JOPE 8
8
Sa kaya ko Pilitati ni sa dodonu na Kalou e na ka e cakava, 1-7. Sa vaka ni sa daucudruvi eliu na dauveivakaisini, 8-19. Sa kaya talega ni sa dodonu na ka sa yaco vei Jope, 20-22.
1Sa qai vosa ko Pilitati na luve i Sua, ka kaya,
2E bogi vica mo cavuta kina na ka vakaoqo?
E bogi vica me sa vaka na cagi kaukauwa na vosa ni gusumu?
3Sa ia beka na Kalou na lewa sa sega ni dodonu?
Se vakacala beka na ka dodonu ko Koya sa Kaukauwa?
4Kevaka era sai valavala ca vua ko iratou na luvemu,
Ka sa vakatalai ira tani ko koya e na vuku ni nodra talaidredre;
5Kevaka ko sa vakasaqara taudonu na Kalou,
Ka ia na nomu vakamamasu vei Koya sa Kaukauwa;
6Kevaka ko sa savasava ka dodonu;
E sa na qai yadra dina sara mai e na vukumu ko koya, Ena vakasaututaka talega na nomu i tikotiko dodonu.
7Kevaka sa ka lailai na nomu i vakatekivu,
Ena ka levu sara ga na nomu i otioti.
8Ia mo taroga mada nai tabatamata makawa,
Ka mo gumatua ni tarogi ira na nodra qase:
9Ni da sa tubu wale e na noa koi keda, ka sega ni kila e dua na ka,
Ni sa vaka wale na yaloyalo na noda siga e vuravura:
10Era na sega beka ni vakavulici iko, ka tukuna vei iko,
Ka cavuta na vosa mai na lomadra?
11Ena tubu li na taria ni sa sega na lolobo?
Ena tubu na kuta ni sa sega na wai?
12Ni sa drokadroka tu, ka sega ni tamusuki,
Sa malai rawarawa ga oqori, ka dredre na co kecega.
13Sa vakakina na nodra sala kecega era sa guilecava na Kalou;
Ia ena sega ni yaco na ka e nuitaka na dauveivakaisini:
14Ena muduki laivi na ka sa nuitaka ko koya;
Ena dua na viritalawalawa ga na ka e vakararavi kina.
15Ena ravita na nona vale, ia ena sega ni tu:
Ena taura matua, ia ena sega ni dei.
16Sa drokadroka tu ko koya e na mata-ni-siga,
A sa tubu na tabana e nona were.
17Sa vereverea tu na wakana e nai binibini;
Sa kunea na tikina vatuvatu.
18Kevaka ena cavu laivi ga ko koya mai na nona yasana,
Ena qai cakitaki koya, ka vaka, Au a sega ni kunei iko.
19Raica, sa vaka ga oqo na nona reki,
Ia ena tubu eso tani tale mai na qele ko ya.
20Raica, ena sega ni biuta tani na tamata yalododonu na Kalou,
Ena sega talega ni vukei ira nai valavala ca:
21Ena vakasinaita mada na gusumu e na dredre,
Kei na tebenigusumu e na marau:
22Ko ira era cati iko era na vakaisulutaki e na madua;
Ena yali sara talega na nonai tikotiko nai valavala ca.
Currently Selected:
JOPE 8: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
