JOSUA 13
13
Sa vakatakila vei Josua ko Jiova na tiki ni vanua sa vo era sega ni rawata na Isireli me nodra, 1-6; a sa kaya vua me vota na vanua era sa rawata, 7; me vaka ka vota na vanua mai tai kadua ko Mosese vei ira na Rupeni kei ira na Kata kei ira na Manasa, 8-14. A nodra i votavota na Rupeni, 15-23; a nodra na Kata, 24-28; a nodra na wase e dua ni mataqali i Manasa, 29-33.
1A sa qase mai ko Josua, sa vuqa na nona yabaki; a sa kaya vua ko Jiova, O sa qase mai, sa vuqa na nomu yabaki, ka sa vo e levu sara na tiki ni vanua me taukeni. 2Oqo na vanua sa vo tu: Na nodra yasana kecega na kai Filisitia, kei Kesuri kecega, 3mai Siori, sa donui Ijipita, ka yaco ki nai yalayala kei Ekironi vaka ki na tokalau, sa kainaki e nodra na kai Kenani: e le lima na nodra turaga na kai Filisitia: na kai Kasa, kei na kai Asitoci, na kai Asikiloni, na kai Kaca, kei na kai Ekironi: ko ira talega na Avimi: 4mai na mata ni ceva, na nodra vanua kecega na kai Kenani, kei Miera, sa nodra na kai Saitoni, ka yaco ki Efeki, ka yaco ki na nodra i yalayala na Amoraiti: 5kei na nodra vanua na kai Kipali, kei Lepanoni taucoko, vaka ki nai cadracadra ni mata-ni-siga, mai Peali-kata e ruku ni ulu-ni-vanua ko Erimoni, ka yacova na sala sa basika ki Emaci. 6A lewe ni ulu-ni-vanua kecega mai Lepanoni ka yaco ki Misirifoci-meimi, kei na kai Saitoni kecega, ka'u na vakasevi ira yani e matadra na Isireli: ia mo qai vota ga vei ira na Isireli e na vakawiri madigi, me ra taukena, me vaka ka'u sa vakarota vei iko. 7Ia oqo, mo vota na vanua oqo me ra taukena na mataqali ciwaciwa, kei na dua na kena wase ni mataqali i Manasa: 8era sa rawata vata kaya ko ira na Rupeni kei na Kata na nodra i votavota, o koya sa solia vei ira ko Mosese, mai tai kadua ni Joritani vaka ki na tu-i-cake, me vaka sa solia vei ira ko Mosese nai talatala i Jiova; 9sa tekivu mai Aroeri mai na bati ni uciwai ko Arinoni, kei na koro sa toka e na maliwa ni uciwai, kei na buca kece mai Metipa ka yaco ki Taiponi; 10kei na veikoro kecega i Sioni na nodra tui na Amoraiti, o koya ka lewa mai Esiponi, ka yaco ki na nodra i yalayala na luve i Amoni; 11kei Kiliati, kei na nodra yasana na kai Kesuri, kei na kai Meeka, kei na ulu-ni-vanua taucoko ko Erimoni, kei Pasani taucoko, ka yaco ki Salika; 12na matanitu taucoko nei Oki mai Pasani, o koya ka lewa mai Aseteroci kei Etirei, (na kedra vo na tamata yagolevu): sa mokuti ira oqo ko Mosese, ka vakasavi ira tani.
13Ia sa sega ni vakasavi ira tani na kai Kesuri ko ira na Isireli, se na kai Meeka: a sa tiko e na kedra maliwa na Isireli ko ira na kai Kesuri kei na kai Meeka, ka yacova na siga oqo.
14Ia ki na mataqali ga i Livai, sa sega ni solia ko koya e dua na kedrai votavota; sa kedrai votavota na veika sa vakacabori e na bukawaqa vei Jiova na Kalou ni Isireli, me vaka ka kaya vei ira ko koya.
15A sa vota ko Mosese ki na mataqali i Rupeni me vaka na nodra veivuvale. 16Ia na nodra yasana sa tekivu mai Aroeri, ko ya mai na bati ni uciwai ko Arinoni, kei na koro ko ya e na maliwa ni uciwai, kei na buca kece mai Metipa; 17ko Esiponi, kei na kena veikoro kece e na buca; ko Taiponi, kei Pamoci-peali, kei Pecipeali-mioni, 18kei Jeasa, kei Kitemoci, kei Mefeaci, 19kei Kiri-aceimi, kei Sipima, kei Sereci-aseari e na ulu-ni-vanua mai na vanua cecelevu, 20kei Peci-piori, kei Asitoci-pisika, kei Peci-jisimoci, 21kei na veikoro kecega sa tu e na buca, kei na matanitu taucoko nei Sioni na nodra tui na Amoraiti, o koya ka lewa mai Esiponi, o ira ka mokuta vata ko Mosese kei ira na turaga ni Mitiani, ko Ivi, kei Rekemi, kei Suri, kei Uri, kei Repa, era turaga ni Sioni, ka tiko e na vanua. 22Ko Pelami talega na luve i Piori, na rairai, era yavita ko ira na Isireli e nai seleiwau kei ira na tamata era sa yavita. 23Ia na nodra i yalayala na Rupeni na Joritani, kei na yasana ko ya, Oqo na nodra i votavota na Rupeni me vaka na nodra veivuvale, na veikoro kei na veikoro lalai.
24A sa vota ko Mosese ki na mataqali i Kata, io vei ira na Kata, me vaka na nodra veivuvale. 25Ia sa nodra yasana ko Jaseri, kei na koro kecega mai Kiliati, ka dua na kena wase ni kedra vanua na luve i Amoni, ka yaco ki Aroeri, oqori sa donui Rapa; 26mai Esiponi talega ka yaco ki Rama i Misipe, kei Pitonimi; mai Meeneimi talega ka yaco ki nai yalayala ni Tipiri; 27ia e na buca, ko Peci-arami, kei Peci-nimira, kei Sukoci, kei Safoni, na kena vo ni matanitu nei Sioni, na tui Esiponi, ko Joritani kei na yasana ko ya, ka yacova na bati ni waitui ko Kinereci, mai tai kadua ni Joritani vaka ki na tu-i-cake. 28Oqo na nodra i votavota na Kata me vaka na nodra veivuvale, na veikoro kei na kedra veikoro lalai.
29A sa vota ko Mosese e dua nai votavota ki na dua na kena wase ni mataqali i Manasa, sa qai nodra e dua na kena wase ni nodra mataqali na Manasa me vaka na nodra veivuvale. 30Ia na nodra yasana sa vakatekivu mai Meeneimi, ko Pasani taucoko, na matanitu taucoko nei Oki na tui Pasani, kei na koro lalai kecega i Jairi, mai Pasani, sa onosagavulu na koro: 31ka dua na kena wase nei Kiliati, kei Aseteroci, kei Etirei, na veikoro e na matanitu nei Oki mai Pasani, sa nodra na luve i Mekiri na luve i Manasa, io sa nodra e dua na kena wase ni luve i Mekiri me vaka na nodra veivuvale.
32Oqo ka solia ko Mosese mei votavota e na vanua cecelevu nei Moapi, mai tai kadua ni Joritani, e na vanua mai na tu-i-cake, e donui Jeriko. 33Ia sa sega ni solia e dua nai votavota ko Mosese ki na mataqali i Livai: a kedrai votavota ga ko Jiova na Kalou ni Isireli, me vaka ka kaya vei ira ko koya.
Currently Selected:
JOSUA 13: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
