NA SERE I SOLOMONI 5
5
1Au sa lako mai ki noqu were, na wekaqu, na watiqu:
Au sa vetia vata na noqu mura kei na noqu kau boi vinaka;
Au sa kania vata na qau qa ni oni kei na oni;
Au sa gunuva vata na mequ waini kei na mequ wai-ni-sucu:
Dou kana, na veiwekani;
Dou gunu, io, dou gunu vakalevu, na daulomani.
2Au sa moce, ka sa yadra na lomaqu:
A domo i koya ka'u sa lomana sa tukituki tu, a sa kaya,
Dolavi au, na wekaqu, ka'u lomana, na noqu ruve, na noqu ka savasava:
Ni sa wai walega na uluqu e na tegu, Ia na drau ni uluqu e na tegu ni bogi.
3Au sa luvata na noqu kote; au na curumaka tale vakaevei?
Au sa vuya oti na yavaqu; au na vaqeleqelewataka tale vakaevei?
4O koya ka'u sa lomana sa daramaka na ligana ki na duba ni katuba,
Ia sa yavavala na yaloqu e na vukuna.
5Au a tu cake me dolavi koya ka'u sa lomana;
Ka sa tiri na mura mai na ligaqu,
Kei na mura boi vinaka mai nai qaqalo ni ligaqu,
Ki nai tautauri ni loka.
6Au a dolavi koya ka'u sa lomana;
Ia ka sa lesu yani ko koya ka'u sa lomana, a sa lako tani:
Sa yali na yaloqu ni sa vosa ko koya:
Au a qarai koya, ia ka'u sa sega ni kunei koya;
Au a kacivi koya, ka sa sega ni rogo mai vei au.
7A ra sa raici au nai vakatawa era daulako voli e na koro,
Era sa yaviti au, era sa vakamavoataki au;
Ko ira nai vakatawa ni bai era kauta tani na noqu pulou.
8Au sa vakaroti kemudou, na goneyalewa ni Jerusalemi, kevaka dou sa kunei koya ka'u sa lomana,
Mo dou tukuna vua, ni'u sa mate e na loloma.
9A cava sa uasivi kina ko koya ko sa lomana vua na tani sa lomani,
Ko iko sa matavinaka cake vei ira na yalewa?
A cava sa uasivi kina ko koya ko sa lomana vua na tani sa lomani,
Mo vakaroti keitou kina vakaoqo?
10O koya ka'u sa lomana sa vulavula ka damudamu,
Ka sa uasivi cake vei ira na tani era lewe oba.
11A uluna sa vaka na koula dina sara,
A drau ni uluna sa veiveliyaki, ka loaloa me vaka na reveni.
12A matana sa vaka na mata ni ruve mai na uciwai;
Sa vui e na wai-ni-sucu, ka lelevu vinaka tu.
13A baluna sa vaka na loga ni kau boi vinaka, na se ni kau boi vinavinaka:
A tebenigusuna sa vaka na viavia, sa tiri maikina na mura boi vinaka.
14A ligana sa vaka na mama koula sa vono perili:
A yagona sa vaka na tabua lumilumisa sa botani e na safaia:
15A yavana sa vaka na duru vatu e veivolavolai, sa tu e nai tutu koula dina:
A kenai rairai sa vakataki Lepanoni, sa tautani me vaka na vu ni sitari.
16A gusuna sa kamikamica sara: io, sa ka domoni sara ko koya.
Sai koya oqo ka'u sa lomana, ia sai koya oqo na wekaqu,
Koi kemudou na goneyalewa ni Jerusalemi.
Currently Selected:
NA SERE I SOLOMONI 5: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
