Gersɔmje gə goo gel-bɔje lə dee lé d’ar dee ɓee-booje dɔg-giree-munda mbuna ginkoji Isakarje’g, gə ginkoji Aserje’g, gə ginkoji Neptalije’g, gə ginkoji Manasəje’d gə́ d’isi Basan tɔ. 48Ŋgaka Merari gə goo gel-bɔje lə dee lé d’ar dee ɓee-booje dɔg-giree-joo gə goo nékwɔji lée mbuna ginkoji Rubḛje’g, gə ginkoji Gadje’g, gə ginkoji Jabilo̰je’g tɔ. 49Israɛlje d’ar Ləbije ɓee-booje lə dee gə looje gə́ gugu dɔ dee. 50Deḛ d’ar dee ɓee-booje neelé gə goo ri dee ri dee gə goo nékwɔji lée mbuna ginkoji Judaje’g, gə ginkoji Simeo̰je’g, gə ginkoji Bḛjamije’g tɔ.
51Gel-bɔje lə ŋgaka Keat gə́ raŋg lé d’ar dee ɓee-booje lə dee gə looje gə́ gugu dɔ dee mbuna ginkoji Eprayimje’g. 52Deḛ d’ar dee Sikem, ɓee-boo gə́ to njo̰loo gə looje gə́ gugu dəa gə́ to kaar mbal gə́ Eprayim ləm, gə Gejer gə looje gə́ gugu dəa ləm, 53gə Jokmeam gə looje gə́ gugu dəa ləm, gə Bet-Oron gə looje gə́ gugu dəa ləm, 54gə Ajalo̰ gə looje gə́ gugu dəa ləma, gə Gat-Rimo̰ gə loo gə́ gugu dəa ləm tɔ 55ndá mbuna ges ginkoji Manasəje lé d’ar dee Aner gə looje gə́ gugu dəa ləm, gə Biləam gə looje gə́ gugu dəa ləm tɔ mbata gel-bɔje lə ŋgaka Keat gə́ raŋg lé.
56Mbuna ges ginkoji Manasəje’g lé d’ar ŋgaka Gersɔm ɓee-boo gə́ Golan dɔ naŋg gə́ Basan gə looje gə́ gugu dəa ləm, gə Astarot gə looje gə́ gugu dəa ləm tɔ, 57mbuna ginkoji Isakarje’g lé d’ar dee Kedes gə looje gə́ gugu dəa ləm, Dobrat gə looje gə́ gugu ləm, 58gə Ramot gə looje gə́ gugu dəa ləma, gə Anem gə looje gə́ gugu dəa ləm tɔ, 59mbuna ginkoji Aserje’g lé d’ar dee Masal gə looje gə́ gugu dəa ləm, gə Abdon gə looje gə́ gugu dəa ləm, 60gə Ukok gə looje gə́ gugu dəa ləma, gə Reob gə looje gə́ gugu dəa ləm tɔ, 61mbuna ginkoji Neptalije’g lé d’ar dee Kedes dɔ naŋg gə́ Galile gə looje gə́ gugu dəa ləm, gə Hamo̰ gə looje gə́ gugu dəa ləma, gə Kirjatayim gə looje gə́ gugu dəa ləm tɔ.
62Mbuna ginkoji Jabilo̰je’g lé d’ar ges ŋgaka Ləbije gə́ to ŋgalə Merari lé ɓee-boo gə́ Rimo̰ gə looje gə́ gugu dəa ləm, gə Tabɔr gə looje gə́ gugu dəa ləm tɔ, 63loo gə́ kel tura-baa’g lə Jurdɛ̰ gə́ wɔji dɔ Jeriko njoroŋ par gə́ bər lə Jurdɛ̰ lé mbuna ginkoji Rubḛje’g lé d’ar dee ɓee-boo gə́ Beser par gə́ dɔdilaloo’g gə looje gə́ gugu dəa ləm, gə Jahas gə looje gə́ gugu dəa ləm, 64gə Kedemot gə looje gə́ gugu dəa ləma, gə Mepaat gə looje gə́ gugu dəa ləm tɔ, 65mbuna ginkoji Gadje’g lé d’ar dee Ramot dɔ naŋg gə́ Galaad gə looje gə́ gugu dəa ləm, gə Mahanayim gə looje gə́ gugu dəa ləm, 66gə Esbon gə looje gə́ gugu dəa ləma, gə Jajer gə looje gə́ gugu dəa ləm tɔ.
Currently Selected:
1 Sôrta Gḭka-Israɛlje 6: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
