NA SAME 74
74
Sa tagi vua na Kalou ni sa ca na nona tamata, kei na nona vale tabu, e na vuku ni meca, 1-9. Sa masuta na Kalou me vakabulai ira, 10-23.
A Masikili i Esafa.
1Kemuni, na Kalou, a cava ko ni sa biuti keimami laivi kina ka sega ni mudu?
A cava e kubou kina na nomuni cudru vei ira na sipi ni nomuni vanua veico?
2Mo ni nanumi ira na nomuni soqosoqo, ko ni a volia eliu;
Na mataqali ni nomuni vanua, ko ni a vakabula;
Na ulu-ni-vanua ko Saioni oqo, ko ni a dautiko kina.
3Me kusarawa mai na yavamuni ki na veivakarusai sa sega ni mudu;
Ki na ka kecega sa vakacacana na meca e nomuni vale tabu.
4Era sa qoqolou na nomuni meca e na kedra maliwa na nomuni soqosoqo;
Era sa vakaduria na nodra i vakatakilakila mei vakatakilakila.
5Sa rogo eliu na tamata ni sa laveta
Na matau me dauta kau lelevu.
6Ia oqo, na cakacaka sa ceuti
Era sa qai basuka sobu vata e na matau kei nai tukituki.
7Era sa vakama na nomuni vale tabu e na bukawaqa,
Era sa vakacacana nai tikotiko ni yacamuni ni ra sa talaraka sobu ki na qele.
8Era sa kaya e lomadra, Me da vakarusai ira vata:
Era sa vakama oti na veivale ni lotu kecega ni Kalou e na vanua.
9Keimami sa sega ni raica tiko na neimami vakatakilakila:
Sa sega tale e dua na parofita:
Ka sa sega e dua vei keimami e kila se na vakaevei na kena dede.
10A cava na kena dede, na Kalou, ni na vosa ca tiko na meca?
Ena sega beka ni mudu na nodra vosacataka tiko na yacamuni na meca?
11A cava ko ni sa vakasuka tale kina na ligamuni, io, na ligamuni matau?
Mo ni cavuta tale mai na lomaseremuni ka vakarusai ira.
12Ia na Kalou sa noqu Tui mailiu,
Sa ia tiko na veivakabulai e vuravura.
13O ni a wasea na wasawasa e nomuni kaukauwa:
O ni a bola na uludra na tavuto e loma ni wai.
14O ni a bola vakalalai na ulu i livaiacani,
Ka solia me kedra kakana era tiko mai veikau.
15O ni a wasea na mataniwai kei na uciwai:
O ni a vakadiva na uciwai sa drodro vakaukauwa.
16Sa nomuni na siga, ka sa nomuni talega na bogi:
O ni a vakarautaka na rarama kei na mata-ni-siga.
17O ni a lesia nai yalayala kecega kei vuravura:
O ni a lesia na vula i katakata kei na vula i liliwa.
18I Jiova mo ni nanuma na ka oqo, ni sa vosavakacaca na meca,
Ka ra sa beca na yacamuni ko ira na mataqali lialia.
19Kakua ni solia yani na yalona na nomuni ruve ki na nodra i soqosoqo nai valavala ca:
Mo ni kakua ni guilecava tikoga nai soqosoqo ni nomuni tamata dravudravua.
20Mo ni nanuma na vosa ni yalayala:
Ni sa robota na veiyasana butobuto kei vuravura na nodra veivale na dauveivakararawataki.
21Me ra kakua ni lesu tale ka vakamaduataki ko ira era vakacacani:
Me ra dui vakavinavinaka ki na yacamuni ko ira na rarawa kei na dravudravua.
22Mo ni tu cake, na Kalou, mo ni veileti e na vukumuni:
Mo ni nanuma ni sa vosavakacataki kemuni e na veisiga na tamata lialia.
23Mo ni kakua ni guilecava na domodra na nomuni meca:
Sa lako cake tikoga na nodra ue era tu cake me veivala kei kemuni.
Currently Selected:
NA SAME 74: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
