NAI VAKATAKILA I JONI 2
2
Ai vola vei ira na kai Efeso, 1-7. Ai vola vei ira na kai Simurina, 8-11. Ai vola vei ira na kai Perikamo, 12-17. Ai vola vei ira na kai Caetaira, 18-29.
1Mo volavola vua nai talatala ni soqosoqo lewe ni lotu mai Efeso; Sa tukuna na veika oqo ko koya sa taura na kalokalo e vitu e na ligana i matau, o koya sa lako voli e na maliwa ni tutu-ni-cina koula e vitu: 2Au sa kila na nomu i valavala, kei na nomu oca kei na nomu dauvosota, ni ko sa sega tale ni vosoti ira era sa ca; o sa vakatovolei ira talega era sa kaya era sai apositolo, a ra sa segai, o sa kilai ira ni ra sa daulasu ga: 3ia ko sa lomavinaka ga, ka vosota tiko, ka oca e na vuku ni yacaqu, ka sega ni guca. 4Ia ka so ga na ka ko sa ca kina, e na vuku ni ko sa biuta na nomu loloma ka tu vei iko eliu. 5Mo nanuma ga na ka ko sa lutu tani maikina; ia mo veivutuni, ka cakava na cakacaka taumada; ia kevaka sa segai, ka'u na lako vakasauri mai vei iko, ka kauta tani na nomu i tutu-ni-cina mai na kena tikina, kevaka ko sa sega ni veivutuni. 6Ia na ka ga oqo sa tu vei iko, ni ko sa cata na nodra i valavala nai tokani i Nikola, oqori ka'u sa cata talega koi au.
7O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu: Vei koya sa gumatua ka'u na solia me kania na kau ni bula, ko ya sa tu e loma ni Parataisi ni Kalou.
8MO volavola talega vua nai talatala ni soqosoqo lewe ni lotu mai Simurina: Sa tukuna na veika oqo ko koya sa liu sara ka muri sara, o koya ka mate, a sa qai bula tale: 9A sa kila na nomu cakacaka, kei na nomu dauvakararawataki, kei na nomu dravudravua (ia ko sa vutuniyau ga), kei na nodra vosa vakacaca era kaya era sa Jiu, ka ra sa segai, era sai vavakoso i Setani ga. 10Kakua ni rerevaka e dua na ka ko na vosota: raica, na tevoro ena biuti kemudou eso ki na vale ni veivesu, mo dou vakatovolei kina; ia dou na vakararawataki ka bogi tini: dou gumatua mo dou yacova na mate, au na qai solia vei kemudou nai sala ni bula.
11O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu. O koya sa gumatua sara ena sega ni ca e nai karua ni mate.
12MO volavola talega vua nai talatala ni soqosoqo lewe ni lotu mai Perikamo: Sa tukuna na ka oqo ko koya sa taura nai seleiwau batirua: 13Au sa kila na nomu cakacaka, kei na yasana ko sa tiko kina, sa tiko talega kina nai tikotiko i Setani: ia ko sa taura matua na yacaqu, ia ko sa sega ni cakitaka na noqu lotu e na siga sa vakatusai au dina kina ko Anitipasa, o koya sa vakamatei e na kemudou maliwa, a yasana sa tiko kina ko Setani. 14Ia ka so ga na ka ko sa ca kina, e na vuku ni sa tiko vei iko ko ira era sa vakabauta nai vakavuvuli i Pelami, o koya ka vakavulici Pelaki me biuta na veivakacalai e na matadra na luve i Isireli, me ra kania na ka sa vakacabori ki na veimatakau, me ra dauyalewa talega. 15Sa tiko talega vei iko ko ira sa vakatavulica tiko na nodra i vakavuvuli nai tokani i Nikola, oqori na ka ka'u sa cata. 16Mo veivutuni mada; kevaka e segai, au na lako vakatotolo sara yani vei iko, ka veivala kei ira e nai seleiwau ni gusuqu.
17O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu: Au na solia vei koya sa gumatua, me kania na mana vuni, au na solia talega vua na vatu vulavula, a vatu ga ko ya ena volai kina na yaca vou e sega e dua me kila, o koya ga sa taura sara.
18Mo volavola talega vua nai talatala ni soqosoqo lewe ni lotu mai Caetaira: Sa tukuna na veika oqo na Luve ni Kalou, o koya sa vaka na yameyame ni buka na matana, kei na yavana e vaka na parasa makumakualiliva: 19Au sa kila na nomu cakacaka, kei na dauloloma, kei na dauveiqaravi, kei na vakadinata, kei na nomu dauvosota, kei na nomu daucakacaka; ia oqo emuri sa uasivia ko ya sa liu. 20Ia sa vica ga na ka ko sa cala kina, ni ko sa vosota na yalewa ko ya ko Jesepeli, o koya sa vakatokai koya talega me parofita, me vakavulici ira ka vecei ira na noqu tamata me ra dauyalewa, ka kania na ka sa vakacabori ki na veimatakau. 21Ia ka'u a solia vua na gauna me veivutunitaka kina na nona dautagane; a sa sega ni via veivutuni. 22Raica, ka'u na biuti koya ki nai mocemoce, kei ira era sa dauyalewa vata kaya ki na rarawa levu, kevaka era sa sega ni veivutunitaka na nodra i valavala. 23Ia ka'u na vakamatei ira na luvena e na mate; ia ena kila kina na veisoqosoqo lewe ni lotu kecega ni'u sa dikeva na ivi kei uto ni tamata; ia ka'u na solia talega vei kemudou yadua me vaka na nomudou i valavala. 24Ia ka'u sa kaya kivei kemudou, kei ira sa vo mai Caetaira, ko ira kece era sa sega ni vakabauta nai vakavuvuli oqo, ko ira era sa sega ni kila na ka titobu kei Setani, me vaka na ka era sa vosataka; au na sega ni tauca vei kemudou na ka tani e bibi. 25Ia na ka sa tu vei kemudou, dou taura matua ka malua ka'u na lako tale yani.
26Ia ko koya sa gumatua sara, ka vakabauta na noqu cakacaka me yaco mada nai vakataotioti, au na solia vua me lewa na veimatanitu: 27ia ena lewai ira ko koya e nai titoko kaukamea: ena vorolaki ira me ra matailalai me vaka na veibilo ni dautuli bilo: io, me vaka na ka ka'u sa rawata maivei Tamaqu. 28Ia ka'u na solia talega vua na kalokalo i vola siga. 29O koya sa vakadaligana, me mani rogoca sara na ka sa tukuna na Yalo Tabu kivei ira na veisoqosoqo lewe ni lotu.
Currently Selected:
NAI VAKATAKILA I JONI 2: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
