NA SAME 73
73
Sa tukuna ni sa sega ni kila nai balebale ni nodra tiko vinaka sara nai valavala ca, 1-12. Ni sa yalolailai kina, sa lako ki na vale ni Kalou, ka sa qai kila; ka sa reki ni ra sa nonai yau na Kalou, 13-28.
A Same i Esafa.
1Sa yalololoma vakaidina na Kalou vei ira na Isireli,
Io, vei ira era sa yalosavasava.
2Ia koi au, sa voleka ni lako sese na yavaqu;
Sa voleka ni tidara na noqu i lakolako.
3Ni'u a vuvutaki ira na lialia,
Ni'u a raica na nodra tiko vinaka na tamata caka ca.
4Ni sa sega vei ira nai vau ni mate:
Ka sa dei ga na nodra kaukauwa.
5Era sa sega ni rarawa me vaka na tamata tani;
Ka ra sa sega ni cudruvi e na mate me vaka na tamata tani.
6O koya oqo sa taubeni ira kina na viavialevu me vaka e dua nai taube;
Sa tutuvitaki ira nai valavala vakaukauwa me vaka nai sulu.
7Sa levu tu na matadra e na uro:
Na nodra ka sa sivita na nanuma ni lomadra.
8Era sa dauveivakalialiai, ka ra vosataka vakaca nai valavala kaukauwa:
Era vosa vakaviavialevu.
9Era sa vosavakacataka na lomalagi,
Ka sa lakovi vuravura na yamedra.
10O koya oqo era sa lesu maikina ki ke na nona tamata:
Ka sa loba vei ira na wai me sinai sara na medra bilo.
11Era sa kaya, Sa kila vakaevei na Kalou?
Ka sa vuku vakacava ko Koya sa Cecere sara?
12Raica, ko ira oqo na tamata i valavala ca,
Ka ra sa tiko vinaka ga e vuravura; ka sa levu cake tiko na nodra i yau.
13E dina sa sega ni yaga ni'u sa vuya na lomaqu,
Ka vuluvulu e nai valavala savasava.
14Ni'u sa yaviti tiko e na siga ka bogi,
Ka cudruvi e na mataka kecega.
15Kevaka ka'u sa kaya, Au na vosa vakaoqo;
Raica, au na vakacalai ira na mataqali ni nomuni tamata.
16Ni'u a nanuma me'u kila na ka oqo,
Sa ka dredre sara vei au;
17Ia ni ka'u a qai lako ki na vale tabu ni Kalou;
Ka'u a qai kila rawa na kedrai vakataotioti.
18E dina ga kemuni a lesi ira ki na sala titidara;
O ni sa biuti ira sobu ki na veivakarusai.
19Sa vaka na liva na nodra vakarusai mai!
Era sa rusa ka oti sara e na ka rerevaki.
20Me vaka na tadra ni sa yadra maikina e dua;
Sa vakakina, kemuni na Turaga, ni kemuni sa yadra, ko ni na beca na nodra yaloyalo.
21Ni sa rarawa na yaloqu,
Ka sa vakararawataki na lomaqu.
22Au a lialia vakaoqo, ka sega ni vuku;
Au a vaka na manumanu e matamuni.
23Ia ka'u sa tiko ga kei kemuni e na veisiga:
O ni sa taura tiko na ligaqu i matau.
24O ni na tuberi au e na nomuni lewa,
Ka kauti au emuri ki na vanua vakaiukuuku.
25O cei tale e yaga vei au mai lomalagi?
Ka sa sega e vuravura ka'u sa domona, oi kemuni duaduaga.
26Sa malumalumu mai na yagoqu kei na lomaqu:
Ia, na Kalou na kaukauwa ni lomaqu, kei na noqu i votavota ka sega ni mudu.
27Raica, era na rusa ko ira kecega era sa tiko vakayawa vei kemuni:
O ni sa vakarusai ira kecega era sa biuti kemuni me ra gole tani.
28Ia koi au, e yaga vei au me'u toro vua na Kalou:
Au sa vakararavi oti vua na Turaga ko Jiova,
Me'u tukuna kina na nomuni cakacaka kecega.
Currently Selected:
NA SAME 73: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
