A LELE I JEREMAIA 5
5
Sa tukuna ko Saioni na ka ca sa yacovi koya, ka sa masu vua na Kalou, 1-22.
1Mo ni nanuma, Jiova, na ka sa yacovi keimami:
Ni vakasama, ka raica na neimami vakalialiai.
2A neimami vanua, sa soli me nodra na kai tani;
A neimami veivale, sa soli me nodra na vulagi.
3Keimami sa luveniyali ka sega ni vakatamani,
Sa vaka na yada na tina i keimami.
4Keimami sa volia e nai lavo na wai keimami sa gunuva;
A neimami buka, sa volitaki vei keimami.
5Sa bitaki na domo i keimami:
Keimami sa oca, ka sega ni vakacegu.
6Keimami sa solia na liga i keimami vei ira na kai Ijipita,
Vei ira talega na kai Asiria, me keimami mamau e na madrai.
7Era sai valavala ca ko ira na tama i keimami; a ra sa yali ga;
Ia keimami sa saumi e na vuku ni nodra caka cala.
8Ko ira na tamata wale, era sa veitaliataki keimami:
Sa sega e dua me vakabulai keimami mai na ligadra.
9Keimami bolea na mate ka qai rawa kina na keimami kakana,
E na vuku ni seleiwau mai veikau.
10Na kuli i keimami, sa loaloa mai me vaka na lovo,
Ni sa ka rerevaki na dausiga.
11Era sa yarataki ira na yalewa ni Saioni;
Kei ira na goneyalewa e na veikoro vaka-Juta.
12Era sa rubeci ira na turaga e na ligadra:
A matadra na qase sa sega ni dokai.
13Era kauti ira na cauravou me ra qaqi sila;
Kei ira na gone, era cola buka era sa bale.
14Ko ira na qase, era sa sega tale ni tiko mai na matamata-ni-koro;
Ko ira na cauravou, era sa mudu ni qiri lali.
15Sa mudu na marau e na loma i keimami;
Sa vuki me tagi na neimami meke.
16Sa lutu tani nai sala vakaturaga mai na ulu i keimami:
Ulei koi keimami oqo, ni keimami sai valavala ca!
17E na vuku ni ka oqo sa bibi kina na loma i keimami;
E na vuku ni ka oqo sa butobuto kina na mata i keimami.
18E na vuku ni ulu-ni-vanua ko Saioni, ni sa lala tu,
Sa lako voli e delana na fokise.
19Sai kemuni, Jiova, ka tiko ga ka tawa mudu;
Kei na nomuni tikotiko vakaturaga mai nai tabatamata e dua ki nai tabatamata e dua.
20A cava ko ni sa guilecavi keimami kina ka tawa mudu,
Ka sa biuti keimami vakadede sara?
21Mo ni vakalesui keimami vei kemuni, Jiova, keimami na qai lesu mai;
Mo ni vakavinakataka tale na neimami tiko me vaka e na gauna eliu.
22Ni kemuni sa biuti keimami vakaidina sara;
Ko ni sa cudruvi keimami vakalevu.
Vakavakadewa Makawa (Fijian Old Version) © Bible Society of the South Pacific