Apocalipsis 10

Ri ángel c'o ralco jubotaj wuj puk'ab

1Tec'uchiri', xinwilo echiri' jun chic ángel lic c'o uchuk'ab xkaj lo chila' chicaj yey sututal rij ruc' sutz' y chwi rujolom c'o lo jun arco iris. Ec'u rupalaj lic cawonic jela' pacha' ri k'ij yey tak ri rakan lic cawonic pacha' jutak repaj ak'. 2Puk'ab c'o ralco jubotaj wuj#10:2 “Jubotaj wuj”: Quil “rollo” pa vocabulario. y wa' jakatal uwach. Xutac'aba' c'u ri rakan uwiquik'ab chwi ri mar y ri rakan mox xutac'aba' chwi ruwachulew. 3Lic co xsiq'uinic pacha' ri rok'ej juna coj. Yey echiri' xsiq'uinic, xtataj wukub kulaj pacha' uch'awibal jab, lic cajininic xe'ec. 4Echiri' xjinin ri wukub uch'awibal jab, ri'in e ri' cantz'ibaj ri xinto; pero xinta Jun xch'aw lo chila' chicaj, jewa' xubi'ij chwe: «Ri'at xa chac'olo pawanima' tak ri xquibi'ij wa wukub uch'awibal jab y matz'ibaj» xcha'.

5Yey ri ángel tac'al ruc' jun rakan chwi ri mar y jun chwi ruwachulew, xuyac ruk'ab chicaj 6y xujiquiba' c'u uwach pubi' ri Jun ri na jinta utakexic ruc'aslemal, ri 'anayom re ruwa caj ruc' ronoje tak ri c'o chwach, ruwachulew ruc' ronoje tak ri c'o chwach y ri mar ruc' ronoje tak ri c'o chupa, jewa' xubi'ij: «Ri Dios na camayin ta chi che u'anic ri uch'obom lok. 7Ma chupa c'u ri' ri k'ij echiri' ruwuk ángel cujek uch'awisaxic rutrompeta, ri Dios e cu'ana ri uch'obom lok y jela' cak'alajin ronoje rubi'im lo chique ri raj chac e k'alajisanelab» xcha'.

Ri Juan cutij ri ralco jubotaj wuj

8Ec'u ri Jun ch'a'tinak lo wuc' chila' chicaj, je tanchi wa' xubi'ij chwe: «Jat, ja'c'ama ri ralco jubotaj wuj quirom uwach yey c'o puk'ab ri ángel, ri tac'al ruc' jun rakan chwi ri mar y jun chwi ruwachulew» xcha'.

9Xin'ec c'u ri'in ruc' ri ángel y xintz'onoj che cuya ri ralco jubotaj wuj chwe. Ec'u rire xubi'ij chwe: «Ji', chac'ama' y chatija bi. Ec'uchiri' c'o chi pachi' lic qui' cana'o pacha' ruwa'al cab, pero echiri' atijom chubi lic cu'an c'a chupa rapa» xcha chwe.

10Ri'in xinc'am c'u ri ralco jubotaj wuj c'o puk'ab ri ángel y xintij bi. Ec'uchiri' c'o chi pa nuchi', lic qui' jela' pacha' ruwa'al cab; pero echiri' nutijom chubi, lic xu'ana c'a chupa ri nupa.

11Y ri Jun xch'aw lo chwe chila' chicaj, jewa' xubi'ij chwe: «Lic chirajawaxic ca'an tanchi k'alajisanic puwi ri caquic'ulumaj ruq'uiyal tak tinamit, ruq'uiyal quiwach tak ri ticawex che ruq'uiyal uwach ch'a'temal y ruq'uiyal aj takanelab e c'o che ruwachulew» xcha chwe.

Currently Selected:

Apocalipsis 10: acrT

Highlight

Copy

Compare