NA SAME 66
66
Me ra vakavinavinaka vua na Kalou na lewe ni veivanua, ka cuva vua, ni sa lewa na ka kecega ko koya, 1-7. Ka sa levu na nona loloma vei ira na nona tamata, 8-12; ka levu vei Tevita, 13-20.
Vua na Domo-ni-sere. A Sere.
1Dou sere vakadomoilevu vua na Kalou, na veivanua kecega:
2Dou seretaka na yacana ka daurogorogo vinaka:
Dou vakaiukuukutaka na vakavinavinaka vua.
3Dou kaya vua na Kalou, A kena rerevaki na nomuni cakacaka!
E na vuku ni nomuni kaukauwa levu era na vakamalumalumutaki ira vei kemuni na nomuni meca.
4Era na cuva vei kemuni na kai vuravura kecega,
Ka sere vei kemuni;
Era na serevaka na yacamuni. Sela.
5Dou mai raica na cakacaka ni Kalou:
Sa ka rerevaki na nona cakacaka vei ira na luve ni tamata.
6Sa vukica na wasawasa me vanua mamaca:
Era a lakova na wai levu e na yavadra:
E na yasana ko ya eda a rekitaki koya.
7Sa lewa ko koya e na nona kaukauwa ka sega ni mudu;
Sa raica tiko na veimatanitu na matana:
Me ra kakua ni vakalevulevui ira na yalovakatani. Sela.
8Dou vosavinakataka na noda Kalou, oi kemudou na veimataqali,
Ka vakarogorogoya na vakavinavinaka vua:
9O koya sa maroroya tikoga na noda bula,
Ka sega ni laiva na yavada me yavalati.
10Ni kemuni sa vakatovolei keimami, na Kalou.
O ni sa vakatovolei keimami, me vaka sa vakatovolei na siliva.
11O ni a kauti keimami ki loma ni lawa,
O ni a tauca nai colacola bibi e daku i keimami.
12O ni a cakava na tamata me ra ladeva na ulu i keimami, ni ra vodo ose tiko;
Keimami a lako e na loma ni bukawaqa e loma ni wai talega:
Ia ko ni a kauti keimami ga ki na vanua vinaka.
13Au na curuma na nomuni vale ka kauta nai soro kama;
Au na vakayacora vei kemuni na ka ka'u a bubului kina,
14Ko ya sa cavuta na tebenigusuqu,
Ka sa vosataka na gusuqu, ni'u a vakararawataki.
15Au na vakacabora vei kemuni mei soro kama na manumanu uro,
Kei na sipi tagane me ka boi vinaka;
Au na vakacabora na pulumokau kei na me. Sela.
16Dou toro mada mai mo dou rogoca, oi kemudou kecega sa rerevaka na Kalou,
Ka'u na tukuna na ka sa cakava ko koya e na vuku ni yaloqu.
17Au a tagi vua e na gusuqu,
Ka vakalevulevui koya e na yamequ.
18Kevaka ka'u goleva e lomaqu nai valavala ca,
Ena sega ni rogoci au na Turaga:
19Ia sa rogoci au vakaidina na Kalou;
Sa vakarorogo ki na domo ni noqu masu.
20Me vakavinavinakataki na Kalou,
Ni sa sega ni biuta tani na noqu masu, se na nona loloma vei au.
Currently Selected:
NA SAME 66: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
