NA SAME 143
143
A masu sa ia e na gauna ni veivakacacani.
A Same i Tevita
1Ni rogoca na noqu masu, Jiova vaqara daligamuni ki na noqu kerekere:
Mo ni vakarorogo vei au e na nomuni yalodina, kei na nomuni yalododonu.
2Ia mo ni kakua ni lewai au na nomuni tamata:
Ni na sega ni vakadonui e matamuni e dua na tamata sa bula.
3Ni sa vakacacana na yaloqu na meca;
Sa buturaka sobu na noqu bula ki na soso;
Sa lewai au me'u tiko e na vanua butobuto, me vakataki ira era sa mate makawa.
4O koya sa luvu kina na yaloqu e lomaqu;
Sa vakaloloma e lomaqu na yaloqu.
5Au sa nanuma na gauna makawa;
Au sa vakanananu ki na nomuni cakacaka kecega;
Au sa vakanananu vakalevu ki na cakacaka ni ligamuni.
6Au sa dodoka yani na ligaqu vei kemuni;
Sa viagunu vei kemuni na yaloqu, me vaka na vanua dravuisiga. Sela.
7Mo ni rogoci au vakusarawa, Jiova: sa ciba na yaloqu:
Mo ni kakua ni vunia vei au na matamuni,
De'u na vakataki ira era sa lako sobu ki nai bulubulu.
8Mo ni vakarogoya mai kivei au na nomuni loloma e na mataka;
Ni'u sa vakararavi vei kemuni;
Mo ni vakatakila vei au na sala me'u lako kina;
Ni'u sa laveta cake na yaloqu vei kemuni.
9Ni vakabulai au, Jiova, maivei ira na noqu meca:
Au sa dro vei kemuni mo ni vunitaki au.
10Ni vakavulici au me'u cakava na nomuni lewa; ni sai kemuni na noqu Kalou:
Sa yalololoma na Yalomuni; me tuberi au ko koya e na vanua dodonu.
11E na vuku ni yacamuni, Jiova, mo ni vakabulabulataki au:
E na vuku ni nomuni yalododonu mo ni kauta tani na yaloqu mai na ka rarawa.
12Ia e na nomuni yalololoma mo ni muduki ira laivi na noqu meca,
Ka vakawabokotaki ira era vakararawataka na yaloqu:
Ni'u sa nomuni tamata.
Currently Selected:
NA SAME 143: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
