NA SAME 106
106
Me ia na vakavinavinaka vua na Turaga, 1-3. Sa masu ko koya, 4,5. A nodra ca na qase eliu, kei na loloma ni Kalou, 6-46. Sa masu ka vakavinavinaka, 47,48.
1Dou ia vei Jiova na vakavinavinaka.
Dou vakamolimoli vei Jiova; ni sa yalovinaka;
Ni sa sega ni mudu na nona loloma.
2O cei sa tukuna rawa na cakacaka kaukauwa i Jiova?
O cei sa vosataka rawa na nona vinaka kecega?
3Sa kalougata ko ira era vakabauta na lewa dodonu,
Kei koya sai valavala dodonu e na veigauna kecega.
4Mo ni nanumi au, Jiova, e na loloma ko ni sa daulomani ira kina na nomuni tamata:
Mo ni lako mai vei au ka vakabulai au;
5Me'u raica na nodra vinaka na tamata ko ni sa digitaka,
Me'u marau e na nodra marau na nomuni matanitu,
Me'u reki vata kei ira na nomuni votavota.
6Keimami sa caka cala vata kei ira na neimami qase,
Keimami sa cakava na ka sa sega ni dodonu, keimami sai valavala ca.
7Era a sega ni kila na nomuni cakacaka mana ko ira na neimami qase mai Ijipita;
Era sega ni nanuma na kena levu ni nomuni loloma;
Ka ra sa vakacudrui koya mai na wasawasa, io mai na Wasa Damudamu.
8Ia ka sa vakabulai ira ga ko koya e na vuku ni yacana,
Me vakatakila kina ko koya na nona kaukauwa.
9Ka sa vunauca na Wasa Damudamu ko koya, a sa di mai:
Ka sa tuberi ira ko koya e loma ni wai titobu, me vaka mai lekutu.
10Ka sa vakabulai ira mai na liga i koya sa cati ira,
Ia sa vakabulai ira mai na liga ni meca.
11Ka sa luvuca na nodra meca na wai:
Sa sega e dua vei ira sa vo bula.
12Era sa qai vakabauta na nona vosa;
Era seretaka vua na vakavinavinaka.
13Sa sega ni dede era guilecava na nona cakacaka;
Era sega ni waraka na nona vosa:
14Ka ra garogaro vakalevu ga mai na lekutu,
Ka vakatovolea vakaca na Kalou mai na veikau.
15Ka sa solia vei ira ko koya na ka era kerea;
Ia sa vakayacora na tutue e na yalodra.
16A ra sa vuvutaki Mosese e na nodra i tikotiko,
Kei Eroni na tamata yalosavasava i Jiova.
17Sa kasei na vanua ka tilomi Tecani,
Ka buluta na mataqali i Epairami.
18Ka sa waqa mai e dua na buka e na nodra i soqosoqo;
Sa vakamai ira nai valavala ca na yameyame ni bukawaqa.
19Era sa cakava e dua na luve ni pulumokau mai Orepi,
Ka ra soro ki na matakau sa vakawaicalataki ka qai buli.
20A ra sa vukica na ka ka nodra i ukuuku,
Me tautauvata kei na pulumokau sa daukana co.
21Ka ra guilecava na Kalou na nodra i vakabula,
O koya ka kitaka na ka levu mai Ijipita;
22Na ka mana e na vanua i Ame,
Kei na ka rerevaki mai na Wasa Damudamu.
23Sa kaya kina ko koya ni na vakarusai ira,
Kevaka sa sega ni tu e na kedra maliwa kei na Kalou ko Mosese na nona digitaki,
Me vagolea tani na nona cudru, me kakua ni vakarusai ira.
24Io, era a beca na vanua sa vinakati sara.
Era sega ni vakabauta na nona vosa;
25A ra sa didi e nodra veivale,
Ka sega ni vakarorogo ki na vosa i Jiova.
26O koya sa dodoka kina na ligana vei ira,
Me vakabalei ira mai na lekutu:
27Me vakabalea talega na nodra kawa e na veimatanitu,
Ka dui vakasevi ira ki na veivanua.
28Era sa vakabauti Peali-Piori talega,
Ka ra kania nai madrali vei ira na mate.
29Era sa vakararawataki koya e na nodra i valavala:
Ka sa kani ira na mate dauveiveitauvi.
30Sa qai tu cake ko Finiase, ka cudruvi ira:
Ka sa mudu kina na mate veiveitauvi.
31Ka sa vakabau me nonai valavala dodonu,
Ki nai tabatamata kecega e sega ni mudu.
32Era sa vakacudrui koya talega mai na wai ni dauvere,
A sa ca kina ko Mosese e na vukudra:
33Ka ni ra sa vakararawataka na yalona,
Sa vosa cala kina na tebenigusuna.
34Era sa sega ni vakarusa na veimatanitu,
Ka vakaroti ira kina ko Jiova:
35Ka ra sa la'ki tiko vata kei ira na lewe ni vanua,
Ka vulica na nodra i valavala.
36A ra sa qarava na nodra matakau:
Ka ra sa coriti kina.
37Io, era a vakacabora na luvedra tagane kei na luvedra yalewa ki na tevoro,
38Ka liviraka na dra sa sega ni cala, io na kedra dra na luvedra tagane kei na luvedra yalewa,
Ni ra vakacabori ira ki na matakau ni Kenani:
Ka sa vakasisila kina na vanua e na vuku ni dra.
39Era sa dukadukali vakaoqo e na nodra cakacaka,
Ka lako vakatani e na nodra i valavala ca.
40Ka sa waqa kina na cudru i Jiova vei ira na nona tamata,
Ka sa cata kina na nonai votavota.
41Ka sa soli ira ki na ligadra na veimatanitu;
Ka ra sa lewai ira ko ira era sa cati ira.
42Ka sa vakasaurarataki ira talega ko ira na nodra meca,
A ra sa vakamalumalumutaki vei ira.
43Sa vakabulai ira vakavuqa ko koya;
Ia ko ira, era sa dauvakacudrui koya e na ka era bosea,
Ka ra sa vakamalumalumutaki e na vuku ni nodra i valavala ca.
44Ia ka sa raica ga ko koya na nodra rarawa,
Ni sa rogoca ko koya na nodra tagi:
45A sa nanuma e na vukudra na nona veiyalayalati,
Ka sa veivutuni me vaka na kena levu ni nona yalololoma:
46Sa lewa talega me ra lomani
Vei ira kecega era sa vakabobulataki ira.
47Mo ni vakabulai keimami, Jiova na neimami Kalou,
Ka soqoni keimami vata maivei ira na veimatanitu,
Me keimami ia kina na vakavinavinaka ki na yacamuni tabu,
Ke me daureki talega e na vakavinavinaka vei kemuni.
48Me vakarokorokotaki ko Jiova na nodra Kalou na Isireli,
Mailiu sara ka yacova na gauna ena sega ni mudu:
Ia me ra vakaemeni na tamata kecega.
Dou ia vei Jiova na vakavinavinaka.
Currently Selected:
NA SAME 106: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
