JOPE 7
7
Sa vaka ko Jope sa dodonu na nona via mate, 1-11. Sa didivaka na ka eso vua na Kalou, 12-21.
1Sa sega beka nai valu me ia na tamata e vuravura?
A nona siga sa sega beka ni tautauvata kei na siga ni tamata sa voli?
2Me vaka sa gadreva sara na rurugu na tamata,
Ka me vaka na tamata sa voli sa waraka tiko nai sau ni nona cakacaka:
3Sa noqu i votavota vakakina na veivula wale,
A sa lesi vei au na bogi ni vutugu.
4Ni'u sa la'ki koto, au sa kaya,
Au na duri ninaica, me oti na bogi?
Ka'u sa veivukiyaki koto ga, a sa kida na mataka.
5Sa vakaisulu na lewequ e na baca kei na qele vavaku;
Sa drakusi na kuliqu, ka sa boi ca mai.
6Sa ka totolo na noqu siga ka berabera na nonai talitali na dautali sulu,
A sa vakaoti ka sega na ka me'u nuitaka.
7Mo nanuma sa cagi walega na noqu bula:
Ena sega ni kunea tale na ka vinaka na mataqu.
8A mata i koya sa raici au ena sega ni raici au tale:
Sa raici au na matamuni, ia ka'u sa qai sega ga.
9Sa seavu na o ka lako tani yani;
Sa vakakina ko koya sa lako sobu ki nai bulubulu, ena sega ni lako cake tale mai.
10Ena sega ni lesu tale mai ki nona vale,
Ena sega ni kilai koya tale na nona yasana.
11Ia koi au, ka'u na sega ni tarova na gusuqu;
Ka'u na vosa ni sa yaluma na yaloqu;
Ka'u na didi ni sa gaga na lomaqu.
12Koi au beka na wasawasa, se na tavuto,
Ko ni sa lesia kina e dua me vakatawai au?
13Ni'u sa kaya, Ena vakacegui au na noqu i mocemoce;
Ena vakacegui au mai na noqu mate na noqu i davodavo;
14Ko ni sa qai vakarerei au e na tadra,
Ka vakadomobulataki au e na raivotu:
15Au sa digitaka kina na kukuna kei na mate,
Ka cata me'u bula:
16Au sa vakasisilataka; au sa sega ni via bula tikoga:
Mo ni laivi au ga; ni sa ka wale na noqu bula.
17A cava na tamata, mo ni vakalevulevui koya kina?
Ka vakananumi koya kina?
18Ka talevi koya e na mataka kecega,
Ka vakatovolei koya tikoga?
19A cava na kena dede ko ni sa sega ni gole tani kina vei au,
Se laivi au tu me'u tei tiloma mada na noqu weli?
20Au sai valavala ca; a cava me'u cakava vei kemuni, koi kemuni sa daumaroroya na tamata?
A cava ko ni sa lesi au kina me'u ka mo ni vanavana kina,
Au sa yaco kina me'u ka bibi vei au vakai au ga?
21Ia ka cava ko ni sa sega kina ni bokoca na noqu caka cala, ka kauta tani na noqu i valavala ca?
Ni'u na qai koto sobu e na kuvu-ni-soso;
Ia kemuni na qarai au vagumatua, ia ka'u na yali ga.
Currently Selected:
JOPE 7: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
