2 Timoteo 2

Ri Pablo cupixabaj ri Timoteo cha' cuchuk'ubej rib chwach tak ri c'axc'obic

1Timoteo, ri at pacha' nuc'ajol chupa rubi' ri Cristo. Cambi'ij c'u chawe lic chachuk'ubej awib che u'anic ronoje ri ya'om chawe ruma ri unimal rutzil uc'u'x ri Kanimajawal Jesucristo. 2Janipa c'u ratom chwe chwi ri c'utunic nu'anom chiquiwach ruq'uiyal winak, e chak'atisaj ri' paquik'ab rachijab cubul ac'u'x cuc' ruma caquirik uc'utic wa' chiquiwach ri jujun chic.

3Ec'u ri'at, chacuyu ronoje ri c'axc'obic cape pawi' pacha' cu'an juna sakil soldado re ri Kanimajawal Jesucristo. 4Ma juna sakil soldado na carok'otaj ta can ri takom che cha' e que'ec che u'anic ri caraj rire; ri cu'ano e xew lic coc il che ri chac ya'tal puk'ab ruma rutakanel. 5Jec'ula', junok cac'alalic#2:5 Ri ch'a'tem pa ri ch'a'tem griego e “atleta” o “deportista”. Ri quec'alalic, ri caqui'an quib pa t'o'y, ri quebetz'an pa pelot o ri caquijunimaj quichuk'ab chiquiwach, rique e “atleta”. na cuch'ac ta ri' ri premio we na cac'alal ta e chirij rusuc' pacha' ri cutz'onoj wa etz'anem. 6Jec'uri'la', juna aj chac xew cu'an molonic we nabe na cuchacuj rulew. 7Timoteo, lic chach'obo rakan wa cambi'ij chawe; we ca'an wa', ri Kanimajawal cuya ana'oj cha' camaj usuc' ronoje.

8E c'una chac'u'x ronoje ri xric'owibej ri Kanimajawal Jesucristo, ri xupetebej lo che ri rey David y ri xc'astaj lo chiquixo'l tak ri ecaminak jela' pacha' ri cubi'ij ri Utzilaj Tzij cantzijoj ri'in. 9Yey e ruma cantzijoj wa Utzilaj Tzij, in c'o pa c'axc'obic yey inya'om pa cárcel pacha' in jun achi lic in aj palajiy tzij. Tob c'u ri'in inya'om pa carena, ri Utzilaj Tzij re ri Dios na yututal taj, ma xaki que'ec utzijoxic. 10Canch'ij c'u uchuk'ab ronoje ri c'axc'obic cape panuwi' xa ruma c'ax quebenuna' tak ri ebucha'om ri Dios, cha' rique caquirik ri colobetajic na jinta utakexic, ri caya'i' chique ri cacubi' quic'u'x ruc' ri Kanimajawal Jesucristo.

11Wa' wa ch'a'tem lic katzij:

We xojcam ruc' ri Cristo,#2:11 Wa' e que'elawi: We xkaya can ri ojer kabinic kasilabic, e pacha' oj caminak chi che ri mac.

cojc'asi' na ri' ruc' Rire.

12We cakach'ij uchuk'ab ri c'axc'obic ruma Rire,

chikawach apanok cojtakan ruc' Rire chila' chicaj.

No'j we ri'oj cakabi'ij na oj ta re Rire,

jela' cu'an Rire kuc' chikawach apanok,

cubi'ij c'u ri' na reta'am ta kawach.

13We ri'oj na cacubi' ta kac'u'x ruc';

na ruc' ta c'u ri', Rire lic e cu'an janipa ri ubi'im canok,

ma Rire na cu'an ta c'ana rak'ubal.

Ri jusuc' quibinic quisilabic ri quicojom rubi' ri Cristo

14Chacuxtaj wa' chique ri e raj chac ri Dios y lic chebapixabaj pa rubi' Rire, cha' mech'o'jin chwi tak ch'a'tem na jinta utz cuc'am lok, ma xew cuc'am lo sachibal na'oj chique ri quetaw re. 15Ri'at lic chachuk'ubej awib cha' lic jusuc' rabinic asilabic chwach ri Dios y jela' at jun aj chac na jinta c'o catq'uix che, e xaki catzijoj chi jusuc' ri Tzij re ri K'ijsak. 16Ma'an awe'at cuc' ri quech'a't chwi tak ri na re ta ri Dios y na jinta uchac. Ma ri que'anaw re wa', e quetajin che resaxic quib chirij ri Dios. 17Yey ri quich'a'tem cusachisaj ri quina'oj tak ri quetaw re, e pacha' juna yabil cak'ayisanic. Y e xqui'an wa' ri Himeneo y ri Fileto. 18Rique xquiya can ri K'ijsak ma caquibi'ij ri c'astajibal que ri e re ri Cristo, ya xu'ano.#2:18 Rique caquibi'ij, tob ri Dios cuya jun c'ac' c'aslemal chike wo'ora, na cuya ta jun c'ac' cuerpo chike chikawach apanok. Ruma c'u ri caquic'ut rique, e c'o jujun catajin usachic quina'oj puwi ri K'ijsak. 19Na ruc' ta c'u ri', rutinamit ri Dios lic tiquil chi utz pa ri K'ijsak, ma rique e pacha' juna cowilaj utiquibal juna ja pa tz'ibital wi: «Ri Dios lic reta'am china ri e re Rire»#Nm. 16:5 y «Conoje c'u ri caquibi'ij e re ri Cristo, chirajawaxic caquesaj quib che tak ri na jusuc' taj.»

20Chupa juna nimalaj ja c'o tak ri chapabal re oro y re plata, ri lic xa k'alaj pa cachapabex wi; yey c'o ne tak chapabal re che' y ulew na lic ta chom, ri xa tob pa cachapabex wi. 21Jec'uri'la' e junok caresaj rib che tak ri mac, chom ruchapabexic ca'an ruma ri Dios, chom u'anom rubinic usilabic y lic c'o uchac che ri Kanimajawal, ma curik u'anic uq'uiyal chomilaj chac.

22Timoteo, chatanimaj c'u chwach ronoje tak ri rayibal re tzakibal que ralabo. Yey junam cuc' conoje ri caquilok'nimaj rubi' ri Kanimajawal Jesucristo ruc' ronoje quic'u'x, e chatijoj awib che u'anic ri lic jusuc' chwach ri Dios, cubula ac'u'x ruc', chac'utu ri rutzil c'u'xaj y chatc'ola chi utzil chomal cuc' conoje. 23Maya axiquin chique ri caquichapala' quib pa ch'a'tem na jinta uchac, ma aweta'am chic la' xa cuc'am lo ch'a'oj. 24Ma e juna aj chac re ri Kanimajawal Jesucristo chirajawaxic che na aj ta ch'a'oj, xaki utz uc'u'x cuc' conoje, lic cac'utun chi utz y lic nim uc'u'x cuc' conoje. 25Ruc' chomilaj ch'a'tem quebuk'il tak ri caquiyac quib chirij ri K'ijsak; ma c'axtaj ruc' wa', ri Dios cuya chique caquitzelej quitzij chwach y caqueta'maj ri K'ijsak, 26y jec'ula' quebel puk'ab ritzel winak y na caqui'an ta chic sa' ri caraj rire.

Currently Selected:

2 Timoteo 2: acrT

Highlight

Copy

Compare