NA SAME 65
65
Sa vakavinavinaka vua na Kalou ni sa vakabulai ira, 1-5. Sa kaukauwa na Kalou, 6-8, ka yalololoma, 9-13.
Vua na Domo-ni-sere. A Same i Tevita.
1Sa waraki kemuni tiko, na Kalou, na vakavinavinaka mai Saioni:
Ena vakayacori talega na ka ka'u sa bubului kina vei kemuni.
2Oi kemuni sa daurogoca na masu,
Ena toro mai vei kemuni na tamata kecega.
3Sa gumatua vei au na vosa ca:
A neimami valavala ca ko ni na vuya laivi.
4Sa kalougata na tamata ko ni sa digitaka, ka kauta voleka mai,
Me tiko ga e na nomuni lomanibai:
Keimami na vakamamautaki e na ka vinaka mai na nomuni vale,
Io, na nomuni vale tabu.
5E na ka dodonu e rerevaki ko ni na vosa vei keimami,
Na Kalou na neimami vakabula;
Oi kemuni era sa vakararavi kina e nai yalayala kecega kei vuravura, kei ira talega era tiko vakayawa e loma ni wasawasa:
6O koya sa vakataudeitaka na veiulu-ni-vanua e na nona kaukauwa;
Ni sa vauci tu e na kaukauwa:
7Ka sa vakamaravutaka na cudru ni wasawasa, kei na vadugu ni biau,
Kei na nodra ue na tamata.
8O ira talega era tiko e nai yalayala kei vuravura era sa rerevaka na nomuni vakatakilakila:
O ni sa dauvakamarautaka na mataka ni sa kida, kei na yakavi ni sa dromu tiko na siga.
9O ni sa talevi vuravura, ka sa vakasuasuataka:
O ni sa vakavutuniyautaka
E na uciwai ni Kalou,
Ko ya sa sinai tu kina na wai;
O ni sa solia vei ira na sila, ni kemuni sa vakarautaka oti na vanua.
10O ni sa vakasuasuataka vakalevu na kena bukebuke;
O ni sa vakatauca na uca ki na kena tova;
O ni sa vakamalumalumutaka e na uca;
O ni sa vakalougatataka na ka e tubu kina.
11O ni sa vakaisalataka na yabaki e na nomuni loloma;
A sa tau mai na uro mai na nomuni lakolako.
12Sa tau ki na vanua veico mai lekutu:
Ka sa reki tu na veiulu-ni-koro e na veiyasana kecega.
13Sa robota na vanua veico na sipi;
Ia na veibuca sa roboti tu e na sila;
Era kaila e na reki, io, era sere tiko.
Currently Selected:
NA SAME 65: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
