2 Timoteo 4
4
1Timoteo, canya can wa pixabanic chawe chwach ri Dios y chwach ri Kanimajawal Jesucristo, ri cac'un tanchi wara che ruwachulew re co'ltakana paquiwi conoje y re colu'k'ata tzij paquiwi tak ri ticawex, ri e c'aslic y ri ecaminak. 2Chaya'a awib che utzijoxic Ruch'a'tem ri Dios. Chatoc il che utzijoxic wa' chupa ruk'ijol o tob ne na chupa ta ruk'ijol. Chak'alajisaj tak ri na utz taj, chach'a'bej quipa tak ri caqui'an ri na utz taj, chebapixabaj ruc' sakil c'utunic cha' caquitzelej quitzij. Cha'ana c'u wa' ruc' unimal ac'u'x. 3Ma copon ri k'ij echiri' tak ri winak na cacaj taj caquita ri sakil c'utunic. Yey ruma tak ri quirayibal quequitzucuj china quec'utuw chique sa' ri cacaj caquito. 4Rique na cacaj taj caquita ri K'ijsak y e caquiternabej tak tzijobal xa no'jital cuma winak. 5No'j ri'at Timoteo, e lic c'ola ana'oj puwi tak ri ca'ano. Chacuyu ronoje tak ri c'axc'obic cape pawi'. E chaya'a awib che utzijoxic ri Utzilaj Tzij re colobetajic. Cha'ana c'u chi utz ronoje ri chac ya'tal pak'ab.
6Cambi'ij c'u wa' chawe ma ri'in na naj ta chi in c'aslic, ri nubenam chila' chicaj xa nakaj chi c'o wi. 7Xinch'ij uchuk'ab ronoje ri c'axc'obic xinic'ow wi, xinopon c'u che ri q'uisbal re ri nuchac uya'om ri Dios, lic nutzijom chi jusuc' ri Utzilaj Tzij re ri Cristo. 8Ec'u wo'ora xew chi woye'em ri corona caya' chwe ruma ximbin jusuc' chwach ri Dios. Y ri caya'w wa' chwe e ri Kanimajawal Jesucristo, ri Aj K'atal Tzij lic jusuc'. Y wa' na xew ta chwe ri'in cuya'o, ma cuya chique conoje ri coye'em ruc'unibal ruc' ronoje canima'.
Ri Pablo caraj caril uwach ri Timoteo
9Matmayinic, e chatpeta tan che wilic. 10Ma ri Demas xinrok'otaj canok ruma lic xe'ec uc'u'x chwi tak rukusil ruwachulew y xe'ec Tesalónica. Y ri Crescente benak Galacia yey ri Tito benak Dalmacia. 11Xew c'u ri Lucas inrachbilam wara. Echiri' catpetic, chac'ama lo ri Marcos#Hch. 15:37-39 awuc' ma rire lic to'bel we chupa ruchac ri Dios. 12Ec'u ri Tíquico xintak bi Éfeso. 13Echiri' catpetic, chac'ama lo ri pisbal wij nuya'om can chirocho ri Carpo chupa ri tinamit Troas y chac'ama tak lo ri jubotaj wuj;#4:13 “Jubotaj wuj”: Quil “rollo” pa vocabulario. yey ri lic cajawax chwe e ri jutak botaj tz'u'um tz'ibital uwach. 14Rachi Alejandro ri aj ch'ayal ch'ich' lic u'anom tak ri na utz taj chwe. Ec'u ri Dios catojow re che sa' tak ri u'anom. 15Lic chachajij c'u awib ri'at chwach rire ma lic uyacom rib chirij ri Utzilaj Tzij cakatzijoj.
16Ri nabe laj echiri' xinto'bej wib pa k'atbal tzij, na jinta junok xto'w we ma conoje xincok'otaj canok; na ruc' ta c'u ri', ri'in na cuaj taj e ri Dios cuk'at tzij paquiwi' ruma wa'. 17No'j ri Kanimajawal xc'oji' wuc', xinuto'o y xuya nuchuk'ab cha' wuma ri'in xel utzijoxic ri Utzilaj Tzij y xquita c'u wa' ri ticawex re uq'uiyal tinamit. Jec'ula' xincolobex ri'in chwa ri camic, e pacha' junok xesax puchi' juna coj. 18Yey e ri Kanimajawal quincoloben chwach tak ri na utz taj y quinuchajij c'ut cha' quinopon na ruc' chila' chicaj pa catakan wi. Xew c'u che Rire takal wi lic cayac uk'ij na jinta utakexic. Amén.
Q'uisbal uch'a'tem ri Pablo che ri Timoteo
19Chaya'a rutzil quiwach ri Priscila#Hch. 18:1-3 y ri Aquila#4:19 Ri Aquila e rachijil rixok Priscila. junam cuc' conoje ri e c'o pa rocho ri Onesíforo. 20Ri Erasto xcanaj can pa ri tinamit Corinto y ri Trófimo xinya can pa ri tinamit Mileto ma lic yewa'. 21Matmayinic, e chatpeta tan echiri' c'amaja' cujek ruk'ijol echiri' c'ax tew y c'o jab. Caquiya pan rutzil awach ri Eubulo, ri Pudente, ri Lino, ri Claudia cuc' conoje ri hermanos e c'o wara. 22C'ola c'u ri Kanimajawal Jesucristo awuc'. Ri unimal rutzil uc'u'x Rire c'ola piwi' iwonoje ri'ix. Amén.
Currently Selected:
2 Timoteo 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.