NAI VAKATAKILA I JONI 4
4
Sa tukuna ko Joni na ka vakalomalagi eso sa raica, 1-11.
1Sa oti oqo ka'u sa qai raica tale, ka raica, sa dola e dua na katuba mai lomalagi: ia na vosa taumada ka'u a rogoca sa vaka sa vosa vei au na davui; ka kaya, Lako cake mai ki ke, au na vakatakila vei iko na ka ena yaco e na gauna maimuri.
2Sa qai curumi au vakasauri na Yalo Tabu: ka raica, sa caka nai tikotiko-vakaturaga mai lomalagi, a sa dua sa tiko kina. 3Ia ko koya sa tiko kina, sa rairai me vaka na vatu jasipa kei na satiusa: a sa dua na drodrolagi sa vakavolivolita nai tikotiko-vakaturaga, sa rairai me vaka na emeralita. 4A sa ruasagavulu ka va nai tikotiko sa vakavolivolita nai tikotiko-vakaturaga: ia ka'u sa raica e lewe ruasagavulu ka va na qase sa tiko e nai tikotiko, era sa vakaisulu e nai sulu vulavula; a sa vakaisala na uludra e nai sala koula. 5A sa lako mai nai tikotiko-vakaturaga na livaliva kei na kurukuru kei na vosa; a sa vitu na cina ni buka sa caudre tiko e na mata ni tikotiko-vakaturaga, o ira oqo na Yalo ni Kalou eratou lewe vitu. 6A sa tu e na mata ni tikotiko-vakaturaga na wasa iloilo e vaka na karisitala: a sa tiko e va na ka bula e loma ni tikotiko-vakaturaga, ka vakavolivolita, a sa vakamatana kecega na yagodra na matadra kei na dakudra. 7Ia sa vaka na laioni nai matai ni ka bula, a sa vaka na luve ni pulumokau nai karua, a sa mata vakatamata nai katolu, a sa vaka na ikeli vakatabana nai kava. 8O iratou oqo na ka bula eratou sa lewe va eratou sa tauyaono na tabadratou; a sa robota na lomadratou na matadra; ia eratou sa sega ni bau cegu e na siga se na bogi, era kaya tikoga, E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula talega emuri.
9Ia ni ratou sa vakarokoroko ko iratou na ka bula ko ya vei koya sa tiko e nai tikotiko-vakaturaga, o koya sa bula tawa mudu, ka ratou sa dokai koya, ka vakavinavinaka vua, 10sa qai cuva sobu ko ira na qase e lewe ruasagavulu ka va e na mata i koya sa tiko e nai tikotiko-vakaturaga, ka vakarokoroko vei koya sa bula ga ka tawa mudu, ka biuta na nodra i sala e na mata ni tikotiko-vakaturaga, ka kaya, 11Kemuni na neitou Turaga kei na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa: ni sai kemuni ka bulia na ka kecega, era sa buli ga ka tu dei talega e na nomuni lewa.
Currently Selected:
NAI VAKATAKILA I JONI 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
