NA SERE I SOLOMONI 7
7
1Na kena rairai vinaka na yavamu sa vakaivava, ko iko na luvena yalewa na tui!
A loki ni sagamu sa vaka na ka ni ukuuku,
Na cakacaka ni ligana na matai vuku.
2A nomu vicovico sa vaka na bilo momokiti,
Sa sega ni yali kina na waini:
Na ketemu sa vaka nai binibini witi
Sa voliti e na viavia.
3A sucumu ruarua sa vaka na me kila lalai e rua sa drua.
4A domomu sa vaka na vale tabua cecere;
A matamu sa vaka na drano mai Esiponi, mai na matamata-ni-koro ni Paci-rapimi:
A ucumu sa vaka na vale-cecere mai Lepanoni
Ka sa donui Tamasiko.
5A ulumu sa vakataki Kameli,
Kei na drau ni ulumu sa vaka na ka lokaloka;
Sa vauci tu na tui e na drau ni ulumu!
6Na nomu matavinaka kei na nomu rekitaki,
Ko iko ka'u sa lomana!
7A kemu balavu oqo sa vakatauvatani kei na balabala,
Kei na sucumu sa vaka nai soso vua ni vaini.
8Au a kaya, Ka'u na kaba na balabala,
Ka'u na taura na tabana:
Ia na sucumu ena qai vaka nai soso vua ni vaini,
Kei nai boi ni nomu i cegu ena vaka na moli;
9Kei na gusumu ena vaka na waini vinaka sara,
Na mena ka'u sa lomana, sa vinaka na kena gunuvi,
A sa kitaka na tebenigusudra era sa moce me ra vosa mai.
10Au sa nona ka'u sa lomana, ka sa vinakati au ko koya.
11Ko iko ka'u sa lomana, daru mai lako yani ki na veiwere;
Me daru la'ki tiko e na veikoro lalai:
12Me daru sou ka lako ki na veiwere-ni-vaini;
Me daru raica se tubu vinaka na vaini se sa seraki na vua ni vaini vou,
Ka kubu mai na pomekaraneti, se segai:
Maikea talega ka'u na solia vei iko na noqu loloma.
13Sa boiboi mai na tuta,
A sa toka mai nodatou na vuata vinaka kecega, e vou ka matua,
O koya ka'u sa binia me nomu ko iko ka'u sa lomana.
Currently Selected:
NA SERE I SOLOMONI 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
