NA SAME 105
105
Sa vakarota na vakavinavinaka vua na Kalou, e na vuku ni nona lewa, kei na nona cakacaka mana eliu.
1Dou ia na vakamolimoli vei Jiova; dou masuta na yacana:
Dou tukuna voli vei ira na tamata na nona cakacaka.
2Dou sere vua, dou seretaka vua na same:
Dou veitukutukunitaka na nona cakacaka mana kecega.
3Dou vakacaucautaka na yacana tabu:
Me marau na lomadra era sa qaravi Jiova.
4Dou vakasaqarai Jiova, kei na nona kaukauwa:
Dou vakanamata tikoga vua.
5Dou nanuma na nona cakacaka e veivakurabuitaki sa cakava ko koya;
Ia, na nona cakacaka mana, kei na lewa ni gusuna;
6Oi kemudou na kawa i Eparaama na nona tamata,
Kei na kawa i Jekope sa digitaka ko koya.
7O koya ga ko Jiova na noda Kalou:
Sa vakayacori na nona lewa e vuravura taucoko.
8Sa daunanuma ko koya na nona veiyalayalati ka tawa mudu,
Na vosa ka vakarota me yacova nai tabatamata e udolu:
9Na veiyalayalati ka cakava kei Eparaama,
Kei na nona bubului vei Aisake;
10Ka sa vakadeitaka vei Jekope mei vunau,
Ia vei Isireli me veiyalayalati e sega ni oti:
11Ka sa kaya, Au na solia vei iko na vanua ko Kenani,
Nai yalayala ni nomu i votavota:
12Ni ra sa lewe lailai ga na tamata;
Io, ni ra lewe lailai sara, ka vulagi kina.
13Ni ra lako voli mai na dua na vanua ki na dua tani na vanua,
Mai na dua na matanitu ki na dua tani na matanitu;
14Sa sega ni laiva e dua na tamata me vakasaurarataki ira:
Ia sa vunauci ira na tui e na vukudra;
15A sa kaya ko koya, Dou kakua ni tarai ira ka'u sa lumuta,
Ia dou kakua ni vakacacani ira na noqu parofita.
16Sa lewa talega e dua na dausiga me kania na vanua:
Sa muduka kecega na kakana era sa bula kina.
17Sa tala e dua na tamata ko koya me liutaki ira;
Io ko Josefa, o koya sa volitaki me bobula:
18Era vakararawataka na yavana e nai vesu:
Sa vau ko koya e na sinucodo aironi:
19Ka sa yaco mada na siga sa vakayacori kina na nona vosa;
Sa vakatovolei koya na vosa i Jiova.
20Sa talaki na tui ka sereki koya;
Io ko koya sa lewai ira na matanitu sa sereki koya sara.
21Sa lesi koya me turaga ni noda vale,
Me lewa na nonai yau kecega:
22Me veitalia ga ke via vesuki ira na nona tamata turaga;
Ka me vakavukui ira na nona qase.
23Ka sa lako mai ki Ijipita ko Isireli;
Ka sa tiko vulagi ko Jekope e na vanua nei Ame.
24Ka sa vakalewevuqataki ira sara na nona tamata;
Ka sa vakaukauwataki ira ka sa malumalumu na nodra meca.
25Sa vukica na yalodra me ra cati ira na nona tamata.
Ka me ra cakacaka vaqaseqase vei ira na nona tamata.
26Sa talai Mosese ko koya na nonai talatala;
Kei Eroni ka digitaka ko koya.
27Erau a vakatakila vei ira na nonai vakadinadina,
Kei na ka mana e na vanua nei Ame.
28Sa tala ko koya na butobuto ka vakabutobutotaka;
Ka ra sa sega ni talaidredre ki na nona vosa.
29Sa vukica na nodra wai me dra,
Ka vakamatea na nodra ika.
30Sa vakatubura vakalevu na boto na nodra vanua,
E na veivale ni moce ni nodra tui.
31Sa vosa ko koya, a sa lako mai na yavusa lago tani,
Kei na kutu e na nodra veiyasana kecega.
32Sa vakatauca na uca-cevata mei sosomi ni uca,
Kei na yameyame ni bukawaqa e na nodra vanua.
33Sa yavita talega na nodra veivaivaini kei na vu ni lolo;
Ka bolaraka na kau ni nodra vanua.
34Sa vosa, ka sa lako mai na vodre,
Kei na nuve, era sa sega ni wili rawa,
35A ra sa kania kecega na co e na nodra vanua,
Ka kania na vuata ni nodra vanua.
36Sa vakamatei ira kece talega ko koya na nodra ulumatua e na nodra vanua,
Nai matai ni nodra kaukauwa kecega.
37A sa kauti ira yani na nona tamata a ra sa vakasiliva ka vakoula:
Ka sa sega e dua e na nodra veimataqali sa malumalumu:
38Sa reki ko Ijipita ni ra sa lako tani:
Ni sa kani ira na rerevaki ira.
39Sa tevuka ko koya e dua na o me nodra i vakaruru;
Kei na bukawaqa me vakararamataki ira e na bogi.
40Era sa kerea, ka sa kauta mai ko koya na toa ni veikau,
Ka sa vakamamautaki ira e na madrai ni lomalagi.
41Sa vida na uluvatu ko koya, a sa vure maikina na wai;
Sa dave e na vanua dravuisiga me vaka na uciwai.
42Ni sa nanuma ko koya na nona veiyalayalati tabu,
Kei Eparaama na nona tamata.
43A sa kauti ira yani na nona tamata ka ra sa reki,
Io na nona digitaki ka ra sa marau;
44Sa solia vei ira na nodra vanua na veimatanitu:
Ka ra sa taukena na nodra cakacaka na tamata;
45Me ra vakabauta kina na nonai vakaro,
Ka kitaka tiko na nona vunau.
Dou ia vei Jiova na vakavinavinaka.
Currently Selected:
NA SAME 105: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
