2 Timoteo 3

Ri quibinic quisilabic ri winak chupa tak ri q'uisbal k'ij

1Lic chirajawaxic caweta'maj wa': Chupa tak ri q'uisbal k'ij lic c'ayew chi ri jekelem che ruwachulew ruma ri quibinic quisilabic tak ri winak. 2Ma e c'o ri xew caquitakej ri cacaj rique, e c'o ri lic e rayinel re puak, e c'o ri lic caquitac'aba' quik'ij, e c'o ri caquic'ak bi quik'ij ri catz-quichak', e c'o ri tzel quech'a't chiquij jujun chic, e c'o ri na caquicoj ta quitzij quichu-quikaw, e c'o ri na jinta caquitioxij, e c'o ri na caquixi'ij ta quib chwach ri Dios. 3E c'o ri na jinta c'ana rutzil c'u'xaj cuc', e c'o ri na jinta c'ana c'axna'bal quic'u'x, e c'o ri e aj molot, e c'o ri na caquich'ij ta uk'atexic ri quirayibal, e c'o ri lic e titz'itak, e c'o ri tzel caquil ri utz. 4E c'o ri e c'ayinel re catz-quichak', e c'o ri na caquich'ob tana rakan ri caqui'ano, e c'o ri lic caqui'an nim che quib, e c'o ri xew caquitzucuj rukusil ruwachulew y na e ta caquitzucuj ri Dios. 5E c'o ri caqui'an pacha' lic utz qui'anom chwach ri Dios pero na quiya'om ta luwar che ri Dios cujalc'atij ri quibinic quisilabic ruc' ruchuk'ab Rire. Ma'an awe cuc' ri caqui'an tak wa'. 6Cuq'uil rique e c'o ri queboc pa tak ja y quequisoc rixokib lic c'o quimac ruma e quitakem tak ri quirayibal. 7Tob xaki caquita tak c'utunic, na ruc' ta c'u ri', na caquimaj ta c'ana usuc' ri K'ijsak. 8Ec'u wa' wa'chijab e pacha' ri aj k'ijab Janes y Jambres, ri xeyacataj chirij ri Moisés ojertan,#Éx. 7:11 ma rique eyacatajinak chirij ri K'ijsak y sachinak ri quina'oj yey na quec'ul ta ruma ri Dios ma rique na jinta c'ana cubulibal quic'u'x ruc' Rire. 9Na quebel ta c'u pan ruc' ri caqui'ano jela' pacha' ri xquic'ulumaj ri xeyactaj chirij ri Moisés, ma cak'alajin chiquiwach conoje, na jinta sakil na'oj cuc' rique.

Q'uisbal pixabanic che ri Timoteo

10No'j ri'at e atakem ri sakil nuc'utunic, ri jusuc' nubinic nusilabic, ri cuaj can'an ruc' ri nuc'aslem, ri cubulibal nuc'u'x, runimal nuc'u'x, ri rutzil nuc'u'x y ri nuchuk'ab che uch'ijic ronoje. 11Aweta'am c'u ri' lic 'anom c'ax chwe y lic nutijom c'axc'obic jela' pacha' ri xinwic'owibej chupa tak ri tinamit Antioquía, Iconio y Listra. Uq'uiyal tak c'axc'obic xpe panuwi', pero ri Kanimajawal Jesucristo xinucolobej che ronoje wa'. 12Y jela' conoje ri cacaj quebin jusuc' chupa ri be re ri Kanimajawal Jesucristo, caquitij na c'ax cuma jujun chic. 13Ec'u ri winak itzel quic'u'x y ri e socoso'nel, lic caq'uiyar uwach ri quimac. Quesocoso'nic y caquisoc quib chiquibil quib.

14No'j c'u ri'at e lic chachuk'ubej awib che ri sakil c'utunic amajom y pa ri ajiquibam wi awib. Ma aweta'am chi utz china tak ri xec'utuw wa' chawe. 15Ma chach'uti'nal xaweta'maj lo ri Santowilaj Uch'a'tem ri Dios tz'ibital canok, yey e wa' ri cuya ana'oj cha' cac'ul ri colobetajic ruma ri cubulibal ac'u'x ruc' ri Kanimajawal Jesucristo. 16Ronoje Rutzij Upixab ri Dios tz'ibital canok e ri Dios bi'yom re; wa' e lic c'o uchac re c'utunic, re pixabanic, re cuyijba' ri na utz ta u'anom y re k'ilonic cha' cojbin jusuc' chwach ri Dios; 17y jec'ula' conoje ri caquinimaj ri Dios e tijotal chi utz che u'anic ronoje utzilaj chac, ma ya'tal chi chique janipa ri cajawaxic cha' caqui'an wa'.

Currently Selected:

2 Timoteo 3: acrT

Highlight

Copy

Compare