Apocalipsis 11

Ri Rocho Dios capajic

1Ec'uchiri', xya' jun tani panuk'ab jela' pacha' juna vara re pajbal y jec'uwa' xbi'x chwe: «Chatyactajok, chapaja ri Rocho Dios, chapaja raltar y chebawajilaj janipa ri caquilok'nimaj uk'ij ri Dios chiri'. 2No'j ruwa ja c'o chwach ri Rocho Dios chaya'a canok; mapajo, ma la' ya'tal chi chique ri winak na e ta aj Israel; yey rique caqui'an que che ri tinamit Jerusalem re caquic'ak bi uk'ij, ma quetakan na puwi' oxib junab ruc' nic'aj» xcha'.

Ri ca'ib k'alajisanelab caquik'alajisaj Rutzij ri Dios

3Ri'in quebenutak bi ca'ib nuk'alajisanelab quicojom quik'u' lic tzac'an upa#11:3 Ri quik'u' quicojom ri ca'ib k'alajisanelab e pacha' ri caquicoj ri ticawex ojertan echiri' cacam juna catz-quichak'. cha' caquitzijoj ri Nutzij oxib junab ruc' nic'aj.#11:3 Pa ri ch'a'tem griego cubi'ij “mil doscientos sesenta k'ij”. 4Wa' wa ca'ib k'alajisanelab e ri ca'ib che' re olivo y e ri ca'ib utzuc'ulibal ak' e c'o chwach ri Dios Kajawxel, ri catakan chwi ruwachulew. 5We c'o junok caraj cu'an c'ax chique, quel lo ak' pa quichi' rique y ruc' wa' quequicamisaj tak ri tzel quebilow que. Jec'ula' quecam ri cacaj caqui'an c'ax chique. 6Wa ca'ib k'alajisanelab ya'tal chique caquik'atej ri jab cha' na cu'an ta lo pa ruk'ijol echiri' quetajin che u'anic k'alajisanic; y ya'tal chique caqui'an quic' che tak ri ya' y caqui'an c'ax che ruwachulew ruc' uq'uiyal c'axc'obic janipa laj cacaj rique.

7Echiri' quiq'uisom chi utzijoxic Rutzij ri Dios, ri jun nimalaj itzel chicop, ri quel lo chupa ri siwan na jinta utakexic ruchoyil upa, cach'o'jin c'u cuc', cuch'ij quichuk'ab y quebucamisaj. 8Ec'u ri quicuerpos cateli' can pa caquimol wi quib ri winak che ri nimalaj tinamit pa xcamisax wi ri Kanimajawal Jesucristo chwa cruz. Yey che wa tinamit cabi'x “Sodoma” y “Egipto” ruma tak ri mac ca'an chila'.

9Y ri ticawex e petinak chupa tak ri tinamit, chique ruq'uiyal quiwach tak ri ticawex che ruq'uiyal uwach ch'a'temal, oxib k'ij ruc' nic'aj caquil ri quicuerpo telanic y na caquiya tane luwar cha' quemukic. 10Y conoje ri winak e c'o che ruwachulew lic quequi'cot c'u ri' ruma ri quicamic wa ca'ib k'alajisanelab. Caqui'an c'u nimak'ij y caquitak tak sipanic chiquiwach, ma xecam wa ca'ib k'alajisanelab re ri Dios, ri xequiya pa c'axc'obic ri winak che ruwachulew.

11Ec'uchiri' ic'owinak chi oxib k'ij ruc' nic'aj, ri Dios xuya chique wa ca'ib k'alajisanelab quebuxlabic y cac'oji' tanchi quic'aslem. Xeyactaj c'u ri' y xetaq'ui'ic. Y conoje ri xebilow que, xoc unimal xi'in ib cuc'.

12Ec'u ri ca'ib k'alajisanelab xquita Jun lic co xch'aw lo chila' chicaj, jewa' xubi'ij chique: «Chixak'ana lo wara» xcha'. Ec'u rique xebel bi chicaj chupa jun sutz' y xebilitaj cuma ri tzel xebilow que.

13Chupa c'u la' la jok'otaj xpe jun nimalaj cabrakan y lajuj parte che ri tinamit xwuluwubic; y ruma wa' e wukub mil ri winak xecamic. Ec'u ri na xecam taj, xoc jun xi'in ib cuc' y xquiyac uk'ij ri Dios c'o chila' chicaj. 14Jewa' xq'uis wi ruca'm c'axc'obic, pero rurox c'axc'obic catajin lok.

Cach'awisax ruwuk trompeta

15Ruwuk ángel xuch'awisaj rutrompeta, y xetataj cowilaj tak kulaj quech'aw lo chila' chicaj, jewa' caquibi'ij:

«Conoje tak ri tinamit che ruwachulew

c'o chi puk'ab ri Dios Kajawxel

y puk'ab Rucha'o'n lo Rire;

yey wa takanic na jinta chi utakexic» quecha'.

16Ec'u ri veinticuatro nimak winak etz'ul pa ri quitz'ulibal chwach ri Dios, xquixucuba' quib, xquikasaj quimejelem c'a chu'lew y xquilok'nimaj uk'ij ri Dios. 17Jewa' caquibi'ij:

«Cakatioxij che'la, ma Lal Dios Kajawxel

c'o ronoje unimal chuk'ab pak'ab la,

Lal ri Dios c'o wak'ij ora, ri xex chi c'o lo wi, y ri c'o chikawach apanok;

ma c'utum la ri chuk'ab la

y jekom chi ri takanic la pakawi ri'oj.

18E tak c'u ri tinamit che ruwachulew

lic xpe coyowal chi'ij la.

No'j wo'ora xopon ruk'ijol ri oyowal la,

ri k'ij re cak'at la tzij paquiwi tak ri ecaminak.

Caya c'u la ri rajil uc'axel chique ri k'alajisanelab e aj chac la

cuc' ri jujun chic e c'o pak'ab la,

ri lic caquilok'nimaj uk'ij ri bi' la,

tob lic c'o quiwach o na jinta quiwach;

yey casach c'u la quiwach ri' ri quesachaw quiwach

tak ri winak wara che ruwachulew» quecha'.

19Ec'u ri Rocho Dios chila' chicaj, xtek'ebaxic; y xilitaj pan chupa, ri caxa re ri tzij u'anom ri Dios cuc' rutinamit. Ec'uchiri', xyoc' ca'n ruxe' caj, xetataj uch'awibal jab caraklajic y cajininic; yey xpe jun cabrakan, y xu'an nimak tak sakbach.

Currently Selected:

Apocalipsis 11: acrT

Highlight

Copy

Compare