Apocalipsis 7

Ri ciento cuarenta y cuatro mil ticawex cacoj ri retalil re ri Dios chique

1Ic'owinak chi c'u wa', xebenuwil cajib ángeles e tac'al lo chwi tak rucajchal rajlibal ruwachulew.#7:1 “Rucajchal rajlibal ruwachulew”: Wa' que'elawi pa norte, pa sur, pa relebal k'ij y putzakibal k'ij. Wa' e ri quequik'atibej tak ri cajib utza'm tew che ruwachulew cha' ri tew na cu'an ta c'ax che ruwachulew, che ri mar y che tak ri che'. 2Xinwil c'u jun chic ángel xel lo pa relebal lo ri k'ij; rire ruc'a'am ri sello re ri Dios c'aslic. Ewi lic co xsiq'uin chique ri cajib ángeles, ri xya'taj chique caqui'an c'ax che ruwachulew y che ri mar. 3Jewa' xubi'ij chique: «Nabe na cakacoj ri retalil#7:3 Wa retalil cacojic e c'utubal re, rique e c'o puk'ab ri Dios; yey ruma c'u wa', ri c'ax cape chwi ruwachulew na jinta c'o cu'an chique rique. che rucurusil ri quipalaj ri e aj chac re ri Kakaw Dios, tec'uchiri' utz qui'an c'ax che ruwachulew, che ri mar y che tak ri che'» xcha'. 4Y xinta ri cajlibal ri cojotal wa retalil chique: wa' e ciento cuarenta y cuatro mil. Rique echa'tal chiquixo'libal conoje ri tinamit que raj Israel.

5Tak ri cojotal wa retalil chique, e wa':

cablajuj mil chique ri ralc'o'al can ri Judá,

cablajuj mil chique ri ralc'o'al can ri Rubén,

cablajuj mil chique ri ralc'o'al can ri Gad,

6cablajuj mil chique ri ralc'o'al can ri Aser,

cablajuj mil chique ri ralc'o'al can ri Neftalí,

cablajuj mil chique ri ralc'o'al can ri Manasés,

7cablajuj mil chique ri ralc'o'al can ri Simeón,

cablajuj mil chique ri ralc'o'al can ri Leví,

cablajuj mil chique ri ralc'o'al can ri Isacar,

8cablajuj mil chique ri ralc'o'al can ri Zabulón,

cablajuj mil chique ri ralc'o'al can ri Benjamín,

y cablajuj mil chique ri ralc'o'al can ri José.#7:8 Tak wa bi'aj e que ri cablajuj uc'ajol can ri Jacob, ri cabi'x Israel che.

Ri k'alajisanic paquiwi tak ri na e ta aj Israel

9Ic'owinak chi c'u wa', xebenuwil uq'uiyal winak yey na jinta junok cach'ijow rajilaxic ri cajlibal. Rique e petinak chupa ronoje tak ri tinamit, chique conoje ruq'uiyal quiwach tak ri ticawex che ronoje ruq'uiyal uwach ch'a'temal. Rique e tac'al chwach ri Jun tz'ul pa ri tz'ulibal re takanic y chwach ri K'apoj Bexex. Yey conoje e wikital ruc' quik'u' sak y cuc'a'am uk'ab palma paquik'ab. 10Y conoje lic co quesiq'uin che ubi'xiquil:

«Ri kacolobetajic petinak ruc' ri ka Dios

ri tz'ul pa ri tz'ulibal, y ruc' ri K'apoj Bexex»

quecha'. 11Yey conoje ri ángeles e tac'alic, quisutum rij ri tz'ulibal re takanic yey quisutum quij ri veinticuatro nimak winak y ri cajib c'o quic'aslemal pacha' e ángeles.#Ap. 4:6-8 Xquixucuba' c'u quib, xquikasaj quimejelem c'a chu'lew chwach ri tz'ulibal y xquilok'nimaj uk'ij ri Dios. 12Jewa' caquibi'ij:

«¡Amén! ¡Amén!

Xew che ri ka Dios takalic cabi'xic lic nim uk'ij,

ca'an tioxinic che y caxuc ib chwach

yey takal che cabi'xic c'o unimal uchomalil,

sakil una'oj y unimal uchuk'ab.

Yey wa' na jinta chi utakexic takal che Rire.

¡Amén!» quecha'.

13Tec'uchiri', xch'aw jun chique ri veinticuatro nimak winak, jewa' xubi'ij chwe:

—Tak wa quicojom quik'u' sak, ¿e china rique y pa e petinak wi? —xcha'.

14Ximbi'ij c'u ri'in che:

—Wajawal, lal eta'mayom la re —xincha'.

Ec'u rire xubi'ij chwe:

—Conoje wa' e ri quich'ijom uchuk'ab ri unimal c'axc'obic yey quijosk'im ri quik'u' y qui'anom c'u sak che ruc' ruquiq'uel ri K'apoj Bexex. 15Ruma c'u la' e c'o chwach ri tz'ulibal pa catakan wi ri Dios y caquilok'nimaj c'u Rire chipak'ij chichak'ab chupa ri Rocho. Ec'u ri Jun tz'ul chupa ri tz'ulibal cajeki' cuc', e pacha' cuch'uk quiwi' re quebuchajij. 16Jec'ula' na caquitij ta chi numic y tzajin chi', na caquina' ta chi ne ruc'atanil ri k'ij y ri buc; 17ma ri K'apoj Bexex ri c'o chwach ri tz'ulibal, e cachajin que y cuc'am bi quiwach pa tak ac'al pa calax wi lo ya' re c'aslemal. Yey e ri Dios cusu' na ronoje ruwa'al quiwach rique —xcha'.

Currently Selected:

Apocalipsis 7: acrT

Highlight

Copy

Compare