A LELE I JEREMAIA 4
4
Sa tagicaki ko Saioni e na kena tiko vakaca, 1-12. Sa vakatusa na kenai valavala ca, 13-20. Ena cudruvi ko Itomi, 21. Sa na vakacegui ko Saioni, 22.
1Isa na kena mataca mai na koula! na kena dua tani mai na koula dina sara!
Sa veibiuyaki tu na veivatu ni vale tabu e na mua ni sala ni koro kecega.
2Na gone tagane ni Saioni era talei sara ka vakatauvatani kei na koula dina sara, Isa era qai nanumi me bilo qele walega, na
cakacaka ni ligana na dautuli bilo!
3Io na tavuto, era sa ucuna na mata-ni-sucudra, era sa vakasucuma na luvedra:
Ko koya na goneyalewa ni kai noqu, sa lomaqa mai, ka vaka na ositereji ni veikau.
4Sa kakabi na yamena na gone sa sucu tiko ki loma ni gusuna e cake, ni sa viagunu:
Ko ira na gone lalai era sa kere madrai, ka sa sega e dovia vei ira.
5Ko ira era daukana ka vinaka, era sa luveniyali mai e na sala ni koro:
Ko ira era susugi ka vakaisulu e nai sulu kulakula, era sa davo no e nai benubenu.
6Ni sa ka levu na caka cala ni goneyalewa ni kai noqu, ka sa ka lailai nai valavala ca i Sotoma, ko koya ka vukici vakasauri
sara, ka sega na liga e tarai koya.
7Sa ra savasava vakalevu ko ira sa tawase me nona na Kalou
ka vakalailai na uca-vulavula,
Sa ra vulavula vakalevu
ka vakalailai na wai-ni-sucu,
Sa ra yago damudamu vakalevu ka vakalailai na rupi,
Sa vatukai vinaka ka vaka na safaia na yagodra.
8Sa loaloa mai na matadra ka vulavula na qilaiso;
sa ra sega ni kilai mai e na sala ni koro:
Sa kakabi na kulidra ki na suidra;
sa malai, sa vaka na buka.
9Sa vinaka ko ira sa vakamatei e nai seleiwau
ka ca ko ira sa mate e na dausiga:
Ni ra uru malua yani, ni ra laubasikataki e na kena viakania na vuata ni were.
10A ligadra na yalewa dauyalololoma, sa vakasaqa na luvedra dina;
Era sa kedra kakana ni sa vakacacani na goneyalewa ni kai noqu.
11Sa vakayacora ko Jiova na nona cudru; sa sovaraka na nona cudru katakata,
A sa vakawaqaca na buka mai Saioni, ka sa kania na kena yavu.
12Sa ra sega ni vakadinata ko ira na tui ni veivanua, kei ira kece na kai vuravura,
Ni ra na curu ki na matamata-ni-koro ni Jerusalemi ko ira na vakacaca kei na meca.
13E na vuku ni valavala ca ni nona parofita, kei na caka cala ni nona bete,
Era sa vakadavea e lomana na kedra dra na yalododonu,
14Era sa lako sese voli me vaka na mataboko e na sala ni koro, era sa vakadukadukalitaki e na dra,
Se tabu kina ni tara na nodra i sulu.
15Dou lako tani, sa tawa savasava, era a kacivaka vei ira, dou lako tani, dou lako tani, kakua ni dou tara:
Ni ra se ka dro tani, era sa kaya vakataki ira na lewe ni veivanua, Me ra kakua ni tiko tale maikea.
16A cudru i Jiova, sa dui tawasei ira; ena sega ni golevi ira tale ko koya:
A matadra na bete era sa sega ni doka; ko ira na qase era sa sega ni lomana.
17Ia koi keda, sa malumalumu tiko na matada ni da waraka na nodai vukevuke sa sega ni yaga:
Ni da yadra tiko, eda sa yadrava na vanua sa sega ni vakabulai keda rawa.
18Era sa cicimuria na we ni yavada, eda dredre kina ni lako voli e na sala ni noda koro:
Sa voleka mai na kedai vakataotioti, sa oti na noda gauna; ni sa yaco na kedai otioti.
19Era sa totolo ko ira era vakasavi keda ka bera na ikeli ka vuka voli e cake
Era sa cicimuri keda e na ulu-ni-vanua; era sa lawavaki keda mai veikau.
20A cegu ni ucuda, ko koya sa lumuta ko Jiova, sa rawai e na nodra i keli;
Ia ko koya eda a cavuta ni da kaya; E ruku ni yaloyalona eda na bula tiko e na kedra maliwa na lewe ni veivanua.
21Mo reki ka marau, na goneyalewa ni Itomi, sa tiko e na vanua ko Usi;
Io vei iko talega ena lako yani kina na bilo: ko na mateni, ka vakaluvawaletaki iko.
22Sa oti na nomu cudruvi e na vuku ni nomu i valavala ca, ko iko na goneyalewa ni Saioni;
Ena sega ni kauti iko tani tale vakabobula ko koya;
Ena cudruva na nomu caka cala, ko iko na goneyalewa ni Itomi;
Ena vakavotuya ko koya na nomu i valavala ca.
Vakavakadewa Makawa (Fijian Old Version) © Bible Society of the South Pacific