JOPE 6
6
Sa tukuna ko Jope ni sa sega ni tagi wale, 1-7. Sa via mate me vakacegu mada, 8-13. Sa vunauci iratou na wekana e na vuku ni ra sa sega ni loloma, 14-30.
1Sa vosa ko Jope, ka kaya,
2Me vakarautaki dina mada na kena bibi ni noqu rarawa,
Ia me vakatauvatani e nai vakarau ni bibi kei na ka ca sa yacovi au!
3Ni sa qai bibi vakalevu ka mamada na nuku ni wasawasa:
O koya oqo ka'u sa rui vosa vakariri kina.
4Ni sa lau ki lomaqu na gasau i Koya sa Kaukauwa;
Sa gunuva na yaloqu na kena gaga:
Sa tuvai valu kivei au na ka rerevaki mai vua na Kalou.
5Sa tagi beka na asa kila ni sa tu na kena co?
Se via tagi na pulumokau ni sa kana tiko?
6Sa kani rawa beka na ka velavela ni sa sega ni vakamasima?
Se kamikamica na weli ni yaloka?
7A ka sa bese ni tara na yaloqu,
Sa qai yaco me vaka na kakana velavela vei au.
8Me vakayacori mada na noqu kerekere;
Ka solia mada na Kalou na ka ka'u sa gadreva!
9Ia ke sa vinaka mada vua na Kalou me vakarusai au;
Me sereka na ligana, me muduki au tani!
10Au na qai vakacegu rawa;
Io, au na qai vakaukauwataki au e na rarawa: me kakua ni vosota ko koya;
Ni'u a sega ni vunia na vosa i Koya sa Yalosavasava.
11A cava na noqu kaukauwa, me'u wawa tiko?
Se cava na noqu i otioti, me'u via vakabalavutaka kina na noqu bula?
12A noqu kaukauwa na kaukauwa beka ni vatu?
Se sa parasa beka na lewequ?
13Sa sega beka ni sa yali vei au na veivuke,
Ka sa se tani vei au na vuku dina?
14Ko koya sa kana rarawa e dodonu me lomani koya na wekana;
Io vei koya de sa biuta na rerevaki
Koya sa Kaukauwa.
15Eratou sai valavala vakailasu na wekaqu me vaka na soniwai,
Eratou sa vaka na soniwai e dautakali yani;
16Sa vuvu e na vuku ni wai sa cevata tu,
Sa vuni talega kina na uca-vulavula:
17Oqori sa yali ni sa katakata mai:
Ni sa cilavi siga, sa takali sara mai na kena yasana.
18Sa lesu tani na sala ni kenai davedave;
Sa yaco ga me segai, me yali sara:
19Era sa vakasaqara ko ira nai vavakoso lewe ni sala mai Tima;
Era sa waraka ko ira na lewe ni sala mai Sipa:
20Era sa madua ni ra a vakararavi kina;
Era sa lako mai kina, a ra sa taqaya.
21Ni dou sa qai vaka na ka wale;
Dou sa raica ni'u sa biu sobu, ia dou sa rere.
22Au sa kaya beka, Dou kauta mai vei au na ka?
Se, Dou solia vei au nai loloma mai na nomudou i yau?
23Se, Dou vakabulai au mai na liga ni meca?
Se, Dou voli au mai na liga ni kaukauwa?
24Dou vakavulici au, ka'u na tiko lo;
Ia dou vakatakila vei au na ka ka'u sa cala kina.
25A ka kaukauwa vakaidina na vosa dodonu!
Ia ka cava beka na betena na nomudou vunauci au?
26Dou sa nanuma beka mo dou vunauca na vosa,
Ni sa vaka na cagi na vosa sa cavuta ko koya sa luvu na lomana?
27Io, dou sa luvuci koya na luveniyali,
Ka kelia nai keli ni nomudou i tau.
28Ia dou lomavinaka mada, dou raici au mai;
Ni na macala vei kemudou kevaka ka'u lasu.
29Dou lesu mada mai, kakua ni kaya ni'u sa cala;
Ia dou lesu mada, ni sa tu kina na noqu caka dodonu.
30Sa tiko beka na ka tawa dodonu e yamequ?
A gusuqu beka sa sega ni kila rawa na ka e ca?
Currently Selected:
JOPE 6: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
