JOPE 9
9
Sa vakadinadina ko Jope ni sa dodonu na Kalou, a sa sega e veivala kaya me gumatua, 1-21. Sa sega ni rairai ni sa cala na tamata ni sa yacovi koya na ka ca, 22-35.
1Sa qai vosa ko Jope, ka kaya,
2Au sa kila vakaidina ni sa vakakina:
Ia ka me dodonu rawa vakaevei na tamata e na mata ni Kalou?
3Kevaka sa via veileti kaya,
Ena sega ni tukuna rawa vua e dua na ka e udolu.
4Sa vuku na lomana, ka sa ka vakaidina na nona kaukauwa:
Ko cei sa vakalomaqataki koya vua, ka sa vinaka kina?
5Ko koya sa kauta tani na veiulu-ni-vanua, a ra sa sega ni kila,
Ni sa vukica e na nona cudru:
6Ko koya sa yavalati vuravura tani mai na kena yasana,
A sa yavala na kena duru:
7Ko koya sa vakarota na mata-ni-siga, ka sa sega ni cadra;
A sa sogolatia na kalokalo:
8Ko koya sa birika vakai koya ga na lomalagi,
A sa butuka tu na dela ni ua ni wasawasa:
9Ko koya sa buli Akituro, kei Oraioni, kei Peliatisi,
Kei na veiyasana vuni e na mata ni ceva.
10Ko koya sa daucakava na ka levu sa sega ni kilai rawa;
Ia na ka e veivakurabuitaki sa sega ni wiliki rawa.
11Raica, sa lako volekati au, ia ka'u sa sega ga ni raici koya:
Sa lako tu yani, ia ka'u sa sega ga ni kunea.
12Raica, sa kauta tani ko koya, ia ko cei me tarova rawa?
Ko cei me kaya vua, A cava ko ni sa kitaka?
13Sa na sega ni vakasuka na nona cudru na Kalou,
Sa ra na cuva ga vua ko ira era dauvukea na viavialevu.
14Sa dredre vakalevu vei au me'u vosa vua,
Se digitaka na vosa me'u kaya vua?
15Ia kevaka ka'u sa yalododonu, ka'u na sega ga ni vosa tale vua,
Ka'u na vakamamasu ga vua sa lewai au.
16Kevaka ka'u a kaci, ka rogo mai vei au ko koya,
Ka'u na sega ga ni vakadinata ni sa rogoca na domoqu.
17Ni sa vorolaki au ko koya e na cava,
Ka sa vakamavoataki au vakalevu wale.
18Sa sega ni laivi au me'u cegu rawa,
Ia sa vakaluvuci au e na ka gaga.
19Kevaka ka'u cavuta na kaukauwa, raica, sa kaukauwa ko koya:
Se na lewa, ko cei me na lokuca mai na noqu siga?
20Kevaka ka'u sa vakadonui au, ena vakacalai au na gusuqu:
Kevaka ka'u sa kaya ka'u sa sega ni cala, ena vakatakilai au ni'u sa yalovakatani.
21Kevaka ka'u sa sega ni cala, ka'u na sega ni kila na yaloqu:
Ka'u na weletaka na noqu bula.
22Sai koya vata ga ka'u sa kaya,
Sa vakarusa ko koya na yalododonu kei nai valavala ca.
23Kevaka sa yaco vakidacala na veivakamatei ni kuita,
Ena dredrevaka ko koya na ka era sa vakatovolei kina na tawa cala.
24Sa soli ko vuravura ki na ligadra nai valavala ca:
Sa tabonaka ko koya na matadra na mataveilewai;
Kevaka e segai, sa qai evei, se ko cei ko koya?
25Sa qai totolo na noqu siga ka bera nai talaki e daucici;
Sa dro tani, ka sega ni kunea na ka vinaka.
26Sa lako tani yani me vaka na waqa dautotolo:
Me vaka na ikeli sa vukaca na kena.
27Kevaka ka'u sa kaya, ka'u na guilecava na noqu didi,
Ka'u na biuta na noqu mataveveku, ka vakamarautaki mai:
28Ka'u sa qai rere e na vuku ni noqu rarawa kecega;
Ka'u sa kila ni ko na sega ni vakadonui au.
29Au na vakacalai ga,
Me'u qai oca wale vakacava?
30Kevaka ka'u sa vuluvulu e na wai ni uca-vulavula,
Ka vakasavasavataka sara na ligaqu;
31Ko na qai vakalomoci au e na oruoru,
Ena qai vakasisilataki au na noqu i sulu.
32Ni sa sega ni tamata ko koya me vakataki au, me'u vosa rawa vua,
Me keirau mai veilewai vata kaya:
33Sa sega talega e dua na dautataro,
Me tabaki keirau ruarua e na ligana.
34Me kauta tani mada vei au ko koya na nona kuita,
Ia me kakua ni vakadomobulataki au na nona veivakarerei:
35Au na qai vosa, ka sega ni rerevaki koya;
Ia ka sa sega ni vakakina vei au.
Currently Selected:
JOPE 9: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
