Apocalipsis 12

Rixok y ri dragón

1Xwinakir c'u che ruwa caj jun nimalaj c'utubal: C'o jun ixok upisom rib chupa ri k'ij, wa' u'anom pacha' uk'u' che. Ec'u ri ic' chuxe' ri rakan c'o wi, y c'o jun corona che rujolom yey wa corona c'o cablajuj ch'umil che. 2Rire yewa' ixok y lic casiq'uinic ma e ri' cutzir uwach yey ruma wa' lic c'o pa c'ax.

3Xwinakir c'u jun chic c'utubal che ruwa caj: Wa' e jun nimalaj dragón cak rij, c'o wukub ujolom y lajuj ruc'a'. Chujujunal rujolom cojom jun diadema che. 4Ruc' ruje' xebujocoquej bi ri urox parte chique tak ri ch'umil e c'o che ruwa caj y xebuc'ak bi che ruwachulew. Ec'u ri dragón xtaq'ui' chwach rixok echiri' ya e ri' cutzir uwach cha' cutij bi ri ralco ralab maji chic echiri' calaxic. 5Xutzir c'u uwach rixok y xalax jun ralco ralab. Y ruchac wa' wa ralab e catakan ruc' jun vara ch'ich' paquiwi conoje tak ri tinamit e c'o che ruwachulew. Ec'u ri ralco ralab rixok xc'am bi chicaj ruc' ri Dios pa c'o wi rutz'ulibal re takanic. 6Ec'u rixok xanimaj bi, xe'ec pa jun luwar catz'intz'otic pa yijbam wi ruluwar ruma ri Dios, cha' chiri' catzuk wi oxib junab ruc' nic'aj.#12:6 Pa ri ch'a'tem griego cubi'ij “mil doscientos sesenta k'ij”.

7Tec'uchiri', xjeker jun nimalaj ch'a'oj chila' chicaj: Ri Miguel cuc' ri ángeles e c'o puk'ab xech'o'jin ruc' ri dragón. Y jec'ula' ri dragón cuc' ri ángeles e c'o puk'ab xech'o'jin ruc' ri Miguel. 8Pero ri dragón cuc' tak ru ángeles na xquich'ij ta quichuk'ab ri Miguel cuc' ri ángeles e c'o ruc'. Y na xya' ta chi c'u chique quec'oji' chila' chicaj. 9Xc'ak bi ri nimalaj dragón, wa' e ri cumatz re ojertan,#Gn. 3:1 ritzel winak Satanás rubi', ri catajin che quisocoso'xic conoje tak ri winak che ruwachulew. Xc'ak c'u bi che ruwachulew junam cuc' ru ángeles.

10Tec'uchiri' xinta jun kulaj lic co xch'aw chila' chicaj, jewa' cubi'ij:

«Wo'ora ri Dios ebucolobem chi rutinamit yey ri jekebal re rutakanic xu'an ruc' unimal uchuk'ab y uya'om chi ri takanic puk'ab Rucha'o'n lo Rire. Ma c'akom chubi ri jun cutz'ak quichi' ri ka hermanos chipak'ij chichak'ab chwach ri Dios. 11E tak ri ka hermanos xquich'ij uchuk'ab ri dragón ruma ruquiq'uel ri K'apoj Bexex y ruc' ri Utzilaj Tzij xquitzijoj rique, yey na xquixi'ij tane quib chwach tak ri caquic'ulumaj tob ne xecamisaxic. 12E uwari'che chixqui'cota ri'ix, ri ix jekel wara chicaj. Pero lic tok'o' c'u quiwach tak ri e c'o che ruwachulew y ri e c'o chupa ri mar, ma ritzel winak kajinak piwi ri'ix y lic sa'ch ri royowal, ma reta'am xa ajilam chi ri k'ij ya'tal che» cacha'.

Ritzel winak y ri tinamit Israel

13Echiri' ri dragón xrilo esam chi lo chicaj, lic xuternabej rixok, ruchu ri ralco ala. 14Pero che rixok xya' ca'ib nimak tak uxic' pacha' uxic' águila, cha' jela' caxiq'uiq'uic canimaj bi chwach ri cumatz#Ap. 12:9 pa ri luwar catz'intz'otic, pa ri luwar yijbam chi che, pa catzuk wi oxib junab ruc' nic'aj. 15Ec'u ri cumatz xuxabej lo ya' puchi' chirij rixok, wa' e pacha' juna nimaya' re cucharej bi. 16Pero rulew xuto' rixok, ma xjakatajic y xutz'ub bi ri nimaya' uxabem lo ri cumatz puchi'. 17Ruma c'u la', ri cumatz lic xpe royowal chirij rixok y xu'ana ch'a'oj cuc' tak ri ralc'o'al can rixok, wa' e tak ri caquitakej Rutzij Upixab ri Dios y caquitzijoj ri Utzilaj Tzij re ri Kanimajawal Jesucristo.

Currently Selected:

Apocalipsis 12: acrT

Highlight

Copy

Compare