NA SAME 109
109
Sa tukuna na nona meca, ko Tevita 1-20; ka masu vua na Turaga, 21-31.
Vua na Domo-ni-sere. A Same i Tevita.
1Mo ni kakua ni galu, na Kalou ka'u dauvakavinavinaka kina;
2Ni ra sa dalaga vei au ko ira nai valavala ca kei ira na dauveivakaisini:
Era sa vosataki au e na yame lasulasu.
3Era sa vakavolivoliti au e na vosa ni veicati;
Ka veivala kei au ka sega na vuna.
4Era sa meca vei au me kenai sau ni noqu loloma:
Ia koi au, ka'u daumasu ga.
5Era sa caka ca vei au mei sau ni ka vinaka,
Ka ra cati au mei sau ni noqu loloma.
6Mo ni lesia na tamata ca me lewai koya:
Ia me tu mai na ligana i matau ko Setani.
7Ni sa lewai ko koya, me vakacalai ga;
Ia me wili na nona masu me ka ca ga.
8Me kakua ni vuqa na nona siga;
Ia me dua tani me taura na nonai lesilesi.
9Me ra kakua ni vakatamani ko ira na luvena,
Me sa yada talega na watina.
10Me ra luveniyali voli na luvena ka vosai kedra:
Me ra qara kedra mai na nodra vanua dausiga.
11Me kauta tani na nona ka kecega na dauvakasaurara;
Ka me ra betiraka na nona cakacaka na kai tani.
12Me kakua e dua me yalololoma vua:
Ia me kakua e dua me lomana na luvena sa luveniyali.
13Me ra kawaboko na nona kawa;
Io e nai tabatamata emuri me bokoci laivi na yacadra.
14Me nanuma ko Jiova na nodra caka cala na tamana;
Ia me kakua ni bokoci nai valavala ca i tinana.
15Me ra tu ga e na mata i Jiova e na veisiga,
Me muduka tani ko koya e vuravura na ka era nanumi kina.
16Ni sa sega ni nanuma ko koya me ia na cakacaka loloma,
Ia sa vakacacana ga na tamata sa rarawa ka dravudravua,
Me vakamatea na tamata sa ramusu na yalona.
17Ni sa vinakata na veivatonaki ko koya, sa yaco ga vua;
Ni sa sega ni vinakata na vosa vinaka, me yawa sara vakakina vua.
18Ni sa vakasulumi koya e na veivatonaki me vaka e nai sulu,
Me curuma na ketena me vaka na wai,
Kei na suina talega me vaka na waiwai.
19Me tutuvitaki kina me vaka e nai sulu sa tutuvi kina,
Kei nai vau ni sulu sa vauci tiko kina ko koya.
20Me sauma vakaoqo na noqu meca ko Jiova,
Vei ira talega era sa vosacataka na yaloqu.
21Ia koi kemuni Jiova na Kalou, mo ni cakacaka e na vukuqu, e na vuku ni yacamuni:
Ni sa yaga na nomuni yalololoma, mo ni vakabulai au.
22Ni'u sa malumalumu ka dravudravua
Ka sa mavoa e lomaqu na yaloqu.
23Au sa lako yani me vaka na yaloyalo ni sa lumaluma na siga:
Au sa veikauyaki me vaka na vodre.
24Sa malumalumu na duruqu e na daulolo:
Ka sa lutu sobu na yagoqu.
25Era sa vosacataki au talega ko ira:
Ni ra raici au era kurea na uludra.
26Mo ni vukei au, Jiova na noqu Kalou;
Mo ni vakabulai au me vaka na nomuni yalololoma:
27Me ra kila ni sa ligamuni ga oqo;
Ni sai kemuni Jiova, ka cakava.
28Me ra ia na veivatonaki ko ira, ia mo ni vosa vinaka ga:
Ni ra tu cake, me ra vakamaduataki; ia me reki ga na nomuni tamata.
29Me ra vakaisulutaki e na madua ko ira na noqu meca,
Ia me ra solei tutuvi e na ka era madua kina me vaka e nai sulu.
30Au na vakavinavinaka vakalevu vei Jiova e na gusuqu;
Io, ka'u na vakavinavinaka vua e na kedra maliwa na lewe vuqa.
31Ni na tu ko koya mai na liga i matau ni tamata dravudravua,
Me vakabulai koya maivei ira era sa vakalewai koya.
Currently Selected:
NA SAME 109: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
