NAI VAKATAKILA I JONI 3
3
Ai vola vei ira na kai Sariti, 1-6. Ai vola vei ira na kai Filatelifia, 7-13. Ai vola vei ira na kai Leotisea, 14-22.
1Mo volavola talega vua nai talatala ni soqosoqo lewe ni lotu mai Sariti: Sa tukuna na veika oqo ko koya sa taura na Yalo ni Kalou e lewe vitu, kei na kalokalo e vitu: Au sa kila na nomu cakacaka, ni sa yacamu walega na bula, o sa mate ga. 2Mo vakatawa, ka vakaukauwataka na ka sa vo vei iko, o koya sa voleka ni mate; ni'u sa sega ni kunea na nomu cakacaka me vinaka sara e na mata ni Kalou. 3Vakananuma na nomu vakabauta kei na nomu rogoca, ka taura matua, ka veivutuni. Ia kevaka ko na sega ni vakatawa, au na lako yani vei iko me vaka na daubutako, ia ko na sega ni kila na tiki-ni-siga ka'u na lako yani kina vei iko. 4Sa tu ga vei iko mai Sariti e lewe vica ga era sa sega ni vakadukadukalitaka na nodra i sulu; a ra na lako voli kei au e nai sulu vulavula: ni ra sa yaga.
5O koya sa gumatua, ena vakaisulu e nai sulu vulavula; au na sega ni bokoca na yacana mai nai vola ni bula, ia ka'u na tukuna na yacana e na mata i Tamaqu, e na matadra talega na nona agilose. 6O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu.
7MO volavola talega vua nai talatala ni soqosoqo lewe ni lotu mai Filatelifia: Sa tukuna na veika oqo ko koya sa yalosavasava, o koya sa dina, o koya sa taura nai dola i Tevita, o koya sa dolava, ka sega na tamata me sogota; ka sogota, ka sega na tamata me dolava: 8Au sa kila na nomu cakacaka: (raica, au sa dolava e matamu e dua na katuba, ka sega na tamata sa sogota rawa:) sa tu vakalailai ga vei iko na kaukauwa, ia ko sa taura tikoga na noqu vosa, ka sa sega ni cakitaka na yacaqu. 9Raica, ka'u na lewai ira nai vavakoso i Setani, era sa kaya era sa Jiu, ia ka ra segai, era sa lasu ga; raica, ka'u na lewa vei ira me ra lako mai me ra cuva ki yavamu, me ra kila ni ka'u a lomani iko. 10Ni ko sa vakabauta na noqu vosa mo vosota ga, ka'u na maroroi iko talega e na gauna ni dauveivakatovolei, ko ya ena lako mai ki vuravura taucoko, me vakatovolei ira sa tiko e vuravura. 11Raica, ka'u na lako vakatotolo yani: taura matua na ka sa tu vei iko, me kakua ni kauta na nomu i sala vakaturaga na tamata tani.
12Au na lesi koya sa gumatua me duru e na vale ni noqu Kalou, ia ena sega ni lako tani yani ki tautuba: ia ka'u na volai koya e na yaca ni noqu Kalou, kei na yaca ni koro ni noqu Kalou, ko Jerusalemi vou, o koya sa lako sobu mai lomalagi mai vua na noqu Kalou: ia na yacaqu vou. 13O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu.
14MO volavola talega vua nai talatala ni soqosoqo lewe ni lotu mai Leotisea: Sa tukuna na veika oqo na Emeni, o koya sa dautukuna na ka dodonu ka dina, ai vakatekivu ni cakacaka ni Kalou: 15Au sa kila na nomu cakacaka, o sa sega ni batabata se katakata: au sa vinakata mo batabata se katakata. 16Ni ko sa katakata vakalailai ga, ka sega ni batabata se katakata, ka'u na luaraki iko mai na gusuqu. 17Ni ko sa kaya tiko, Au sa vutuniyau, ka levu tu na noqu i yau, ka sega na ka ka'u sa dravudravua kina; ia ko sa sega ni kila ni sai iko ga na ka lomani, ka vakaloloma, ka dravudravua, ka mataboko, ka luvawale: 18au sa vakavulici iko mo mai volia vei au na koula sa vakatovolei e na bukawaqa, mo vutuniyau kina; kei nai sulu vulavula, mo vakaisulu kina, me kakua ni rairai na nomu luvawale e veivakamaduataki; mo lumuta talega na matamu e nai lumu ni mata, mo rai rawa. 19O ira kecega ka'u sa lomana, ka'u sa vunauca ka cudruva: mo gumatua kina, ka veivutuni. 20Raica, ka'u sa tu e na mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua, ka vakayakavi vata kaya ka na vakayakavi vata talega kei au ko koya.
21Au na solia vua sa gumatua sara me tiko vata kei au e na noqu i tikotiko-vakaturaga, me vaka ka'u sa gumatua, ka tiko sobu e nai tikotiko vakaturaga nei Tamaqu. 22O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu.
Currently Selected:
NAI VAKATAKILA I JONI 3: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
