A LELE I JEREMAIA 3
3
Ko ira na yalododonu era sa tagicaka na ka rarawa sa yaco vei ira, 1-21. Ni ra vakananuma na loloma ni Kalou era sa vakararavi tiko vua, 22-36. Era vakatusa na lewa ni Kalou ni ka dodonu, 37-54. Era sa masuti koya me vakabulai ira, 55-63, ka cudruvi ira na nodra meca, 64-66.
1Koi au na tamata sa kune ka rarawa e na kuita ni nona cudru.
2Sa tuberi au ko koya, ka kauti au ki na butobuto, ka segai ki na rarama.
3Sa vuki tani vei au ko koya; ka sa dua tani vei au na ligana e na siga ka bogi.
4Sa vakavucataka ko koya na lewequ kei na kuliqu; sa musuka na suiqu.
5Sa viribai vei au ko koya, ka sa vakavolivoliti au e na ka gaga kei na oca.
6Sa vakatikori au ko koya e na veitikina butobuto, me'u vakataki ira sa mate makawa.
7Sa viribaiti au ko koya, me'u kua ni lako tani rawa: sa vakabibitaka na sinucodo ka'u sa vesu kina.
8Io ni'u sa tagi ka qoqolou, sa latia tani na noqu masumasu.
9Sa vakalatia na noqu sala e na vatu sa ta; a noqu sala sa vakavevetaka ko koya.
10Sa lawavaki au ko koya vaka e dua na pera, ka vaka na laioni e na yasana vuni.
11A noqu i lakolako sa vukica ko koya, ka sa dresudresuki au: sa vakaluveniyalitaki au.
12Sa loqata na nona dakai ko koya, a sa vakaturi au me'u ka me vanataka kina na gasau.
13Sa vakacoba ki na noqu i ivi na gasau ni nona taga gasau.
14Au a ka ni veivakalialiai vei ira kecega na kai noqu; ka ra seretaki au e na siga ka bogi.
15Sa vakamamautaki au ko koya e na duva gaga, sa vakamatenitaki au e na wai gaga sara.
16Sa vorota talega na batiqu e na laqere, sa buluti au e na dravusa.
17Ia ko sa biuta tani vakayawa na vakacegu mai na yaloqu: au sa guilecava na vinaka.
18Ia ka'u a kaya, Sa takali na noqu kaukauwa kei na ka ka'u nuitaka maivei Jiova.
19Mo ni nanuma na noqu rarawa kei na noqu tiko sese, na duva gaga kei na wai gaga.
20Sa daunanuma tiko kina na yaloqu ka'u sa malumalumu ga e loma.
21A ka oqo ka'u sa vakananuma e lomaqu, o koya ka'u sa nuitaka kina na vinaka.
22A loloma ga i Jiova eda sa sega ni vakaoti kina, ka ni sa sega ni mudu rawa na nona yalololoma.
23Sa ka vou e na veimataka, sa ka levu na nomuni yalodina.
24Sa noqu i votavota ko Jiova, sa kaya na yaloqu, o koya oqo ka'u na nuitaki koya kina.
25Sa yalovinaka ko Jiova vei ira era sa waraki koya, io ki na yalo sa qarai koya.
26Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova.
27Sa kilikili kaya na tamata me vakataqara vua nai vua ni sa cauravou tiko ko koya.
28Me sa tiko duadua ko koya ka galu toka, ka ni sa virikotora vua ko Koya:
29Me vunia na gusuna e na qele; de dua beka na ka me vakanuinui kina:
30Me vagolea na baluna vua sa yaviti koya: me sa oso sara ko koya e na veivakalialiai.
31Ni na sega ni biuti keda ko koya na Turaga ka sega ni mudu:
32Ia ke sa ia na veivakararawataki ko koya, ena ia talega na loloma me vaka na kena levu ni nona yalololoma.
33Ni sa sega ni vu mai na lomana me cudruvi ira na tamata, se me vakararawataka na lomadra.
34Me buturaki ira kece e ruku ni yavana era vesuki e vuravura,
35Me lewai koya vakatani na tamata e na ka sa dodonu kina, e na mata i Koya sa Cecere sara,
36Se me vakacaucautaka na tamata ni sa lewai, sa sega ni vinakata na ka oqori ko koya na Turaga.
37E dua li sa vosa, ka sa mana na nona vosa, ni sa sega ni vakarota ko koya na Turaga?
38Sa sega beka ni lako tani mai na gusu i Koya sa Cecere sara, na ca kei na vinaka?
39A cava sa didi kina e dua na tamata sa bula, e dua na tamata sa cudruvi e na vuku ni nonai valavala ca?
40Me da dikeva mada na nodai valavala, ka vakataroga, ka lesu tale vei Jiova.
41Me da masu cake e na lomada ni da dodoka na ligada vua na Kalou ni lomalagi.
42Koi keimami, keimami a talaidredre ka sa yalovakatani: koi kemuni ko ni a sega ni ia na veivakadonui.
43Ko ni sa tabonaka e na cudru, ka sa vakasavi keimami: ko ni sa ia na veivakamatei, ka sega ni yalololoma.
44Ko ni sa tabonaki kemuni e na o, me kakua ni basika yani na neimami masu.
45Ko ni sa cakavi keimami mei soqosoqo ga ka benu e na kedra maliwa na veimataqali.
46Era sa dalaga vei keimami ko ira na neimami meca kecega.
47A rere kei nai cori sa yacovi keimami; na veivakalalataki kei na veivakarusai.
48Sa dave tu mai na mataqu na uciwai levu, e na vuku ni kena rusa na goneyalewa ni kai noqu.
49A wai ni mataqu, sa tiri sobu tiko, ka sega ni mudu, sa sega ni cegu vakalailai,
50Ka me rai sobu mada mai ko Jiova, ka raica mai lomalagi.
51Sa yavalata na lomaqu na mataqu e na vukudra kecega na goneyalewa ni noqu koro.
52Era vakasavi au sara na noqu meca, me vaka na manumanu vuka, ka sega na vuna.
53Era sa muduka tani e nai keli na noqu bula, ka viritaka mai vei au na vatu.
54Sa luvuca na uluqu na wai; au a qai kaya, Au sa muduki laivi.
55Au a kaciva na yacamuni, Jiova, mai nai keli titobu.
56Ko ni a rogoca na domoqu: ni kakua ni tabonaka na daligamuni ki na noqu cegu, kei na noqu tagi.
57Ko ni sa toro voleka mai e na siga ka'u a kacivi kemuni kina: ko sa kaya, Mo kakua ni rere.
58Ko ni sa totaka na yaloqu e na veilewai, kemuni na Turaga; io ko ni sa vakabulai au.
59Ko ni sa raica, Jiova, na noqu vakacacani: mo ni lewa ga e na vukuqu.
60Ko ni sa raica kecega na nodra cudru, kei na nodra vere kecega era bukia vei au.
61Ko ni sa rogoca na nodra veivakalialiai, Jiova, na nodra vere kecega era bukia vei au;
62Na tebenigusudra era tu cake me ra bolei au, kei na nodra i naki ca vei au e na siga ka bogi.
63A nodra tiko sobu kei na nodra tu cake, mo ni vakaraica matua; sai au ga era seretaka.
64Ko ni na sauma vei ira, Jiova, me vaka na cakacaka ni ligadra.
65Ko ni na soli ira me kaukauwa na lomadra, oqo na nomuni cudruvi ira.
66Ko ni na vakasavi ira e na nomuni cudru, ka vakarusai ira tani mai na ruku i lomalagi, Jiova.
Currently Selected:
A LELE I JEREMAIA 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific