JOPE 10
10
Sa vosa vua na Kalou ko koya e na vuku ni nona rarawa, a sa kerea me vakacegui vakalailai mada ni sa bera tiko ni mate.
1Sa ka ni oca ki na lomaqu na noqu bula;
Au na soli au me'u didi walega;
Au na vosa ga e na rarawa ni yaloqu;
2Au na kaya vua na Kalou,
Mo ni kakua ni vakacalai au;
Mo ni vakatakila vei au se cava ko ni sa veileti kina kei au.
3Sa vinaka beka vei kemuni mo ni ia na veivakararawataki,
Mo ni beca talega na cakacaka ni ligamuni,
Ka cilava na nodra bose nai valavala ca?
4Koi kemuni beka ko ni sa mata vakatamata?
Se ko ni raica beka na ka me vaka sa raica na tamata?
5Sa tautauvata beka na nomuni siga kei na nodra siga na tamata?
Se tautauvata na nomuni veiyabaki kei na veisiga ni tamata,
6Mo ni sa vakataroga kina na noqu cala,
Ka sa qaqa na noqu i valavala ca?
7Ia ko ni sa kila ni'u sa sega ni tamata ca;
Ka sa sega e dua me vakabula rawa mai na ligamuni.
8Sa vakamataitaki au na ligamuni,
Sa cakava kece na tikiqu me vinaka vata; ia ko ni sa vakarusai au ga.
9Mo ni nanuma mada, ni kemuni sa buli au me vaka sa caka na tete;
Ia ko ni na vakalesui au tale beka me'u kuvu-ni-soso?
10Ko ni sa sega beka ni livi au yani me vaka na wai-ni-sucu,
Ka buli au me vaka nai buli wai-ni-sucu?
11Ko ni sa vakaisulutaki au e na kuliqu kei na lewequ,
Ka viribaiti au e na suiqu kei na ua.
12Ko ni sa solia vei au na bula kei na loloma,
Ia na nomuni dauraici au sa maroroi kina na yaloqu.
13Ia na ka kece oqo ko ni sa vunia e lomamuni:
Au sa kila ni sa tiko vei kemuni na ka oqo.
14Kevaka ka'u sai valavala ca, ko ni sa nanuma tiko kina,
Ko ni na sega talega ni vakadonui au mai na noqu caka ca.
15Kevaka ka'u sai valavala ca, ka'u na ca ga kina;
Ia kevaka ka'u sa caka dodonu, ka'u na sega ga ni ta cake.
Au sa luvu e na madua; ka'u raica tiko na noqu rarawa;
16Ni sa tubu ga, ko ni sa vakasavi au me vaka na laioni daukata:
Ia ko ni sa baci lesu vakidacala tale mai vei au.
17Ko ni sa daulesia na nomu ka vou eso me tukuni au vakaca,
Ko ni sa vakalevutaka na nomuni cudru vei au;
Sa dauyaco vei au na ka vou kei nai valu.
18A cava ko ni a kauti au kina mai na kete?
Ke'u a ciba, ka sa sega ni kunei au e dua na tamata, ke sa vinaka.
19Ka'u a qai vaka ni'u sa sega ga,
Ka'u a qai colati mai na kete ki nai bulubulu.
20Sa sega beka ni vica walega na noqu siga?
Mo ni kua mada, ni laivi au ga, me'u vakacegu vakalailai mada,
21Me'u qai lako yani ka sega ni lesu tale mai,
Io ki na vanua butobuto kei na yaloyalo ni mate;
22E dua na vanua butobuto, me vaka na butobuto loaloa;
Na yaloyalo ni mate, sa sega ni vakacokotaki vinaka,
Ka sa vaka na butobuto ga na kena rarama.
Currently Selected:
JOPE 10: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
