Apocalipsis 8

Ruwuk sello

1Echiri' ri K'apoj Bexex xuloch'ij ruwuk sello nac'al che ri jubotaj wuj, laj juna mey ora lic xtz'intz'ot chila' chicaj, na jinta chi c'o xtatajic. 2Tec'uchiri', xebenuwil ri wukub ángeles e tac'al chwach ri Dios y xya' c'u jun trompeta chiquijujunal. 3Xc'un chi lo jun chic ángel y xtaq'ui' chwach raltar. Wa' ruc'a'am jun rachpom re oro. Y xya' c'u uq'uiyal incienso che re cu'an bi xa jun ruc' tak ri qui oraciones conoje rutinamit ri Dios yey wa' e kasa'n chwi raltar re oro c'o chwach ri tz'ulibal re takanic. 4Lic cabukbut c'u ri sib xel chupa ri rachpom c'o puk'ab ri ángel y xopon c'a chwach ri Dios junam ruc' tak ri qui oraciones rutinamit ri Dios. 5Ec'u ri ángel xuc'am ri rachpom y xunojisaj che ri rachk'a'l c'o chwa raltar. Tec'uchiri' xupuq'uij lo che ruwachulew. Ewi xtataj uch'awibal jab caraklajic y cajininic, y xyoc' ca'n ruxe' caj; yey xpe jun nimalaj cabrakan.

Ri wukub ángeles y ri wukub trompetas

6Ri wukub ángeles, ri cuc'a'am ri wukub trompetas, xquiyijba' quib che uch'awisaxic tak wa'.

Cach'awisax ri nabe trompeta

7Ri nabe ángel xuch'awisaj rutrompeta, y xpe c'u sakbach rachbi'il ak' ruc' quic' chwi ruwachulew. Y ruma wa' xc'at rurox parte che ruwachulew, xc'at rurox parte che ronoje tak ri che', ri tico'n y rak'es.

Cach'awisax ruca'm trompeta

8Ruca'm ángel xuch'awisaj rutrompeta, y c'o xtzak chwi ri mar pacha' juna juyub cajumuw ak' che. Y ruma wa' rurox parte che ri mar xu'an quic' uwach. 9Y xecam c'u rurox parte chique rawaj e c'o chupa ri mar yey rurox parte chique tak ri barcos e c'o chwi ri mar, xsach quiwach.

Cach'awisax rurox trompeta

10Rurox ángel xuch'awisaj rutrompeta, y jun nimalaj ch'umil cajumuw ak' che xtzak lo chicaj puwi rurox parte che tak ri rakana' y tak rac'al pa calax wi lo ya'. 11Rubi' wa' wa jun ch'umil e “C'a”. Ewi rurox parte che tak ri nimaya' lic xu'an c'a; y uq'uiyal winak xecam ruma ruc'ayul ri ya'.

Cach'awisax rucaj trompeta

12Rucaj ángel xuch'awisaj rutrompeta, y lic x'an c'ax che rurox parte che ri k'ij, che ri ic' y chique ri ch'umil. Xk'ob c'u tak ruwonibal wa', jela' xujek camoymot uwach ri sak pak'ij y xu'an más k'eku'm rak'ab.

13Tec'uchiri' xinwil jun águila#8:13 Jujun versión caquibi'ij “ángel”. Ri águila e más nim chwa ri xic. caxiq'uic' chicaj y xinto jewa' casiq'uin che ubi'xiquil: «¡Tok'o' quiwach! ¡Tok'o' quiwach! ¡Tok'o' quiwach conoje ri ejekel che ruwachulew ruma ri caquic'ulumaj echiri' ri oxib ángeles caquich'awisaj ri jujun chic trompetas! ¡Ma ya e cu'ana wa'!» cacha'.

Currently Selected:

Apocalipsis 8: acrT

Highlight

Copy

Compare